Jems 1 - Meta’

Ə̀chàʼrɨ̀

¹ À yɨə mɔ̌ Jems, nɨ mə̀ yeʼ wə̀d ə̀fàʼì Ŋwìə̀ mbɨ wɨ Ə̀nùŋɨ̀sɨg Yeso Kristo, ŋwaʼnɨ ə̀ŋwàʼnɨ̀ zɔ̂. Mə wɨə ŋwàʼnɨ̀ əmbɨ mbə̀n mɨnəbɨ mɨ̀Jû mbe wum chɔ̀b rɨ̀be nɨ jaŋ ɨŋga ɨsɨg jìm. Mə chàʼrɨ̀ əwən.

Ənû nɨ berɨ ɨbenɨ nɨ kaanɨ mbɨ ənû nɨ nɔn ɨwe rɨ əmbɨ ə Ŋwiə̀

² Mbɨ bɔŋgɔb, mbə̀ ghaʼrɨ əwən ənɨ mɨ̀nyùmə̀ jìm mbe nɨ tɨkwɨrɨ ɨ̀kwàʼnɨ̀ nɔnɔʼ nyɨ ɨgwɨ nən.

³ Mbə̀ fə kyerɨ ə ni mbɨ mɨ zweʼrɨ ə ɨbenɨ, mbə mbe tɨ̀ mbə nyìʼ.

⁴ Mbə̀ zə ni mbə̀ nyiʼ ə wò ɨmbì. Mbə̀ mɨ ghɨ̀ əne, mbə bɨrɨ kwi kàànɨ̀, mbə mɨchî bə̀ bɔ̀ŋ màànɨ̀ nɨ chəi mbə̀ bɔd ənɨ əba ə mɔʼɔ.

⁵ Wə̀d mɔʼɔ rəbɔʼ nən mɨ kwaŋ ɨwe, wɨ̀ nɔn rɨ əmbɨ ə Ŋwiə̀. Məd wɨə nàʼ ɨghɨ əmbɨ ə bə̂d mɨ̀jìm əbu əbu. Ɨ wɨə bə̀ nàʼ ənɨ ə fîŋ chɔ̀m. Wɨ̀ bɨrɨ naʼ ɨwe ɨ bɔ.

⁶ Àyɨə ənɨ wɨ̀ nɔnɨ, wɨ̀ ben ɨŋga i fîŋ ni Ŋwìə̀ bɨrɨ naʼ ɨ bɔ. Tɨ wɨ̀ bid i, ɨmbə̀ʼ ɨghəm nɨ wə̀d we nɨə bìrə̀ yɨ ɨghabɨ mɨnib ɨŋga rɨ̀bàà nɨ əfim ə tinə mbɨ nɔ̀ʼə̀ swiʼə.

⁷ Tɨ ɨkwɨ wə̀d we kɔndɨ i ni Ə̀nùŋɨ̀sɨg bɨrɨ naʼ əghɨ ə mɔʼɔ ɨ bɔ.

⁸ Fîŋ məd zɨ ɨba be. Ənɨ ɨnû jìm mbe nɨ wɨə ghɨ̀ə̀, ɨ wɨə bid i birɨ.

⁹ Aŋgɔb we nɨ chəi bə̂d ə nèŋ əməd ni wɨ̀ yɨ əghɨ ə mɔʼɔ berɨ ghaʼ ənɨ Ŋwìə̀ nɔ əməd.

¹⁰ Aŋgɔb we nɨ berɨ mbɔ̂n berɨ ghaʼ ənɨ Ŋwìə̀ swi əməd, ɨmbə̀ʼ ɨghəm nɨ wə̀d mbɔ̂n yɨ ɨghabɨ ɨ̀kwě nɨə nə̀ŋə̀ kwɨə.

¹¹ Nyùmə̀ wɨə teə mbɨ əzuʼ ə ka ka. Əzuʼ ze ə zɨə ghɨ̀ ni ɨghɨ nəŋə. Ɨghɨ mbe nɨə nəŋə, tɨ̀kwě feŋgɨ. Tɨ̀kwě te nɨ nyaʼa kaŋ bɔ̀ŋ fə wɨrɨ bèŋ bə i. À yɨə bə̀ əndəŋ əndəŋ ni wə̀d mbɔ̂n bɨrɨ nim ɨchî nɨ wɨə beenɨ əbɔʼ mbi ɨnû.

¹² Ŋwìə̀ zɨ əbɔrəbɔd ɨgun ə wə̀d we nɨə nyìʼ ənɨ ə̀kwàʼnɨ̀ ə nyɨ ɨgwɨ məd, ɨmbə̀ʼ ɨghəm nɨ ənɨ wɨ̀ chè ə̀kwàʼnɨ̀ ze, wɨ̀ bɨrɨ nɨŋ ɨneʼe. Ɨneʼe we yɨ ɨ̀tènɨ̀ rɨ mì we nɨ Ŋwìə̀ nyaʼa kaʼ əmbɨ ə bə̂d mbe nɨ ghaʼ əməd.

¹³ Ənɨ ənumbɨ ə nyɨ ɨgun ə wə̀d, tɨ wɨ̀ ghà i ni, “À yɨə Ŋwìə̀ numbɨ əmɨ,” ɨmbə̀ʼ ɨghəm nɨ chəi ənû rɨbɔ̀ŋ ə mɔʼɔ nɨ tɨ̀ zɨə numbɨ ə Ŋwiə̀. Chəi Ŋwìə̀ ziə ə bə̀ numbɨ ə wə̀d.

¹⁴ Ənumbɨ ə zɨə nyɨ ɨgun ə wə̀d ənɨ ɨnû mbe nɨ wɨə feenɨə zɨ ətam ɨ bɔ bə̀ tambɨ əməd.

