Rm 3 - Ikan feg

Ŋwiye we ghìyə̀ inug mbe ne wì kàʼi

¹ Icheg ne ze yaʼi ane, chùd ni yaʼ Ju àkə iye? Kə̀ aton ni ŋwed wə̀d gha à ya Ju àkə gha?

² Ane, anug kyen kyen ya gha Ŋwiye ya fə bì nàʼ ìwi ìngam ina mba mə̀Ju.

³ Si ya gha, chəyi bəd mɔ̀ʼɔ abɔ̀ʼ inən mbe fàʼà anug ne mbi beri ni fàʼ abə Ŋwiye. Ane, Ŋwiye wa biri ton ni fàʼ anug ne wì ya fə nɔŋi gha zìye biri fàʼ?

⁴ Indèʼ ka! Icheg ne bəd məjìm ya bəd inug ako, Ŋwiye ya kà fàʼà yaʼ anug ze ne wì ya gha. À ya icheg ne mbi ŋwaʼri inga Àŋwàʼrì Ŋwiye gha, “Àghò mə ghàm, ìwe ìngam mənyìʼ du ane tesiʼ. Chəyi anug ako mɔ̀ʼɔ inga ìwe ìngam.”

⁵ Si ya gha, ze kə mə̀ chwi gha inug mbe ne te ghìyə̀ ne chəyi mbi koʼi imbìghè abə Ŋwiye ya ni ghì gha bəd bara icheg ne Ŋwiye we ghìyə̀ inug ne koʼi ina, tì si ghà àza gha? Tì tì gha chəyi Ŋwiye we ghìyə̀ inug ina ane icheg ne koʼi anyumə̀ ne wì zi ngəʼ igun ina? (Mə ya ghàmà anìŋ icheg wə̀d-aku.)

⁶ Kayi ane ka! Ze kə mə̀ yaʼ gha chəyi Ŋwiye ya sàʼa bəd ane icheg ne koʼi, wì kə si ghùm saʼ isəg iye?

⁷ Ze kə mə̀ chwi gha, à ya ìmbum inug ako ghi gha bəd taŋ kyèri gha Ŋwiye we gha tesiʼ bə̀ se ghùmnə aməd, aton ne məd biri ywìrì zì ngəʼ igun inum icheg wə̀d inug tibɔ̀ŋ àkə gha?

⁸ Bəd mɔ̀ʼɔ mbe ghà gha, “Tì che awa imbìghè ane ìmba inug tibɔ̀ŋ imbə̀ʼ bàd icheg ne Ŋwiye biri chwi fìŋ chɔm igun ina? À ya aton ze ne bəd mɔ̀ʼɔ mbe zɔ̀mbɔ̀ amə gha mo we ghà ane. Ngəʼ kyen kyen biri ghum nyi igun bəd mbe ne ghìyə̀ ane.”

Chəyi wə̀d mɔ̀ʼɔ ne təmi kòʼ imbìghè abə Ŋwiye

⁹ Tì kə ywiri si ghà gha ane inug mbo̰ ijìm? Àkə ane ikuchèg weg ne mba mə̀Ju to bɔ̀ŋ chè bəd ne kayi mə̀Ju? Chəyi ka imbə̀ʼ icheg ne mə nèn gha bəd məjìm mbe aton ika inug tibɔ̀ŋ ne chəyi tì mbi bu, mə̀Ju fɔrɔ bəd ne kayi mə̀Ju.

¹⁰ À ya àzewən ne Àŋwàʼrì Ŋwiye gha gha, “Chəyi wə̀d mɔ̀ʼɔ ne təmi kòʼ imbìghè abə Ŋwiye. Chəyi ka wə̀d mɔ̀ʼɔ imɔʼ.”

¹¹ Chəyi wə̀d mɔ̀ʼɔ ne kyeri anug ne koʼi imbə̀ʼ Ŋwiye. Chəyi wə̀d mɔ̀ʼɔ ne kə̀bə̀ ni kyeri Ŋwiye.

¹² Bəd məjìm fə bə̀ŋì ìtɔb fìŋ to̰ awɔb Ŋwiye. Mbi fə bə̀ŋə̀ ane ati ako. Chəyi ka wə̀d ne fàʼà anug chɔm. Chəyi ka imɔʼ.

¹³ Mbi ya ghàmà tìngam ndɔ̀n. Àzɔb ya məyi ni tambi bəd. Ìngam we ne dùwə̀ inɔb ichug ya icheg iniʼi ni jo nɔmi wə̀d.

¹⁴ Tìngam ne mbe ghàmà ya ìti nwḭ nwḭ fɔrɔ ndɔ̀n ne mbe chà abɔ̀ʼ mə̀mbin ni chìkì awɔb.

¹⁵ Mbɔb ya kə zàmbà ni zweti mə̀mbin.

¹⁶ Isiŋi ijìm ne mbi gho, mbi ya mənyìʼ nɔ̀ŋì aneni ane inug tibɔ̀ŋ. Bəd ya dèghè inɔb ikye ibo.

¹⁷ Chəyi mbɔb mbe bḛ gha àbɔrɔ̀bɔd yaʼ.

