Jems 3 - Ikan feg

Anug ni nyimbi ichug

¹ Ìmbum məfi fɔrɔ ìtum njàbi, imbə̀ʼ mbə̰ nɔʼ nɔʼ si də̀b awən anug ni yaʼ bəd ne chwìte inug. Mbə kyeri gha mbà mbe ne chwìte Ìngam Ŋwiye abə bəd, mbi biri ghum sàʼ awa kwàʼ ane icheg ne ka chè icheg ne mbi biri ghum saʼ bəd ndəŋ.

² Mba məjìm mbe fèbè ane mənɔnjì nɔʼ nɔʼ. Wə̀d mɔ̀ʼɔ mə̀ yaʼ angu ne chəyi we kweʼè fèbè ane inug ne we ghà, nji tengàŋ bɔ̀ŋ mànì bə̀ yaʼ wə̀d ne taŋ kyèri icheg ni nyimi ìwi nyɔd.

³ Tì we zìyè ndəŋ ichug abə nyam mə̀kara ni ghì gha zì ya zùgrə awa. Ane, tì we tì tì si ghì zì ghò ane aba ne tì kɔŋi.

⁴ Mbə̀ niŋ ighi mɔ̀ʼɔ icheg ibaŋ igyì. À ya kwàʼ ighi kyen kyen ne à ya ifə ka ka we tḭ̀yḛ awɔb. Wə̀d ne tḭ̀yḛ abaŋ igyi mə kə̀b gha ze gho ane aba ne wì kɔ̀ŋi, wì ya bə̀ŋə̀ abaŋ igyi ze məyi kwàʼ ane afid kwa kwa ze ne abaŋ ze beri.

⁵ À ya icheg ne ze bə yaʼ ti inemi. Inemi ya kwàʼ asiŋi nyɔd kwa kwa, si ya gha, wì ya fàʼà kwàʼ ìfàʼì kyen kyen. Nḛ aghi icheg inab kyen ne à ya məyi fichəb iywid kwa kwa ne tɔ̰̀ inab kyen we.

⁶ Inemi ya icheg iywid. Inemi ya asiŋi nyɔd ne inug tibɔ̀ŋ sweghi inga. Inemi ya chìkə̀ nyàmnyɔd wə̀d ijìm bə̀ tɔ̰̀ ìtḛ̀ wə̀d ijìm. À ya iywid nɔʼ mèg ne biri si tɔ̀n aməd inga asiŋi ichə.

⁷ Wə̀d we tì wì ghi aku nyam ajìm se zùgrə aməd. Bəd fə ghì ane tì aku nyam nɔʼ nɔʼ. À ya aku nyam ajìm icheg nyam mben, tìnən, nyam ne swàrì swari aseg, fɔrɔ nyam te ne chùghə inga igyi.

⁸ Si ya gha, chəyi tì wə̀d bəŋi inemi ghì wi se zùgrə aməd. À ya kwàʼ aghi tibɔ̀ŋ ne chəyi ze kweʼè zwètè. Inemi ya kwàʼ icheg jo ne cho bəd, zwète.

⁹ Tì we nìŋə inemi ghùmnə Anɔŋisəg, ìwa Mbaʼ inga. Tì we bə̀ nìŋə inemi zìyè ndɔ̀n igun bəd ne Ŋwiye tàngi mbi fug aməd.

¹⁰ Ìngam ighumni fɔrɔ ìngam ndɔ̀n ya dùwə̀ məyi inga ichug we imɔʼ. Ìmbum məfi fɔrɔ ìtum njàbi, kayi icheg ne ze koʼi ni yaʼ we.

¹¹ Tì mənib zùti zùti tì mənib ne ŋwàŋà dù inga àdùrì amɔʼ?

¹² Ìmbum məfi fɔrɔ ìtum njàbi, chəyi tì azed mangò ko akwebì kə̀ azed namchì ko mə̀mangò. Chəyi tì àdùrì ne ŋwàŋà nàʼ mənib zùti zùti ka.

Iwe ne Ŋwiye we nàʼà

¹³ Wə̀d ne beri iwe bə̀ kyèri inug ijìm abɔ̀ʼ inən àkə we? Tengàŋ chwiti yaʼ ikuchèg chɔm fɔrɔ tìghinùg chɔm abə bəd bə̀ swi ìwi nyɔd aseg ni chwi gha məd ya wə̀d ne beri iwe.

¹⁴ Àmə yaʼ aghi ne ìtən fìŋ ya kà nwḭ̀yḛ̀ yi nwḭ imbə̀ʼ bəd, àmə yaʼ aghi ne mbə̰ mbe bə̀ sìyè, imbə̀ʼ mbə̰ kɔ̀m awən igo ane ikuchèg we. Imbə̀ʼ mbə̰ to̰ awən tesiʼ.

¹⁵ Kayi Ŋwiye nàʼi iku “iwe” we. Wi nɔ̀ʼ yaʼ abə bəd inga isəg. Kayi Azwighi Ŋwiye naʼi. Wì nɔ̀ʼ yaʼ abə Debrə̀.

¹⁶ Bəd mə̀ ya bèrè ìdɔ̀b kə̀ ya sìyè, ze ya nàʼà àbùrì fɔrɔ tiku inug tibɔ̀ŋ nɔʼ nɔʼ inga ìwɔb inɔ̰.

¹⁷ Àsi iwe we ne Ŋwiye nàʼi ya iwe ne ghìyə̀ bəd ghìyə̀ inug zḛ zḛ. Wi ya ghìyə̀ bəd chùghə ane àbɔrɔ̀bɔd bə̀ bèrè fìŋ bɔ̀ti bɔti. Bəd ne beri iku iwe gho̰ ya dìgrè igun mə̀mbin bə̀ zùghə anug ne bəd ndəŋ mbe ghà. Chəyi bəd ne beri iku iwe gho̰ mbe ghìyə̀ ighə kə̀ bə̀ŋə̀ inug.

¹⁸ Bəd mbe ne ghìyə̀ inug ane àbɔrɔ̀bɔd bə̀ ghìyə̀ gha bəd chughi ane àbɔrɔ̀bɔd, à ya mbɔb mbe wètè ni ghì gha bəd ya ghìyə̀ inug ne təmi kòʼ.