Jems 5 - Ikan feg

Ipati abə bəd ikab

¹ Mbə̰ bəd ikab, mbə̀ zug! Mbə̀ deghe mèʼì məchə imbə̀ʼ ngəʼ kyen ze ne yèʼe igun inən.

² Ìmbən ighi ikab fə bɔb, ìsəʼə fə kud ìtən ndwi.

³ Ìwən gol fɔrɔ ìwən siribà fə bə̀ bɔb. Icheg ne mbi bɔbi anìŋ, à ya aneni ne zìyè isaʼi igun inən. Isaʼi gho̰ ya gha mbə̰ fə kaʼ ighi ikab inga ineg mbo̰ ne isəg we se nwḭ̀yḛ̀, ne chəyi mbə̰ mbe wètè bəd ne chəyi àzɔb. Ighi mbo̰ ijìm ne mbə̀ kaʼi biri se tɔ̰̀ awən icheg iywid.

⁴ Bəd mbe ne faʼi inga ìtən mben ne chəyi mbə̀ naʼi ìwɔb ikab, mbə̀ zug icheg ne mbɔb mbe dèghè, zìyè isaʼi igun inən. Bəd mbe ne ya kabi ìmbən ighi a mben ne chəyi mbə̀ naʼi ìwɔb ikab, mbɔb fə dèg Atumbisəg zug.

⁵ Mbə̰ fə chughi igun isəg inga ighi chɔm chɔm bə̀ fàʼ ìmbən inug icheg ne mbə̀ kəbi. Mbə̰ fə jəg fɔm icheg nyam ne mbi kweri ni kyemi igun aneg iteri.

⁶ Mbə̰ fə sɔb isaʼi igun bəd ne yaʼi awɔb abəŋ bə̀ zwèti awɔb ne chəyi mbɔb yaya tàŋà anug ne mbə̰ mbe ghà.

Anug ni nyimi fìŋ inga ngəʼ

⁷ Ìmbum məfi fɔrɔ ìtum njàbi, mbə nyimi fìŋ anene Anɔŋisəg yeʼe. Mbə̀ nḛ icheg ne wə̀d mben we mə̀ nyɔ̀ʼ ighi ngwèd, chùghi se ghɔ̀mɔ̀ gha ighi mbe ko. Wì ya ghɔ̀mɔ̀ ni ko ane mbə̀ŋ chùbi ghò pè inga ichi ka.

⁸ Mbə̰ inən, mbə̀ bə nyìmi fìŋ təm kà imbə̀ʼ icheg ne Anɔŋisəg we se zàmbi yeʼe.

⁹ Ìmbum məfi fɔrɔ ìtum njàbi, imbə̀ʼ mbə̰ zḭʼḛ awən mə̀mbin, nji Ŋwiye biri saʼ awən. Məd we ne biri saʼ wə̀d ijìm we se zàmbi yeʼe!

¹⁰ Ìmbum məfi fɔrɔ ìtum njàbi, mbə̀ niŋ bədkə̀n Ŋwiye mbe ne ya ghàmi abə bəd ane ikum Anɔŋisəg icheg aneni. Mbɔb ya nyimi fìŋ inga nyùmə̀ ngəʼ.

¹¹ Mbə̰ kyèri àzən aghi gha, mba ya nìŋə bəd mbe ne nyìme fìŋ ane bəd ne Ŋwiye zi àbɔrɔ̀bɔd igun inɔb. Mbə̰ fə zug icheg ne Job ya nyimi fìŋ inga ngəʼ. Mbə̰ kyèri icheg ne Ŋwiye ya nwìyḛ̀ zì àbɔrɔ̀bɔd igun məd inga ineg mbe ne ngəʼ məd ya fə mèghi. Anɔŋisəg we dìgrè bə̀ sɔ̀mnɔ̀ igun bəd.

¹² Ìmbum məfi fɔrɔ ìtum njàbi, ijiʼi anug ya gha, imbə̀ʼ mbə̰ zɔ̀m awən anug, ka. Kə̀ àkə ni zɔ̀m ane ikaŋ àbɔ̀ŋɔ kə̀ ane ìseg, kə̀ bə̀ yi ane aghi mɔ̀ʼɔ ndəŋ. Mbə̀ ya bḛ məyi gha; “E!” kə̀ “Indèʼ!” Mbə̰ mə̀ ya bḛ ane, chəyi Ŋwiye biri gha mbə gùg anug.

Ni chàʼra Ŋwiye tì ibḛfiŋ

¹³ Wə̀d mɔ̀ʼɔ abɔ̀ʼ inən we wa inga ngəʼ? Tengàŋ chàʼra Ŋwiye. Wə̀d mɔ̀ʼɔ abɔ̀ʼ inən we wa gyènde? Tengàŋ zəʼə tikyeg ghùmni Ŋwiye.

¹⁴ Wə̀d mɔ̀ʼɔ abɔ̀ʼ inən we wa ghɔ̰̀? Tengàŋ kara itog bəd inga ifeti bəd Kristo mbe yeʼe chàʼra Ŋwiye igun məd, zɔʼ aməd inga məwud ane ikum Anɔŋisəg.

¹⁵ Bəd mə̀ chàʼra Ŋwiye tì ibḛfiŋ, Ŋwiye biri ghù wə̀d ne ghɔ̰̀. Anɔŋisəg biri ghì tengàŋ nɔʼ igun abaʼ aghɔn. Àmə yaʼ aghi ne wì ya gùghi anug mɔ̀ʼɔ, Ŋwiye biri waʼ inug tibɔ̀ŋ məd.

¹⁶ Ane, mbə̀ bḛ ìmbən inug tibɔ̀ŋ abə mə̀mbin bə̀ chàʼra Ŋwiye gha wì ghuyə bəd ne ghɔ̰̀. Ichaʼri Ŋwiye ìwi wə̀d ne təmi kòʼ ya bèrè ika bə̀ fàʼà inug kwàʼ icheg chɔm.

¹⁷ Èlayijà ya yaʼ wə̀d icheg ina. Wì ya chàʼra Ŋwiye ane fìŋ ijìm gha imbə̀ʼ mbə̀ŋ no yi igun isəg. Ane, chəyi zì ya bə no ane tituʼ titad tì aba.

¹⁸ Wì ya ywìrì chàʼra Ŋwiye gha mbə̀ŋ no, mbə̀ŋ bə no chùb ìseg, ighi mben bə̀ ko ni kweg.

¹⁹ Ìmbum məfi fɔrɔ ìtum njàbi, wə̀d mɔ̀ʼɔ mə̀ fèbè, dù igun inɔnjì tesiʼ, wə̀d ndəŋ wete aməd ywìrì chwi inɔnjì tesiʼ ibo.

²⁰ Mbə̀ wendi gha, wə̀d ne wèti wə̀d ne fèbè, wì biri chì aməd ichug iwu. Ane, Ŋwiye biri waʼ inug tibɔ̀ŋ nɔʼ nɔʼ abə wə̀d we ne kə̀ febe.