Mə̀Hibrù 9 - Ikan feg

Icheg ne mbe ghùmnə Ŋwiye ikaŋ àbɔ̀ŋɔ fɔrɔ igun isəg

¹ Ikan mbègtog ya bèrì mə̀nɔ̀ʼɔ̀ ne chwìye icheg ne bəd koʼi ni ghumni Ŋwiye. Wì ya bə̀ chwi asiŋi ne koʼi ni ghumni Ŋwiye igun isəg.

² Mbi ya kɔd Azuŋ Ŋwiye ze ghàpì ane ndwi, ze si yaʼ itog ibe. Ighi ne ya yaʼi inga atog nəb mbègtog yaya atən anam fɔrɔ fiŋaŋi. Ngə̀ŋ mə̀kara ne mbi ya nɔŋi ane ngə̀ŋ Ŋwiye ya yaʼ igun fiŋaŋi fe. Mbi yaya kàrà atog nəb azo̰ ane asiŋi ne zḛ mànì.

³ Mbi ya tìŋì ndwi mɔ̀ʼɔ inga mbàn Ŋwiye, zì ghàpì asiŋi ighumni ane iba ibe. Atog nəb ze ne yaʼi anjìm ndwi ze ya mbi yaya kàrà ane asiŋi ne zḛ mànì.

⁴ Ighi ne ya yaʼi inga atog nəb ze anjìm ne zḛ mànì yaya: Ikwijə̀ŋ ìnen Ŋwiye, Tìkub ikan, Fìmbàŋì ìfi Eròn fe ne ya chə̀ʼrə fɔrɔ iba igho ibe mbe ne Ŋwiye ya ŋwàʼri mə̀nɔ̀ʼɔ̀ igun. Ikwijə̀ŋ Ŋwiye we ya mbi ya bɔmi ane gol. Mbi yaya tɔ̰̀ inen igun Ikwijə̀ŋ Ŋwiye we. Tìkub ikan ze ya mbi ya tangi ane ized. Mbi ya nəŋ Tìkub ikan ze ajìm ane gol. Izweʼi ne mbi ya bɔmi ane gol ya yaʼ inga Tìkub ikan ze. Manà ya yaʼ inga izweʼi we.

⁵ Mə̀cherùb ya sèmbì ìtɔb tibabì igun Tìkub ze ni chwi gha Ŋwiye we angu. Aŋa ya asiŋi ne Ŋwiye yaya sò inug tibɔ̀ŋ bəd. Chəyi tì tì taŋ tòʼrì inug mbo̰ ijìm amad anìŋ.

⁶ Anyumə̀ ne mbi ya fə chuʼri inug mbo̰ anìŋ, bəd mbàn yaya kà nyḭ̀yḛ inga atog nəb mbègtog ni fàʼ ìmbɔb ìfàʼì.

⁷ Si ya gha, à ya məyi atog wə̀d igun bəd mbàn ne tì wì nyi pè inga atog nəb ze anjìm. Wì yaya nyḭ̀yḛ inga məyi ighə̀m imɔʼ igun fituʼ. Chəyi we nyḭ̀yḛ inga ne chəyi anəm ne wì biri chəmni ane inug tibɔ̀ŋ məd fɔrɔ ane inug tibɔ̀ŋ bəd ndəŋ ne mbi ghi abəŋ.

⁸ Azwighi Ŋwiye ze chwìye ane inug mbo̰ gha chəyi mbi ya kiri fiʼi inɔnjì ni nyi inga asiŋi ne zḛ mànì imbə̀ʼ icheg ne mbi yaya kiri ghùmnə Ŋwiye inga Azuŋ Ŋwiye mbègtog.

⁹ Anug azo̰ ya tòʼrò abə bəd inga nyùmə̀ gho̰ amad anìŋ gha, chəyi ighi àfàtì mbe ne mbi yaya nàʼà ya beri ika ni sò inug tibɔ̀ŋ abə bəd mbe ne yaya ghùmnə Ŋwiye inga mbàn Ŋwiye ni gha mbe zen mànì.

¹⁰ Ighi mbo̰ ya bèrì məyi anug ni jəg tì anug ni no, fɔrɔ inug imbə̀ʼ icheg ni sò nyɔd icheg ne mə̀nɔ̀ʼɔ̀ Muse chwi. Tikə ìto̰ ya yaʼ anene pè ane nyùmə̀ we ne Ŋwiye ya kɔpi inug, si nɔ̀ŋì nɔ̀ʼɔ̀ feg.

¹¹ Kristo ya yèʼe icheg atog wə̀d igun bəd mbàn Ŋwiye igun ighi chɔm mbe ne fə yaʼi. Azuŋ ze ne məd ya nyi inga ya àze ne beri ati chè azin bə̀ təm kòʼ, ne kayi bəd ya tangi; ne kayi bə̀ abɔ̀ʼ ighi mbe ne Ŋwiye ya tangi igun isəg gho̰.

¹² Ane, chəyi Yeso ya nyi inga asiŋi ne zḛ mànì inga mbàn Ŋwiye tì anəm gwi fɔrɔ anəm pɔ̀ŋ. Wì ya tùtì yaʼ àzi tì anəm ni zeri bəd məjìm ane ighə̀m imɔʼ.

¹³ Mbi yaya nìŋə anəm pɔ̀ŋ tì anəm gwi fɔrɔ aburi ne mbi tɔ̰ ŋwan nyam sàpa igun bəd inug tibɔ̀ŋ. Ane, mbi yaya sò məyi nyɔd abə bəd.