¹⁵ Ɨnû mbe nɨ wɨə feenɨə bɨrɨ nyɨ ɨŋga fîŋ məd, sɨ ghɨ̀ ni wɨ̀ ghɨ̀ ɨnû rɨbɔ̀ŋ. Ənɨ ɨnû rɨbɔ̀ŋ mbe fə kaanɨ ɨŋga məd, mbɨ bɨrɨ zwiirɨ əməd.

¹⁶ Mbɨ bɔŋgɔb nɨ mə̀ ghaʼi kwàʼ rɨŋgəʼ, tɨ wə̀d mɔʼɔ tambɨ i əwən.

¹⁷ Ɨghɨ chɔ̀m jìm mbɨ ɨneʼe jìm we nɨ bɔŋɨ màànɨ̀ yɨ rɨkaŋ. Mbɨ yɨ rɨ əmbɨ ə Mbǎʼ we nɨ nyaʼa tekɨ ɨghɨjìm mbe nɨ yeʼ ɨkaŋ, nɨ à yɨə məd ə nàʼ ɨzeŋɨ zeŋɨ. Kaʼ məd wɨə kwepɨ i. Kaʼ ɨchî nɨ wɨə beŋ ɨnyod wɨə ghɨ̀ i ni ɨsɨ fin.

¹⁸ À yɨə məd ziə, ənɨ i ɨghəm, nyaʼa ghaʼ nɨ nɨŋ əwa ənɨ mbi bɔn ənjìm ɨŋgam məd we nɨ yeʼ wɨ rəsìʼ. Wɨ̀ nyaʼa nɨŋ əwa ɨmbə̀ʼ tɨ̀ berɨ tɨmbin rɨtu rəbɔʼ ɨghɨ mbe nɨ wɨ̀ nyaʼa tekɨ.

Ənû nɨ zu bə̀ ghɨ̀

¹⁹ Mbɨ bɔŋgɔb nɨ mə̀ ghaʼi kwàʼ rɨŋgəʼ, mbə̀ berɨ kyerɨ ənû zɔ̂. Wə̀d jìm tɔ ɨ̀tǒŋ zu ənû. Tɨ wɨ̀ kɨə ghàm i. Tɨ wɨ̀ kɨə sə i ɨtəm,

²⁰ ɨmbə̀ʼ ɨghəm nɨ ənɨ wə̀d ə sə ɨtəm, chəi wɨ̀ bɨrɨ ghɨ ɨnû mbe nɨ Ŋwìə̀ kəbɨ.

²¹ Əne mbə̀ waʼ ɨzwɨ̂ ɨnû jìm bə̀ waʼ ɨnû ɨzɨg jìm mbe nɨ mbɨə ghɨ̀ə̀. Mbə swi ə ɨnyod, ben ɨŋgam Ŋwiə̀ we nɨ wɨ̀ zɨ ɨŋga tə fîŋ. Ɨŋgam we bɨrɨ ghɨ̀ ni mbə̀ jwɨ rəŋgəʼ.

²² Tɨ mbə̀ yeʼ ə bə̂d nɨə zu ɨŋgam Ŋwiə̀ zu, əne tambɨ ə ɨnyod. Mbə̀ ghɨ ɨnû mbe nɨ ɨŋgam we gha ni mbə̀ ghɨ̀ ə.

²³ Wə̀d we nɨə zu ɨŋgam Ŋwiə̀, àyɨə chəi wɨə ghɨ̀ə̀, yɨ ɨghabɨ wə̀d nɨ neŋ i ɨnyod ɨŋga əneŋ-ɨfě.

²⁴ Wɨ̀ bɨrɨ neŋ i ɨnyod kwàʼ ɨchî chɔ̀m sɨ nɔ̀ʼ wo i. Àmei əwu əwən, wɨ̀ bɨrɨ neb ɨchî nɨ wɨ̀ kɨə kəʼə.

²⁵ Ŋwìə̀ bɨrɨ zɨ əbɔrəbɔd ɨgun ə wə̀d we nɨ jeŋgɨ neŋ rɨkə te nɨ bɔŋɨ màànɨ̀, nɨ yeʼ rɨkə te nɨə ghɨ̀ ni wə̀d chub ənɨ i ɨghəm. Wɨ̀ bɨrɨ zɨ əbɔrəbɔd ze ɨmbə̀ʼ wɨ̀ wo ɨmbì ghɨ̀ ɨnû mbe nɨ yeʼ ɨŋga rɨkə te, nɨ chəi wɨ̀ neb ɨnû mbe nɨ wɨ̀ nyaʼa be zu, àyɨə ɨ wɨə ghɨ̀ ɨnû rəŋgu.

²⁶ Wə̀d mɔʼɔ rəbɔʼ nən wa kɔndɨ ni tə kàànɨ̀ ɨŋga ənû ə Ŋwìə̀ ə? Wɨ̀ mɨ ton yimbɨ i i ɨchû, ɨ wɨə tambɨ i ɨnyod, əne ənû ə Ŋwìə̀ əməd ze yɨ ətu ə̀kǒ.

²⁷ Ənû ə Ŋwìə̀ ze nɨ Ŋwiə̀ Mbǎʼ ben ni zɨə zeŋ, nɨ chəi ənû rɨbɔ̀ŋ ɨŋga, yɨ nɨ nəŋgɨ mɨchɨ bə̀ fɔrɨ nɨ nəŋgɨ mɨku əyi mbe nɨə zəə ŋgəʼ. À yɨə bə ni tɨ wə̀d ben i ɨnû rɨŋga ɨsɨg chəkɨ i əməd.