Kòlosè 3 - Ikan feg

Anug ni nɔ̀ŋì fìŋ igun ighi mbe ne yaʼi ikaŋ àbɔ̀ŋɔ

¹ Icheg ne Ŋwiye fə zwemni awən ane iwu tì Kristo, mbə̀ si nɔ̀ŋì ìtən fìŋ igun ighi mbe ne yaʼi ikaŋ àbɔ̀ŋɔ, igun asiŋi ne Kristo chughi angu aba abo jəghi Ŋwiye.

² Mbə̀ nɔŋɔ ìtən tikɔndi məyi igun ighi mbe ne yaʼi ikaŋ àbɔ̀ŋɔ, kayi igun ighi mbe ne yaʼi igun isəg.

³ Mbə̀ nɔŋɔ ikɔndi ane imbə̀ʼ icheg ne mbə̰ ya fə ku abə ighi igun isəg. Si ya gha, Ŋwiye fə nə̀m ìwən ìtḛ̀ ikye abo abə Kristo.

⁴ Ìwən ìtḛ̀ tesiʼ ya ìtḛ̀ ìwi Kristo. Ane, anyumə̀ ne məd biri yeʼe inga ighumni kyen məd, mbə̰ inən biri bə yaʼ inga ighumni kyen we.

Ikuchèg anun tì ikuchèg feg

⁵ Mbə̀ waʼ tikɔndi te ne mbə̀ beri imbə̀ʼ ighi igun isəg ne ìtən nyàmnyɔd te ghə̀ʼrə̀. Inug mbe ya: anug ni nɔ̀kì mbaŋà kə̀ nɔ̀kì mə̀yi abu abu fɔrɔ izṵ inug, tì anug ni ghə̀ʼrì ighi, tì tikɔndi imbə̀ʼ inug tibɔ̀ŋ fɔrɔ adɔʼ. Wə̀d ne ghə̀ʼrə̀ ighi igun isəg ya kwàʼ icheg wə̀d ne ghùmnə mə̀ŋwiye ako.

⁶ À ya imbə̀ʼ tiku inug ìto̰ ne Ŋwiye biri gaŋ zì ngəʼ igun bəd mbe ne chəyi mbe zùgrə aməd.

⁷ À ya yaʼ mbègtog, mbə̰ yaya bə̀ ghìyə̀ inug icheg bəd mbe nè kɔ̀ndɔ gha à ya ikuchèg chɔm.

⁸ Àsi amad anìŋ, mbəʼ mənyìʼ waʼ tiku inug te. Inug mbe ya inug icheg: agaŋ tì iswḛ fɔrɔ adɔʼ. Imbə̀ʼ mbə̰ ya chìkə̀ awən tikum bəd. Imbə̀ʼ mbə̰ bə bḛ awən gha ìngam zu zu duwə inən ichug.

⁹ Icheg ne mbə̀ fə waʼi ìwən ikuchèg anun we ne yaya tḭ̀yḛ̀ awən mbə ghìyə̀ inug mbe ne ìtən nyàmnyɔd te ghə̀ʼrə̀, imbə̀ʼ mbə̰ ya ghàmà awən inug ako igun mə̀mbin.

¹⁰ Amad anìŋ, mbə̰ fə bèrì ikuchèg feg. À ya Ŋwiye ya nàʼi ikuchèg feg gho̰ ni gha mbə̀ taŋ kyèri aməd we ne ghi mbə bèrì ikuchèg feg we.

¹¹ Ane, mbə̰ ya si bəd imɔʼ amad anìŋ. Chəyi ywìrè yi icha mɔ̀ʼɔ ane mə̀Ju tì bəd ne kayi mə̀Ju, kə̀ ane bəd ne mbi ŋweri tì bəd ne chəyi mbi ŋweri. Chəyi ywìrè yi wə̀d mɔ̀ʼɔ ne tì mbi kàrì ane wə̀dnàb kə̀ wə̀d ne yaʼi izimi. Chəyi ywìrè yi ifeg kə̀ wə̀d ne yaʼi yi ane ìwi ighəm. Tiku bəd ìto̰ tijìm ya se ane anug amɔʼ icheg ne mbi yaʼi ane ifɔti tì Kristo imbə̀ʼ icheg ne à ya məd beri aku bəd azo̰ ajìm.

¹² Mbə̰ ya si bəd Ŋwiye. Wì ya kɔ̀ŋ awən, chɔʼ awən ane ìmbi bəd. Ane, mbə̀ ya bèrè àsɔ̀mnəfiŋ bə̀ ya ghìyə̀ ìchɔ̀mì abə bəd. Mbə̀ ya swìye ìwən nyɔd aseg, bə̀ ya ghìyə̀ inug ane àbɔrɔ̀bɔd bə̀ ya bèrè inyimbifiŋ.

