Mk 3 - Ikan feg

Yeso ya ghù mbaŋà ne abo məd ya ngapa

¹ Yeso ya ywìrì ghò nyi inga ichamì Ŋwiye. Mbaŋà mɔ̀ʼɔ ya yaʼ angu ne abo məd ya ngapa.

² Bəd mɔ̀ʼɔ yaya bə̀ angu ne yaya nḛ̀ gha Yeso wa biri ghù mbaŋà ze igun aneg àzwètì? Mbi yaya nḛ̀ ane kə̀bə̀ anug mɔ̀ʼɔ ni chè igun zì isaʼi ibo igun atog.

³ Yeso ya ghà abə mbaŋà ze ne abo məd ya ngapa gha, “Nɔ̀ʼɔ yeʼe imbìghè aŋa.”

⁴ Anyumə̀ ne wì ya gha ane, wì ya biri abə bəd mbe gha, “Àkə iku inug weg ne mə̀nɔ̀ʼɔ̀ chwiti gha tì ghiyə igun aneg àzwètì? Àkə ni ghì inug chɔm kə̀ ni ghì inug tibɔ̀ŋ? Anug ne bɔŋi kə ni pumni wə̀d kə̀ ni chə wə̀d?” Bəd mbe ya chim tizi.

⁵ Wì ya nḛ̀ awɔb kad chuʼ, gaŋ, ze bə̀ ywìrì taŋ naʼ ngəʼ ibo imbə̀ʼ icheg ne ìtɔb fìŋ ya tu. Wì ya si ghà abə mbaŋà ze gha, “Sème àze abo.” Wì ya sèmì. Ane, abo məd ya ywìrì sèmbè si yaʼ icheg chɔm.

⁶ Mə̀Farìsi mbe ne ya yaʼi angu ya dù ati ati ghò nyìmi ifeti tì mə̀sə̀ʼ ìmbi Erɔ̀d. Mbi ya nyimi ifeti we ni chuʼri icheg ne mbi biri zwete Yeso.

Inɔ̰ bəd ya beni abɔ̀ʼ Yeso

⁷ Yeso tì ìmbi mə̀mə̀nənùg ya dù ghò iban atəŋ ze a Galìli. Inɔ̰ bəd ne ya yaʼi kwàʼ ìwi kyen yaya bène abɔ̀ʼ məd. Bəd ya bə̀ nɔ̀ʼ a Jùdeyà,

⁸ a Jèrusalèm, a Ìdùmeyà, ane isiŋi mbe ne ya yaʼi injḭ igyi Jodàn bə̀ fɔrɔ inga isiŋi ijìm mbe ne che kad Tayì tì Sidòn. Inɔ̰ bəd we ne ya yaʼi kwàʼ ìwi kyen ya ghò abɔ̀ʼ məd imbə̀ʼ icheg ne mbi ya zug inug mbe ne wì yaya ghìyə̀.

⁹ Icheg ne inɔ̰ bəd we ya taŋ nɔ̀ʼ, Yeso ya ghà abə ìmbi mə̀mə̀nənùg gha mbe tindi abaŋ igyi nɔ̀ŋì ziye nyi inga, nji bəd mbe biri nyə̀m yi.

¹⁰ Wì ya fə ghù bəd nɔʼ nɔʼ. Ane, ze ya ghì gha bəd məjìm mbe ne ya beri ighɔn se zɔ̀ŋɔ̀ ni bètì aməd imbə̀ʼ ìmbɔb ighɔn meghe.

¹¹ Anyumə̀ ne bəd mbe ne izwighi tibɔ̀ŋ ya yaʼi inga inɔb yaya bàrà aməd, mbi ya gùghə̀ aseg ibo imbìghè, kyḛ ane gì ka ka gha, “Àghò ya Ŋwan Ŋwiye!”

¹² Yeso ya taŋ pàti izwighi tibɔ̀ŋ mbe gha imbə̀ʼ mbi nɔ̀ʼ ghì bəd kyeri wə̀d ne ziye yaʼi ìwiwən.

Yeso ya chɔʼ bədtɔm mbe ìghum chɔ̀b ibe

¹³ Yeso ya kɔʼ ikaŋ iwum pè kàrì mbaŋà te ne wì ya kə̀bi, ti ghò abɔ̀ʼ məd.

¹⁴ Wì ya chɔʼ mbaŋà ìghum chɔ̀b ibe, ne wì ya kàri ane bədtɔm. Wì ya chɔʼ awɔb gha mbe yeʼe chughi tì məd bə̀ fɔrɔ ni gha wì biri tɔm awɔb gha mbe se yḛ̀ nè ghàmà Ìngam Ŋwiye.

¹⁵ Wì ya bə̀ nàʼ ika inɔb gha mbe kamni izwighi tibɔ̀ŋ chì inga bəd.