¹⁸ Chəyi mbɔb mbe ghìyə̀ anug mɔ̀ʼɔ bɔ Ŋwiye ka.

¹⁹ Ane, tè kyèri gha inug mbe ne mə̀nɔ̀ʼɔ̀ mbe ghà ya abə bəd mbe ne yaʼi aton mə̀nɔ̀ʼɔ̀. À ya ni ghì gha imbə̀ʼ mbi bere awɔb anug ni ghà. Ane, Ŋwiye biri saʼ bəd məjìm mbe ne yaʼi inga isəg.

²⁰ Chəyi wə̀d mɔ̀ʼɔ angu ne təmi kòʼ imbìghè abə Ŋwiye imbə̀ʼ icheg ne we ghìyə̀ inug ne mə̀nɔ̀ʼɔ̀ gha. Mə̀nɔ̀ʼɔ̀ ya ghìyə̀ bəd kyeri gha mbɔb mbe ghìyə̀ inug tibɔ̀ŋ.

Ŋwiye we ghìyə̀ gha bəd təm kòʼ ibo imbìghè anjìm ibḛfiŋ

²¹ Amad anìŋ, Ŋwiye fə chwi icheg ne tì bəd təm kòʼ ibo imbìghè. Chəyi anug ni təm kòʼ ibo imbìghè beri aghi mɔ̀ʼɔ ni ghì tì mə̀nɔ̀ʼɔ̀. Mə̀nɔ̀ʼɔ̀ Muse tì bədkə̀n Ŋwiye ya fə taŋ ghà ane.

²² Ŋwiye fə ghì gha bəd məjìm mbe ne nɔŋi ibḛfiŋ igun Yeso Kristo mbe təm kòʼ ibo imbìghè. Wì ghì ane imbə̀ʼ icheg ne chəyi məd we ghìyə̀ ighə igun bəd.

²³ Aton ya gha, bəd məjìm fə ghì inug tibɔ̀ŋ. Ane, chəyi ywìrè yi ìzḛzḛ njandi njandi Ŋwiye inga inɔb.

²⁴ Ŋwiye fə ghì gha mbe təm kòʼ icheg ne wì bə̀ ghì ìchɔ̀mì inɔb. Ìchɔ̀mì we ya ineʼi ne wì nàʼi inɔb anjìm Yeso Kristo ne wì ya chɔʼi gha wì zeri awɔb.

²⁵ Ŋwiye ya chà aməd icheg aghi àfàtì ina atog ni ghì gha anəm məd so ìmba inug tibɔ̀ŋ. Ane ya anjìm icheg ne tì nɔŋi ìwa ibḛfiŋ igun Yeso. Ŋwiye ya chwi anjìm inyimbifiŋ gha zìye we ghìyə̀ inug ne koʼi imbə̀ʼ icheg ne anyumə̀ ne chəyi wì ya kiri naʼi mə̀nɔ̀ʼɔ̀, chəyi wì ya chə bəd mbe ne yaya bə̀ ghìyə̀ inug tibɔ̀ŋ.

²⁶ Wì ya ghì ane ni chwi ina amad anìŋ gha zìye Ŋwiye, zìye we ghìyə̀ inug ne koʼi. Zìye we ghìyə̀ gha bəd mbe ne nɔŋi ibḛfiŋ igun Yeso Kristo mbe təm kòʼ.

²⁷ Ane, tì kə ywìri kɔ̀m igo ane aghə? Chəyi ywìrè anug mɔ̀ʼɔ ne tì beri ni kɔ̀m igo igun. Ane, aton àkə gha? Àkə imbə̀ʼ icheg ne tì ya zùgrə mə̀nɔ̀ʼɔ̀? Indèʼ ka! À ya imbə̀ʼ icheg ne tì beri ibḛfiŋ igun Yeso.

²⁸ Tè kyèri gha wə̀d ya tə̀mə kòʼò imbìghè abə Ŋwiye ane tengàŋ beri ibḛfiŋ igun Yeso. Kayi imbə̀ʼ icheg ne wì ya ghìyə̀ inug mbe ne yaʼi inga mə̀nɔ̀ʼɔ̀ Muse.

²⁹ Ŋwiye wa kə məyi abə mə̀Ju? Imbə̀ʼ məd ya bə̀ Ŋwiye abə bəd mbe ne kayi mə̀Ju? E! Məd ya bə ìwɔb Ŋwiye.

³⁰ Ŋwiye məyi imɔʼ. Wì biri ghì mə̀Ju təm kòʼ ibo imbìghè anjìm ìwɔb ibḛfiŋ igun Yeso. Wì biri bə ghì bəd mbe ne kayi mə̀Ju bə̀ təm kòʼ ibo imbìghè anjìm ìwɔb ibḛfiŋ igun Yeso bə.

³¹ Àkə ni gha chəyi mə̀nɔ̀ʼɔ̀ Muse ywirì bèrì àfàʼì mɔ̀ʼɔ igun ina imbə̀ʼ icheg ne tì nɔŋi ibḛfiŋ igun Yeso? Indèʼ ka! Tì we kiri niŋə mə̀nɔ̀ʼɔ̀ ane aghi ne beri àzi ati.