Mə̀Hibrù 4 - Ikan feg

Àzwètì ze ne Ŋwiye ya kàʼi abə ìmbi bəd

¹ Icheg ne anug ze ne Ŋwiye ya kàʼi ni nàʼ àzwètì abə ìmbi bəd, ze kiri təm, tì niŋ nyumə̀ imbə̀ʼ wə̀d mɔ̀ʼɔ nɔ̀ʼ sam.

² Ikən chɔm we ne tì ya zughi, bəd mbègtog ya bə̀ zug. Mbɔb ya jiʼì zug ane, si ya gha, chəyi wi ya wèti awɔb imbə̀ʼ icheg ne mbi ya zug chəyi mbi si bḛ.

³ À ya məyi mba mbe ne bḛ ikən we ne tì biri bèrì àzwètì ze icheg ne Ŋwiye ya kàʼi. Àsi abə mə̀mbin, Ŋwiye ya ghà gha, “Anjìm àmə agaŋ, mə̀ ya zɔ̀m gha, ‹chəyi mbɔb biri nɔ̀ʼ bèrì àzwètì ze ne mə nàʼà.›” Wì yaya ghàmà ane ne wì ya fə màni àze àfàʼì ni tangi isəg.

⁴ Ŋwiye ghà inga asiŋi mɔ̀ʼɔ inga àŋwàʼrì məd imbə̀ʼ aneg ze ne yaʼi aneg ne pè ìsàmbe gha, “Anyumə̀ ne Ŋwiye ya màni àze àfàʼì, wì ya zwètì igun aneg ne pè ane ìsàmbe.”

⁵ Ŋwiye ya fə bə̀ ywìrì ghàm imbə̀ʼ anug azo̰ gha, “Chəyi mbɔb biri nɔ̀ʼ nyi inga asiŋi àzwètì ze ne mə̀ ya nàʼi inɔb.”

⁶ Anug ze ze kiri chwiyè gha bəd mɔ̀ʼɔ biri nyi inga asiŋi àzwètì ze, ne bəd mbègtog mbe ne ya zughi ikən gho̰ ya sami ni nyi inga imbə̀ʼ icheg ne mbi ya ghì tìzughə̀ abə Ŋwiye.

⁷ Icheg ne ze yaʼi ane, Ŋwiye ya nɔ̀ŋì nyumə̀ ndəŋ abə bəd ni nyi inga asiŋi àzwètì məd. Nyùmə̀ we ya amad anìŋ. Ŋwiye ya ghum chè anjìm Ifɔn Dèvid ni ghà ikən we icheg ne ìngam məd fə tòʼrì ina gha, “Tèchɔ̀ŋ, àghò mə zug Ìngam Ŋwiye, imbə̀ʼ àghò ghiyə awe tìkafiŋ.”

⁸ Àkə aghi ne Joswà ya niŋi awɔb nyi inga asiŋi àzwètì ze, nji chəyi Ŋwiye ya ywirì ghà gha aneg àzwètì ndəŋ ze kiri yeʼe.

⁹ Ane, àzwètì ndəŋ icha ze kiri angu abə bəd Ŋwiye.

¹⁰ Wə̀d ijìm ne beri àzwètì ze ne Ŋwiye we nàʼà, wì biri bə zwètì fɔrɔ ane ìmbi ìfàʼì kwàʼ icheg ne Ŋwiye ya bə zwètì anyumə̀ ne wì ya màni ni tangi isəg.

¹¹ Ane, tì kirə ika ni nyi inga asiŋi àzwètì ze ne Ŋwiye we nàʼà abə bəd məd, ni gha imbə̀ʼ wə̀d mɔ̀ʼɔ nɔ̀ʼ ghì tìzughə icheg ne ìmba mə̀mbaʼ aneg ya ghi tìzughə̀ abə Ŋwiye si sam àzwètì ze.

¹² Aton ya gha, Ìngam Ŋwiye bèrì ika ni fàʼ inug mbe ne Ŋwiye we kə̀bə̀. Ìngam Ŋwiye bèrì ika. Wi ya bə̀ tɔ iba ijìm icheg ibeg ibid. Wi ya mə̀ zùm wə̀d, wì ya ghàpà nyàmnyɔd tì azwighi bə̀ ghàpà iwu tì isɔŋ. Wi bə̀ taŋ bèrì ika ni kyeri inug mbe ne bəd mbe kɔ̀ndɔ bə̀ kyèri inug mbe ne yaʼi inga fìŋ abə bəd.

¹³ Chəyi aghi mɔ̀ʼɔ igun isəg ne chəyi tì Ŋwiye bad. Ighi ijìm ya asaŋ imbìghè abə Ŋwiye we ne tì biri təm ibo imbìghè ni mə̀tì inug ijìm mbe ne tì yaya fàʼà.

Yeso ya atog wə̀d igun bəd mbàn Ŋwiye

¹⁴ Tì taŋ nyìmi ìwa ibḛfiŋ we ne tì zi igun Yeso. Məd ya atog wə̀d igun bəd mbàn Ŋwiye ne beri ighumni kyen. Məd ya Yeso, Ŋwan Ŋwiye. Wì fə ghò ikaŋ àbɔ̀ŋɔ.

¹⁵ Tè bèrì atog wə̀d kyen igun bəd mbàn Ŋwiye ne tì wì sɔmnɔ̀ igun ina anyumə̀ ne te bɔ̀rɔ ane ìwa ibḛfiŋ igun Ŋwiye. À ya ane imbə̀ʼ icheg ne Sàtàn ya kwàʼrì aməd ane mənɔnjì nɔʼ nɔʼ icheg ne Sàtàn we bə̀ kwàʼrà awa, si ya gha, chəyi wì ya gùghi anug.

¹⁶ Ane, tì taŋ bḛ Ŋwiye icheg chɔm, ghò ibo imbìghè, məd we ne ghìyə̀ ìchɔ̀mì ina. Tì mə ghì ane, məd biri bèrì àsɔ̀mnəfiŋ igun ina bə̀ ghì ìchɔ̀mì ina mà nyumə̀ ijìm ne te kə̀bə̀.