¹⁶ Mbaŋà te ne wì ya chɔʼi yaya: Sayimùn, ne wì ya chùbi aməd ane Pità;

¹⁷ Jem tì Jɔn ne ya ifi məd. Mbɔb ya bɔn ìmbi Zebedì, ne wì ya chùbi awɔb ane Bòyanegès, ane ya gha, bəd gì mbə̀ŋ.

¹⁸ Mbi ndəŋ ya Andrò, tì Filib, tì Bàtòlomìyò, tì Matìyò, tì Tòmas, tì Jem ne ya ŋwan Afòs, tì Tàdiyòs, tì Sayimùn ne mbi yaya kàrà ane Zilɔ̀d.

¹⁹ fɔrɔ Judàs Ikarìyɔ̀d ne ya fḛ Yeso.

Mə̀chwitì mə̀nɔ̀ʼɔ̀ ya gha, à ya Bezebɔ̀b nàʼi ika abə Yeso

²⁰ Anyumə̀ ne Yeso ya bə̀ndì ghò ibo a achan, inɔ̰ bəd ndəŋ ya ghò fète. Ane, chəyi tì məd tì mə̀mə̀nənùg məd ya ywìrì bèrì nyumə̀ ni jəg.

²¹ Anyumə̀ ne inəbi məd ya zughi ane, mbi ya dù ghò ni nəngi aməd imbə̀ʼ icheg ne bəd mbe yaya se gha, “Chəyi atog məd koʼi.”

²² Mə̀chwitì mə̀nɔ̀ʼɔ̀ mɔ̀ʼɔ ne ya nɔ̀ʼi a Jèrusalèm swìʼi ghò a Kàpenàwum ya gha, “Bezebɔ̀b we inga məd. À ya Bezebɔ̀b, ne yaʼ ifɔn abə izwighi tibɔ̀ŋ, nàʼi ika ibo gha wì kamni izwighi tibɔ̀ŋ chì inga bəd.”

²³ Anyumə̀ ne mbi ya gha ane, wì ya kàrì awɔb abɔ̀ʼ məd, ghà inɔb ane ìngam məgri gha, “Sàtàn kə ywìrè kàmà yi zìye chìyè inga bəd iye?

²⁴ Àmə chəyi bəd inga aben afibì yaʼi ane ichug ifibì chəyi aben ze biri təm kà.

²⁵ Àmə chəyi bəd inga inəbi ifibì bə yaʼ ane ichug ifibì, chəyi inəbi we biri bə təm kà.

²⁶ Nəb Sàtàn mə̀ nɔ̀ʼ ghàpà ko zɔ̀ŋ yi zìye, chəyi zì biri təm kà. Ane, nəb məd biri nim.

²⁷ Tesiʼ ya gha, chəyi wə̀d mɔ̀ʼɔ angu ne tì wì nyi inga nəb wə̀d ne beri ika, bèʼì ighi tengàŋ, ne chəyi wì bi kɔd aməd. Wì bèrì ni bi kɔd tengàŋ, bɔŋ se bèʼì ighi məd.

²⁸ Mə gha tesiʼ inən gha, Ŋwiye biri waʼ inug tibɔ̀ŋ ijìm bə̀ waʼ tizɔmbì tijìm te ne bəd zɔ̀mbi aməd.

²⁹ Si ya gha, chəyi wì biri nɔ̀ʼ waʼ inug tibɔ̀ŋ wə̀d ne zɔ̀mbɔ̀ Azwighi Ŋwiye. À ya ane imbə̀ʼ icheg ne tengàŋ fə ghì anug tibɔ̀ŋ ne chəyi Ŋwiye biri nɔ̀ʼ waʼ.”

³⁰ Yeso ya ghà ane imbə̀ʼ icheg ne mbi yaya ghà gha, “Azwighi tibɔ̀ŋ ze inga məd.”

Ngɔb Yeso tì məfi Yeso

³¹ Anyumə̀ ne ngɔb Yeso tì məfi Yeso ya pè, mbi ya təm isəg, tɔm wə̀d gha wì kara aməd.

³² Bəd nɔʼ nɔʼ ya chughi chè kad aməd. Ane, bəd mɔ̀ʼɔ ya ghà ibo gha, “Ìwe ngɔb tì ìmbe məfi fɔrɔ ìte njàbi mbe isəg kə̀bə̀ awe.”

³³ Yeso ya biri inɔb gha, “Ìmə ngɔb tì ìmbum məfi kə mə̀we?”

³⁴ Anyumə̀ ne wì ya biri ane, wì ya nèn bəd mbe ne ya chughi chè kad aməd, ghà inɔb gha, “Mbə̀ nḛ, aŋa ya ìmə ngɔb tì ìmbum məfi mbo̰!

³⁵ Wə̀d ne ghìyə̀ anug ze ne Ŋwiye kə̀bi ya ìmə ifi, tì ìmə njàbi bə̀ fɔrɔ ìmə ngɔb.”