Mə̀Hibrù 3 - Ikan feg

Yeso bèrì ighumni chè Muse

¹ Ane, ìmbum məfi fɔrɔ ìtum njàbi ne tì yaʼi ane anug amɔʼ tì Anɔŋisəg, mbə̀ nɔŋɔ ìtən tikɔndi igun Yeso we ne te gha tè zì ibḛfiŋ igun məd. Yeso gho̰ ya wə̀dtɔm Ŋwiye bə̀ yaʼ atog wə̀d igun bəd mbàn Ŋwiye.

² Məd ya zugri Ŋwiye ane ìzi fìŋ ijìm, fàʼ inug ijìm mbe ne Ŋwiye ya gha ibo gha wì faʼa kwàʼ icheg ne Muse ya bə̀ fàʼ inug ijìm mbe ne Ŋwiye ya bə ghà ibo gha wì faʼa inga nəb Ŋwiye ane ìzi fìŋ ijìm.

³ Yeso bèrì ighumni kyen chè Muse kwàʼ icheg ne wə̀d ne beri nəb bə̀ bèrì ighumni chè nəb.

⁴ Nəb ijìm ya wə̀d we kɔ̀rɔ. Si ya gha, à ya Ŋwiye we nàʼà ika abə bəd ni fàʼ inug ijìm.

⁵ Muse ya yaʼ wə̀d àfàʼì Ŋwiye ne ya fàʼi inug ijìm inga nəb Ŋwiye ane ìzi fìŋ ijìm. Ŋwiye ya fə ghì Muse ghàm imbə̀ʼ inug mbe ne Ŋwiye ya nɔŋi ni ghum ghà.

⁶ Àsi Kristo ya Ŋwan Ŋwiye ne fàʼi inug ijìm abə bəd Ŋwiye kwàʼ ane ìzi fìŋ ijìm icheg ne Ŋwiye kə̀bi. Tì mə chè imbìghè ni nyimbi fìŋ bə̀ chè imbìghè ni kɔ̀m igo imbə̀ʼ ikɔndi chɔm we ne tì nɔŋi igun Ŋwiye, ane ya gha mba ya bəd Ŋwiye.

Wə̀d ne chəyi wì bḛ Ìngam Ŋwiye wì pata yi

⁷ Azwighi Ŋwiye gha, “Tèchɔ̀ŋ, àghò mə zug Ìngam Ŋwiye,

⁸ imbə̀ʼ àghò ghiyə awe tìkafiŋ icheg ne ìmbən mə̀mbaʼ aneg ya ghi. Ìmbən mə̀mbaʼ ya ghì tìzughə̀ abə Ŋwiye anyumə̀ we ne mbi ya zweʼri Ŋwiye inga ibad zɔbi.

⁹ Ìmbən mə̀mbaʼ aneg ya zweʼri mə inga ibad zɔbi tì abɔ̀ʼ icheg ne mbɔb ya bàd inug mbe ne mə̀ ya fàʼi ane tituʼ ìghum ikwè.

¹⁰ Ane, mə̀ ya gaŋ abə ikəri bəd we, si gha, ‹Mbɔb mbe kà fèbè. Chəyi mbɔb mbe kə̀bə̀ ni fàʼ inug icheg ne mə gha inɔb.›

¹¹ Mə ya gaŋ si zɔ̀m gha, ‹Chəyi mbɔb biri nɔ̀ʼ nyi inga asiŋi àzwètì ze ne mə̀ ya nàʼi inɔb.› ”

¹² Ìmbum məfi fɔrɔ ìtum njàbi, mbə̀ pati awən gha imbə̀ʼ wə̀d mɔ̀ʼɔ abɔ̀ʼ inən nɔ̀ʼ bèrì fìŋ tibɔ̀ŋ ne chəyi ze bḛ Ŋwiye, ane ghì mbə sàŋì Ŋwiye we ne yaʼi izɔm.

¹³ Ane, Tèchɔ̀ŋ, mbə̀ ya nə̀rə ìtən fiŋ mbə̰ mbə̰ ineg ijìm. Mbə̀ ghiyə ane ni gha chəyi anug tibɔ̀ŋ mɔ̀ʼɔ biri tambi awən si ghì ìtən fìŋ tu.

¹⁴ Mba mə̀ taŋ nyìmi anug ze ne tì ya fə bḛ ghò pè ane aneg ìnwḭ, nji tì biri yaʼ ane anug amɔʼ tì Kristo.

¹⁵ Àŋwàʼrì Ŋwiye ghà gha, “Tèchɔ̀ŋ, àghò mə zug Ìngam Ŋwiye, imbə̀ʼ àghò ghiyə awe tìkafiŋ icheg ne ìmbən mə̀mbaʼ aneg ya ghi.”

¹⁶ Bəd ne ya zughi Ìngam Ŋwiye bə̀ kiri ghi tìkafiŋ àkə mə̀we? Imbə̀ʼ à ya bəd məjìm mbe ne Muse ya niŋi awɔb dù inga Ijìb?

¹⁷ Bəd ne Ŋwiye ya gaŋi inɔb ane tituʼ ìghum ikwè kə mə̀we? Imbə̀ʼ à ya bəd mbe ne ya ghi inug tibɔ̀ŋ, ku, ìmbɔb iwu bə̀ tḛ inga ibad zɔbi?

¹⁸ Bəd ne Ŋwiye ya ghum zɔ̀m, ghà inɔb gha, chəyi mbi biri nɔ̀ʼ nyi inga asiŋi ze ne Ŋwiye biri nàʼ àzwètì inɔb àkə mə̀we? Imbə̀ʼ à ya bəd mbe ne ya ghi tìzughə̀ ibo?

¹⁹ Ane, tè bàd gha chəyi tì mbɔb ya nyi inga asiŋi àzwètì ze imbə̀ʼ icheg ne chəyi mbi ya bḛ Ŋwiye.