2 Kɔrèn 3 - Meta’

Bə̂d ə̀fàʼì əton fɨso fi

¹ Tɨ̀ wa bɨrɨ wɨrɨ kɔ gha ɨmbə̀ʼ a ɨnyod mbǎ mbǎ ni tɨ̀ yɨə bə̂d ə̀fàʼì chɔ̀m ə? Kɨ̀ mbə wa kə̀b, ɨchî nɨ bə̂d mɔʼɔ ə ghɨ̀ə̀, ni tɨ̀ ŋwaʼnɨ ə̀ŋwàʼnɨ̀ ɨ nən, kɨ̀ ni mbə̀ ŋwaʼnɨ ə̀ŋwàʼnɨ̀ ɨmbə̀ʼ əwa, ɨmbə̀ʼ bə̂d ben ni tɨ̀ wɨə fàʼ ɨchî chɔ̀m ə?

² Mbə̀n mbɔ̂ yɨ mba ɨ̀ŋwàʼnɨ̀ nɨ mbɨ ŋwaʼnɨ ɨŋga ta fîŋ, ɨmbə̀ʼ wə̀d jìm mɨ foŋ, wɨ̀ kyerɨ ənû ze nɨ yeʼ ɨŋga.

³ Mbə mbɨə chwiə ni mbə yɨ ə̀ŋwàʼnɨ̀ ze nɨ Kristo nyaʼa ŋwàʼnɨ̀, əne tom əwa mbɨ əzɨ əwən. Chəi wɨ̀ nyaʼa ŋwaʼnɨ ənɨ fɨmbən ə̀ŋwàʼnɨ̀. Wɨ̀ nyaʼa ŋwàʼnɨ̀ yeʼ ənɨ Əzwî ə Ŋwiə̀ we nɨ yeʼ ɨkǎ. Chəi wɨ̀ nyaʼa ŋwaʼnɨ ɨgun əbapɨ əti. Wɨ̀ nyaʼa ŋwàʼnɨ̀ yeʼ ɨŋga fîŋ rɨ bə̂d.

⁴ Tɨ̀ wɨə ghà əne ɨchî nɨ tɨ̀ che ənjìm ə Kristo nùŋ fîŋ ɨgun ə Ŋwiə̀.

⁵ Tɨ̀ rɨka kùʼ a nɨ gha ni ɨnû mbɔ̂ yɨ rɨ na. À yɨə Ŋwìə̀ ghɨ ni tɨ̀ kuʼ ə.

⁶ Wɨ̀ fə ghɨ̀ ni tɨ̀ kuʼ nɨ fàʼ əton fɨso fi. Ka fɨso fi fe yɨ i əghɨ nɨ mbɨ ŋwaʼnɨ. Fɨso fe yɨ rɨ əmbɨ ə Əzwî. Tɨkə te nɨ mbɨ ŋwaʼnɨ tɨə yeʼe mbɨ ɨvɨ, àyɨə Əzwî ə zɨə nàʼ ɨ̀tènɨ̀.

⁷ Tɨkə te nɨ mbɨ nyaʼa chəb ɨgun əbapɨ əti tɨə nyaʼə yeʼe mbɨ ɨvɨ. Tɨ nyaʼa kɔ mbɨ ɨzeŋɨ zeŋɨ ghɨ̀ ni tɨ mɨ̀Izre neŋ ə ɨfě Mose ɨchî nɨ wɨ nyaʼə teə. Ɨzeŋɨ zeŋɨ we wɨə nyaʼə sɨ̀grə̀ nimə.

⁸ Ɨzeŋɨ zeŋɨ we mɨ nyaʼə te əne, njɨ ka ə̀fàʼì ze nɨ Əzwî ə Zeŋɨ ə nàʼə̀ wa bɨrɨ yeʼe i mbɨ ɨzeŋɨ zeŋɨ nɨə te chè əbɔ ə?

⁹ Ə̀fàʼì ze nɨə zɨ ɨsaʼi ɨgwɨ ə bə̂d mɨ nyaʼa yeʼe mbɨ ɨzeŋɨ zeŋɨ, njɨ əze nɨə yeʼe mbɨ ɨnû nɨ təm kùʼnɨ̀ bɨrɨ yeʼe mbɨ ɨzeŋɨ zeŋɨ nɨ che əbɔ!

¹⁰ À yɨ rəsìʼ ni əghɨ ze nɨ nyaʼa kweʼ berɨ ɨzeŋɨ zeŋɨ fə nimnɨ i ɨzeŋɨ zeŋɨ ɨmbə̀ʼ ɨzeŋɨ zeŋɨ we nɨ che əbɔ.

¹¹ Əghɨ ze nɨ nyaʼə sɨ̀grə̀ nimə mɨ nyaʼa yeʼe mbɨ ɨzeŋɨ zeŋɨ, njɨ əze nɨ ten i ɨghəm mɔʼ fə yeʼe mbɨ ɨzeŋɨ zeŋɨ nɨ che əbɔ!

¹² Ɨchî nɨ tɨ̀ nuŋ ta rɨkɔndɨ ɨgun ənû zɔ̂, tɨ̀ wɨə ghɨ̀ ɨnû mbɨ ɨka fîŋ.

¹³ Chəi əwa ɨghabɨ ə Mose nɨ nyaʼa nɨŋ ngywɨ̌ kubrɨ i ɨfě əŋgu, ɨmbə̀ʼ tɨ mɨ̀Izre zə ə ɨzeŋɨ zeŋɨ we nɨ nyaʼə sɨ̀grə̀ nimə.

¹⁴ Àyɨə fîŋ tɨ mɨ̀mə̌d nyaʼa tu. Ɨ pe rəchɔ̀ŋ, mbɨ mɨ foŋ ə̀ŋwàʼnɨ̀ fɨso ənun, ngywɨ̌ ze zɨə kɨrɨ kənə fîŋ tɨ mɨ̀mə̌d. Àmei ɨmbə̀ʼ ɨchî nɨ bə̂d yeʼ ənɨ ɨfɔtɨ mbɨ Kristo nɨ tɨ̀ mbɨ chɨ̀ ngywɨ̌ ze.

¹⁵ À yɨ rəsìʼ ni ɨ pe rəchɔ̀ŋ, mbɨ mɨ foŋ ə̀ŋwàʼnɨ̀ tɨkə rɨ Mose, ngywɨ̌ zɨə kɨrɨ kənə fîŋ tɨ mɨ̀mə̌d.

¹⁶ Àyɨə wə̀d mɨ bèŋ wo əsɨ Ə̀nùŋɨ̀sɨg, wɨ̀ bɨrɨ chɨ ngywɨ̌ ze.

¹⁷ Tɨ̀nîn Ə̀nùŋɨ̀sɨg yɨ Əzwî ze, əne əsɨ ze nɨ Əzwî Ə̀nùŋɨ̀sɨg ə yeʼ əŋgu, bə̂d mbɨ ənɨ ə ɨghəm.

¹⁸ Mba mɨjìm mbe nɨ chəi ngywɨ̌ kən ta rɨfě, nɨ tɨə zə ɨzeŋɨ zeŋɨ Ə̀nùŋɨ̀sɨg ɨchî nɨ wɨə mèŋnɨ̀ ɨghabɨ ni à yɨ ɨŋga əneŋ ɨfě, fə bèŋ ɨghabɨ əməd ɨchî nɨ tɨə teə wò ɨmbì ɨmbì. Ɨzeŋɨ zeŋɨ we yɨ rɨ əmbɨ Ə̀nùŋɨ̀sɨg we nɨ yeʼ Əzwî.