Jems 4 - Ikan feg

Anug ni tindi iban Ŋwiye

¹ Aghi ze ne ghìyə̀ mbə zɔ̀ŋɔ̀ bə̀ chɔ̀bɔ mbə̰ mbə̰ àkə aghə? Imbə̀ʼ àzɔ̀ŋì ya nɔ̀ʼɔ ane ighi mbe ne ìtən fìŋ te ghə̀ʼrə̀?

² Mbə̰ mbe kə̀bə̀ ighi, si ya gha, chəyi mbə̰ mbe bèrè. Ane, mbə̰ mbe zwète bəd ni bèrì ighi mbe. Mbə̰ mbe ghə̀ʼrə̀ ighi bəd, si ya gha, chəyi icheg ni niŋ ighi mbe. Ane, mbə̰ mbe chɔ̀bɔ bə̀ zɔ̀ŋɔ̀ ni niŋ ighi mbe. Chəyi mbə̀ beri ighi ne mbə̰ mbe kə̀bə̀ imbə̀ʼ icheg ne chəyi mbə̀ nɔ̰ abə Ŋwiye.

³ Mbə̰ mbe nɔ̰ ighi chəyi Ŋwiye we nàʼà inən imbə̀ʼ icheg ne mbə̰ ya nɔ̰ tì tikɔndi tibɔ̀ŋ. Mbə̰ ya bìre yaʼ ighi mbe ne mbə̀ biri niŋ se fàʼà inug mbe ne bɔ̀ŋɔ̀ inən.

⁴ Mbə̰ ya icheg mə̀yi nami ne kiri nɔ̀kɔ̀ mbaŋà ndəŋ. Àkə chəyi mbə̀ kyeri gha, wə̀d ne jə̀ghə àsə̀ʼ tì isəg ya wə̀d ìpàb Ŋwiye? Mbə̀ kyeri gha, wə̀d ne kɔ̀ŋɔ̀ anug ni jəg àsə̀ʼ tì isəg ya wə̀d ìpàb Ŋwiye.

⁵ Kə̀ mbə wa kɔ̀ndi gha ìngam we ne yaʼi inga Àŋwàʼrì Ŋwiye ya ati ako? Ìngam we ya gha, “Ŋwiye we ghə̀ʼrə̀ Azwighi məd ze ne wì ghi gha ze yaʼ inga ina.”

⁶ Si ya gha, Ŋwiye ghì ìchɔ̀mì ina ni gha tì təm kà chè inug tibɔ̀ŋ. A ze inga Àŋwàʼrì Ŋwiye gha: “Ŋwiye ya to̰ bəd mbe ne nɔ̀ nyɔd, se ghìyə̀ ìchɔ̀mì yaʼ abə bəd mbe ne swìye ìwɔb nyɔd aseg.”

⁷ Ane, mbə̀ zugri Ŋwiye ane inug ijìm. Mbə̀ taŋ sìkì debrə̀, wì biri noro yi ane inən.

⁸ Mbə̀ tindi iban Ŋwiye, wì biri tindi iban inən. Mbə̰ mbe ne ghìyə̀ inug tibɔ̀ŋ, mbə̀ so ìmbən ibo! Mbə̰ mbe ne beri fìŋ ibe ibe, mbə̀ so ìtən fìŋ!

⁹ Mbə̀ sɔmnɔ, dèg mèʼì məchə. Mbə̀ kɔpi icheg ne mbə̰ mbe chə̀ʼə se dèghè. Mbə̀ bə kɔ̀pi icheg ne mbə̰ mbe gyènde se sɔ̀mnɔ̀.

¹⁰ Mbə swi ìwən nyɔd aseg imbìghè abə Anɔŋisəg, wì biri nɔ̀ awən ikaŋ.

Ipati imbə̀ʼ anug ni sɔb isaʼi igun wə̀d ndəŋ

¹¹ Ìmbum məfi fɔrɔ ìtum njàbi, imbə̀ʼ wə̀d ghama yi anug tibɔ̀ŋ igun wə̀d ndəŋ. Wə̀d we ne ghàmà inug tibɔ̀ŋ igun wə̀d ndəŋ, kə̀ sàʼa wə̀d ndəŋ, tengàŋ ya gha chəyi mə̀nɔ̀ʼɔ̀ Ŋwiye koʼi. Məd ya ane bə̀ sàʼa mə̀nɔ̀ʼɔ̀ Ŋwiye. Àghò mə sàʼ mə̀nɔ̀ʼɔ̀ Ŋwiye, ane ya gha, chəyi àghò biri ya nɔ̀ŋɔ̀ mə̀nɔ̀ʼɔ̀ mbe. Àghò biri yaʼ wə̀d ne sàʼà mə̀nɔ̀ʼɔ̀.

¹² À ya məyi wə̀d imɔʼ ne nàʼà mə̀nɔ̀ʼɔ̀ bə̀ sàʼà bəd. Tengàŋ ya wə̀d we ne tì wì pùmni bəd. Məd we tì wì bə nìmni bəd. Ane, àghò kə we ne sàʼa wə̀d ndəŋ?

Ipati imbə̀ʼ anug ni kɔ̀m igo

¹³ Mbə̀ zug, mbə̰ mbe ne gha, “Tèchɔ̀ŋ kə̀ isu, tì biri ghò inga aben kyen azo̰ kə̀ azin, pè chughi angu fituʼ ifibì, ghì iywin jəg chùd.”

¹⁴ Chəyi mbə̀ bi kyèri icheg ne isu biri yaʼ. Ìwən ìtḛ̀ igun isəg aŋa àkə aghə? Mbə̰ ya icheg ndiʼ ne nàmi isiŋi, mbə ŋa zə̰, zì nim yi.

¹⁵ Anug ne mbə̀ koʼi ni ghà ya gha, “Anɔŋisəg mə̀ bḛ, tì biri chughi ika, fàʼ azo̰ tì anug kə̀ azin tì anug.”

¹⁶ Tesiʼ ya gha, mbə̰ mbe kɔ̀mɔ̀ igo bə̀ nɔ̀ nyɔd. Chəyi anug ni kɔ̀m igo kə̀ ni nɔ̀ nyɔd ze bɔŋi.

¹⁷ Ane, wə̀d ne kyeri anug ne koʼi ni ghì, chəyi wì si ghì, tengàŋ gùg anug.