¹⁴ Ane ya gha, anəm Kristo ze ne Azwighi Ŋwiye ze ne yaʼi ane ighə̀m imɔʼ, ze ya ghi wì tutì ni sò ìmba inug tibɔ̀ŋ ne chəyi məd ya gùghi anug, ze bèrì ika ni chì awa inga inug mbe ne ghìyə̀ iwu yèʼe igun ina. Ze bə̀ bèrì ika ni ghì gha tì ya fàʼà abə Ŋwiye we ne yaʼi izɔm.

¹⁵ Ane, Kristo ya wə̀d ne wàri ikan feg ni gha bəd mbe ne Ŋwiye kàri awɔb mbe tì mbi jəg ighi mbe ne Ŋwiye ya kàʼi ane ighə̀m imɔʼ. Ane ya imbə̀ʼ icheg ne, Kristo fə sɔ̀ŋì àze atog ku ne zeri bəd mbe ne yaya ghìyə̀ inug tibɔ̀ŋ inga ikan anun.

¹⁶ Mbi ya mənyìʼ chwi aneni gha wə̀d fə ku bɔŋ itə məd we se bèrè ika.

¹⁷ Aton ya gha, itə wə̀d ya bèrè ika məyi anyumə̀ ne tengàŋ fə ku, kayi anyumə̀ ne wì kiri biri izɔm.

¹⁸ À ya aton ne ikan mbègtog yaya bèrè ika məyi anyumə̀ ne mbi tuti anəm.

¹⁹ Anyumə̀ ne Muse ya fə mə̀tì mə̀nɔ̀ʼɔ̀ ijìm mbe ne yaʼi inga Àŋwàʼrì Ŋwiye abə bəd məjìm, wì ya niŋ anəm pɔ̀ŋ fɔrɔ anəm gwi nyàmbì inga mənib. Wì ya pà tìtab azed mɔ̀ʼɔ ne mbe kàrà ane hisɔ̀b, nib ndwi bàghi igun, chùb inga anəm ze, si nwìndì igun Àŋwàʼrì Ŋwiye fɔrɔ igun bəd məjìm.

²⁰ Wì ya gha, “Aŋa ya anəm ne Ŋwiye wàri ikan we ne wì gha inən gha mbə̀ se nɔ̀ŋɔ̀.”

²¹ À ya bə̀ ane ne Muse ya nwìndi anəm igun Azuŋ Ŋwiye fɔrɔ igun ighi ijìm mbe ne mbi yaya ghùmnə Ŋwiye inga.

²² Kwàʼ tesiʼ, mə̀nɔ̀ʼɔ̀ chwi gha mbi ya mənyìʼ tùtì anəm nyam ni sò inug tibɔ̀ŋ ijìm. À ya ane imbə̀ʼ icheg ne chəyi tì Ŋwiye waʼ inug tibɔ̀ŋ bəd ne chəyi mbi tuti anəm aseg.

Yeso ku icheg aghi àfàtì ni chì inug tibɔ̀ŋ bəd

²³ Ze ya kòʼ gha mbe so ighi mbe ne fugri ighi ne yaʼ ikaŋ àbɔ̀ŋɔ ane ighi àfàtì mbo̰. Àsi ighi mbe ne yaʼi ikaŋ àbɔ̀ŋɔ, ze bɔ̀ŋ ni sò ane ighi àfàtì ne bɔŋi chè.

²⁴ Aton ya gha, chəyi Kristo ya nyi inga asiŋi ze ne zḛ mànì inga mbàn Ŋwiye ne mbi tangi ane ibo, ne ya afugri ane ighi mbe ne yaʼi ikaŋ àbɔ̀ŋɔ. Wì ya nyi kwàʼ ikaŋ àbɔ̀ŋɔ si təm imbìghè abə Ŋwiye atog ina.

²⁵ Atog wə̀d igun bəd mbàn Ŋwiye yaya nyḭ̀yḛ inga asiŋi ne zḛ mànì ighə̀m imɔʼ igun fituʼ tì anəm nyam. Àsi Yeso, chəyi wì ya nyi ikaŋ àbɔ̀ŋɔ aghəm nɔʼ nɔʼ ni nàʼ ìwi nyɔd ane aghi àfàtì.

²⁶ Àkə aghi ne wì ya nyi aghəm nɔʼ nɔʼ, nji wì ya bə̀ zə̰ ngəʼ aghəm nɔʼ nɔʼ ni ko ane nyùmə̀ ne Ŋwiye ya tangi isəg. Wì fə yeʼe ighəm imɔʼ ane nyùmə̀ isəg we ne se nwḭ̀yḛ̀ nàʼ ìwi nyɔd ane aghi àfàtì imbə̀ʼ sò inug tibɔ̀ŋ bəd məjìm inga nyùmə̀ isəg ijìm.

²⁷ À ya icheg ne ze bə yaʼ gha, wə̀d ijìm mənyìʼ ku ighə̀m imɔʼ, si təm imbìghè abə Ŋwiye ane isaʼi, Ŋwiye saʼ aməd.

²⁸ À ya bə̀ icheg ne Kristo ya nàʼi ìwi nyɔd ighə̀m imɔʼ ane aghi àfàtì ni sò inug tibɔ̀ŋ abə bəd nɔʼ nɔʼ. Ane, Wì biri ywìri yèʼe ni pumni bəd mbe ne ghɔ̀mɔ̀ aməd, kayi ni ghì gha Ŋwiye sò inug tibɔ̀ŋ bəd.