¹³ Mbə̀ ya nyìmbe fìŋ tì bəd bə̀ wàʼa inug tibɔ̀ŋ mbe ne bəd gughi inən. Mbə̀ waʼ inug tibɔ̀ŋ bəd icheg ne Anɔŋisəg ya fə bi waʼ ìmbən tì inug tibɔ̀ŋ.

¹⁴ Anug kyen igun inug mbo̰ ijìm ya gha, mbə̀ ya kɔ̀ŋɔ̀ bəd məjìm imbə̀ʼ icheg ne à ya àkɔ̀ŋì ze nyìme inug ijìm ane mbi imɔʼ.

¹⁵ Mbə̀ saŋa àbɔrɔ̀bɔd ze ne Kristo nàʼi inən ze tumbə ìtən fìŋ. À ya imbə̀ʼ àbɔrɔ̀bɔd ze ne Ŋwiye ya kàri awən gha mbə̀ yaʼ ane ifɔti inga nyàmnyɔd imɔʼ. Mbə̀ ya nàʼà məyakà ibo mà nyumə̀ ijìm.

¹⁶ Mbə̀ taŋ nyìmi ìngam Kristo inga ìtən fìŋ kwàʼ icheg chɔm. Mbə̀ ya chwìte ìngam we abə bəd bə̀ kə awən mbə̰ mbə̰ ane iwe we ne Ŋwiye nàʼi inən. Mbə̀ ya ghìyə̀ ane ane tikyèg te ne du inga Àŋwàʼrì Ŋwiye tì tikyèg te ne bəd mbe zə̀ʼə̀ ne ghùmnə Ŋwiye fɔrɔ tikyèg te ne Azwighi Ŋwiye ze nàʼà. Mbə̀ ya zə̀ʼə̀ ane, nàʼà məyakà abə Ŋwiye.

¹⁷ Inga ìmbən inug ijìm, kə̀ mbə̰ kə ghàmà kə̀ fàʼà, mbə̀ ya ghìyə̀ inug ijìm məyi ane ikum Anɔŋisəg Yeso. Mbə̀ ya ghìyə̀ ane chè anjìm Anɔŋisəg Yeso nàʼà məyakà abə Ŋwiye ne yaʼi Mbaʼ ne ghi mbə yaʼ ane ifɔti tì məd.

Ikuchèg bəd Kristo

¹⁸ Mbə̰ mə̀yi, mbə̀ swi ìwən nyɔd aseg abə ìmbən mənɔm imbə̀ʼ icheg ne à ya aghi ne Anɔŋisəg kə̀bi gha mbə̀ faʼa.

¹⁹ Mbə̰ mənɔm, mbə̀ ya kɔ̀ŋɔ̀ ìmbən mə̀yi. Imbə̀ʼ mbə̰ ya ghàmà tɔ awən inɔb.

²⁰ Mbə̰ bɔn, mbə̀ ya zùgrə ìmbən mə̀mbaʼ fɔrɔ ìmbən mbì ngɔb kwàʼ ane inug ijìm imbə̀ʼ icheg ne à ya ikuchèg ne Anɔŋisəg kə̀bi gha mbə̀ bere.

²¹ Mbə̰ mə̀mbaʼ tì mbì ngɔb, imbə̀ʼ mbə̰ swètè awən ìmbən bɔn ka, nji mbi biri ya pɔ̀mbɔ̀.

²² Mbə̰ məfeg, mbə̀ ya zùgrə bəd mbe ne mbə̰ mbe fàʼà inɔb igun isəg kwàʼ ane inug ijìm. Imbə̀ʼ mbə̰ ya zùgrə awən awɔb məyi anyumə̀ ne mbɔb mbe nḛ̀ awən imbə̀ʼ icheg ne mbə̰ mbe kə̀bə̀ gha mbɔb ya gyḛ̀ awən. Mbə̀ ya zùgrə awɔb kwàʼ ane fìŋ zḛ zḛ imbə̀ʼ icheg ne à ya ighumni ne mbə̰ mbe nàʼà abə Anɔŋisəg.

²³ Kə̀ àzən àfàʼì kə aghə, mbə̀ ya fàʼà ane fìŋ ifibì. Mbə̀ niŋ gha mbə̰ ya fàʼà abə Anɔŋisəg, kayi abə wə̀d.

²⁴ Mbə̀ ya fàʼà ane imbə̀ʼ icheg ne mbə̰ kyèri gha Anɔŋisəg bèrì chùd ne wì biri nàʼ abə bəd məd. À ya Anɔŋisəg Kristo ne mbə̰ mbe fàʼà ibo.

²⁵ Wə̀d we ne ghìyə̀ inug tibɔ̀ŋ, Ŋwiye biri ghum nàʼ chùd məd ni koʼi tì inug tibɔ̀ŋ məd. Chəyi Ŋwiye we ghìyə̀ ighə ka.