Mə̀Hibrù 2 - Ikan feg

Inug ne bəd beri ni nyimi

¹ Ze bɔ̀ŋ gha tì mənyìʼ zì atog taŋ nyìmi inug ijìm mbe ne tì ya zughi ni gha imbə̀ʼ tì nɔ̀ʼ sàŋì se fàʼà yaʼ ìmbi ndəŋ.

² Ikən we ne mbè angirə̀ ya ghum ghà abə ìmba mə̀mbaʼ kyen mbe te aneg ya chwi gha à ya kwàʼ ikən tesiʼ. Ane, wə̀d ijìm ne chəyi wì ya fàʼi inug icheg ne wi ya gha, tengaŋ ya nyi inga ngəʼ ne koʼi tì tìzughə̀ məd.

³ Tì kə mə̀ waʼ anug kyen azo̰ ne Ŋwiye ghà gha zìye biri pumni awa, tì kə ghum si nòrò abə ngəʼ iye? Anug kyen azo̰ imbə̀ʼ icheg ne Ŋwiye biri pumni awa ya Anɔŋisəg ya fə bì ghà kwàʼ zìye zìye. Bəd mbe ne ya zughi kwàʼ ibo ichug, à ya mbɔb ya gha ina ghì tì kyèri gha à ya kwàʼ anug tesiʼ.

⁴ Ŋwiye zìye ini ya chwi ineni nɔʼ nɔʼ bə̀ fàʼ iyeti inug kyen kyen ni chwi gha inug ijìm mbe ne mbɔb yaya ghà ya tesiʼ. Ane, Azwighi Ŋwiye yaya bə̀ ghàpà tineʼi abə bəd icheg ne Ŋwiye kɔ̀ŋi.

Wə̀d we ne chwìye icheg ni pum ina

⁵ Chəyi Ŋwiye nɔ̀ŋì isəg feg gho̰ ne te ghàmà imbə̀ʼ ìwiwən gha mbè angirə̀ be tùmbə̀.

⁶ Àŋwàʼrì Ŋwiye ze bìre inga asiŋi mɔ̀ʼɔ gha, “Wə̀d-aku kə aghə ne àghò nɔŋi atog igun məd; Kə̀ wə̀d-aku kə we ne àghò we nèghè məd?

⁷ Àghò ghì wə̀d-aku beri ati ne to kə chè àzi mbè angirə̀ ane iki nyumə̀, si ghì wì beri ighumni fɔrɔ ika

⁸ ni tùmbì ighi ijìm.” Ane, Ŋwiye ya nàʼ ika ibo ni tùmbì ighi ijìm ne chəyi wì chi àze mɔ̀ʼɔ ka. Si ya gha, amad anìŋ, chəyi te bàrà gha məd we tùmbə̀ ighi ijìm.

⁹ Tì we bàrà Yeso ne Ŋwiye ghì wì beri ìzḛzḛ fɔrɔ ighumni. Si ya gha, Ŋwiye ya ghì wì beri ati ne to kə chè àzi mbè angirə̀ ane iki nyumə̀ ni gha anjìm àsɔ̀mnəfiŋ Ŋwiye wì zə̰ ngəʼ ane iki nyumə̀ bə̀ ku atog abə bəd məjìm.

¹⁰ Ze ya kòʼi abə Ŋwiye we ne ya tangi ighi ijìm, ne bə̀ nɔ̀ŋɔ̀ ighi ijìm, gha Yeso bɔŋɔ mànì anjìm ngəʼ ne wì ya zə̰. Ŋwiye ya ghì ane ni niŋ bəd ndan ndàn mbi si yaʼ inga ìzḛzḛ ne njàndi njandi tì məd. Yeso ya wə̀d we ne pùmnə awɔb.

¹¹ Ane, Yeso we ne ghìyə̀ bəd zḛ, məd tì bəd mbe ne məd fə ghi mbi zen, mbɔb məjìm ya se bɔn ane mbaʼ fìbì. À ya aton ne chəyi Yeso ya bèrè tìnìrètog ni kàrì awɔb ane ìmbi məfi fɔrɔ ìti njàbi.

¹² Yeso ya ghà abə Ŋwiye gha, “Mə biri ghì ìmbum məfi kyeri ìfàʼì chɔm mbe ne àghò fàʼi. Mə biri bə zəʼ ikyeg, ghùmni awe inga ifeti ìmbe bəd.”

¹³ Wì ywìrì gha, “Mə biri zì ìmə ibḛfiŋ igun Ŋwiye.” Wì ya bə̀ ywìrì gha, “Nḛ, mo gho̰ tì bɔn mbe ne Ŋwiye nàʼi inum.”

¹⁴ Ane, icheg ne bɔn mbe ya bəd-aku, məd zìye ya bə̀ bə̀ŋə̀ si yaʼ wə̀d tì nyàmnyɔd icheg inɔb. Wì ya ghì ane imbə̀ʼ icheg ne à ya anjìm iwu we ne məd ku ne wì chi ika wə̀d ìpàb igun iwu. Wə̀d ìpàb we ya Debrə̀.

¹⁵ Ane, wì biri pumni bəd mbe ne yaya chùghə icheg məfeg anjìm icheg ne mbi yaya bɔ iwu.

¹⁶ Ze dù zen gha kayi mbè angirə̀ ne məd we wètè. Wì ya wètè yaʼ bɔn ne du inga aghaŋ inəbi àzi Abràham.

¹⁷ À ya aton ne wì ya kòʼi ni yaʼ icheg məfi fɔrɔ njàbi məd ane inug ijìm, ni gha wì biri yaʼ atog wə̀d igun bəd mbàn Ŋwiye ne fàʼà abə Ŋwiye ane ìzi fìŋ ijìm, bə̀ bèrè àsɔ̀mnəfiŋ igun bəd, si nàʼ ìwi nyɔd ane aghi àfàtì ni ghì gha Ŋwiye waʼ inug tibɔ̀ŋ bəd.

¹⁸ Məd we tì wì wèti bəd mbe ne Sàtàn we kwàʼrà awɔb imbə̀ʼ icheg ne məd ini ya bə̀ zə̰ ngəʼ anyumə̀ ne Sàtàn ya kwàʼri aməd.