Jems 2 - Ikan feg

Ipati imbə̀ʼ anug ni ghì ighə

¹ Ìmbum məfi fɔrɔ ìtum njàbi, icheg ne mbə̀ bḛ Anɔŋisəg Yeso Kristo we ne bəd mbe ghùmnə, imbə̀ʼ mbə̰ si ya ghìyə̀ awən ighə.

² Tì niŋ gha wə̀d ne zi kàrà gol bə̀ zì ndwi àka inun yèʼe nyi inga ìwən ifeti. Wə̀d ifum mɔ̀ʼɔ bə̀ zì ichəʼ ndwi yèʼe nyi inga ìwən ifeti we.

³ Mbə̰ mə̀ ghùmni wə̀d ne zi ndwi àka inun, ghà ibo gha, “Chughi igun atən chɔm azo̰,” si ghà abə wə̀d ifum we gha, “Təm ayin,” kə̀ “Chughi aseg aŋa iban àmə ighog.”

⁴ Mbə̰ mə̀ ghì ane, imbə̀ʼ ze chwi gha, mbə̰ mbe kirə ghìyə̀ ighə, ghàpà bəd inga ìwən inɔn, bə̀ sàʼa bəd ane tikɔndi tibɔ̀ŋ?

⁵ Ìmbum məfi fɔrɔ ìtum njàbi ne mə̀ taŋ kɔ̀ŋ, mbə̀ zweri! Ŋwiye ya chɔʼ bəd ne chəyi àzɔb inga isəg ni gha mbɔb si yaʼ bəd ikab icheg ne mbi bḛ Yeso Kristo. Ane, mbɔb biri jəg anug ìfɔ̀n ze ne Ŋwiye ya kàʼi abə bəd mbe ne kɔŋi aməd.

⁶ Si ya gha, mbə̰ fə wèg wə̀d ifum. Imbə̀ʼ bəd mbe ne nyə̀mə̀ awən ya bəd ikab? Imbə̀ʼ bəd mbe ne sùŋə̀ awən ghò adiŋi isaʼi ya bəd ikab?

⁷ Imbə̀ʼ à ya mbɔb mbe chìkə̀ ikum chɔm we ne Ŋwiye nàʼi inən?

⁸ Mbə̰ biri ya fàʼà yaʼ anug ne koʼi anyumə̀ ne mbə taŋ nɔ̀ŋì nɔ̀ʼɔ̀ we ne Ifɔn we ne nɔ̀ŋɔ̀ isəg ya gha mbi ŋwàʼrì inga Àŋwàʼrì Ŋwiye. Nɔ̀ʼɔ̀ we ya gha, “Àghò kɔŋɔ wə̀d ne yaʼi iban ine icheg ne àghò kɔŋi ìwe nyɔd.”

⁹ Mbə̰ mə̀ ya ghìyə̀ ighə, nji mbə fə ghì anug tibɔ̀ŋ. Ane, nɔ̀ʼɔ̀ we nyìmi awən icheg ne we nyìme bəd ne gùghə̀ mə̀nɔ̀ʼɔ̀.

¹⁰ Wə̀d mɔ̀ʼɔ mə̀ nɔ̀ŋì mə̀nɔ̀ʼɔ̀ məjìm si gùg ka məyi nɔ̀ʼɔ imɔʼ, ane ya gha wì fə gùg mə̀nɔ̀ʼɔ̀ məjìm.

¹¹ À ya ane imbə̀ʼ icheg ne, wə̀d we ne ya gha, “Imbə̀ʼ àghò nɔkɔ awe iweg wə̀d kə̀ inɔm wə̀d,” à ya məd bə gha, “Imbə̀ʼ àghò zwète awe wə̀d.” Àghò mə nɔ̀kì məyi iweg wə̀d kə̀ məyi inɔm wə̀d, ne chəyi àghò zwèti wə̀d, ane ya gha àghò ya bə̀ wə̀d ne gùghə̀ mə̀nɔ̀ʼɔ̀.

¹² Mbə̀ ya ghàmà bə̀ ghìyə̀ inug icheg bəd ne Ŋwiye biri saʼ awɔb ane nɔ̀ʼɔ̀ we ne chìyè bəd ane ika we ne inug tibɔ̀ŋ beri igun bəd.

¹³ Mbə̀ ghiyə ane imbə̀ʼ icheg ne anyumə̀ ne Ŋwiye biri saʼ bəd, chəyi wì biri dìgrì igun bəd mbe ne chəyi mbɔb inɔb mbe bə̀ dìgrè igun bəd ndəŋ. Wə̀d ne dìgrè igun bəd, Ŋwiye biri bə dìgrì igun məd anyumə̀ ne wì biri sɔb isaʼi.

Ibḛfiŋ tì tìghinùg

¹⁴ Ìmbum məfi fɔrɔ ìtum njàbi, wə̀d ne gha zìye bèrì ibḛfiŋ ne chəyi tìghinùg məd te chwìye, chùd ne wì biri jəg àkə iza? Iku ibḛfiŋ we we tì wi pumni aməd?

¹⁵ Tì niŋ gha, ifi mɔ̀ʼɔ kə̀ njàbi mɔ̀ʼɔ yaʼ angu ne chəyi wì beri ndwi kə̀ tijəg.

¹⁶ Wə̀d mɔ̀ʼɔ abɔ̀ʼ inən mə ghà ibo gha, “Si ghò ane àbɔrɔ̀bɔd. Ghiyə ìze nyàmnyɔd zì ya nɔ̀mbɔ̀. Àghò bə jəg kɔd.” Wì mə ghà ane ne chəyi wì nàʼi ighi mbe ne biri ghì gha nyɔd ifi we kə̀ njàbi ze yaʼ icheg chɔm, chùd ne wì biri jəg àkə iza?

¹⁷ Ane, ibḛfiŋ ne chəyi tìghinùg ya kwàʼ ati ako.

¹⁸ Wə̀d mɔ̀ʼɔ biri ghà gha, “Àghò bèrì ibḛfiŋ, mo bèrì tìghinùg chɔm.” Wì mə ghà ane, mə biri ghà ibo gha, “Chwi icheg ne àghò beri ibḛfiŋ witì bèrì tighi inug chɔm inum. Àsi mo, mə biri chwi ìmə ibḛfiŋ ine ane inug chɔm mbe ne mə ghìyə̀.”

¹⁹ Àghò bḛ gha Ŋwiye məyi imɔʼ. Ze bɔ̀ŋ! Ka à ya bè izwighi tibɔ̀ŋ, mbɔb bə̀ bḛ ane. Si ya gha, mbɔb ya bḛ nè bìnde.

²⁰ Anen! Àghò wa kə̀b gha mbe chwi ine gha ibḛfiŋ witì zən tìghinùg ya ati ako?

²¹ Imbə̀ʼ à ya anyumə̀ ne ìwa mbaʼ te aneg Abràham ya nàʼi ŋwan məd icheg aghi àfàtì abə Ŋwiye, ne Ŋwiye ya niŋi gha məd fə təm kòʼ?

²² Àghò fə bàd gha, ibḛfiŋ məd yaya yḛ̀ tì inug chɔm mbe ne wì yaya ghìyə̀. Àghò fə bə̀ bàd gha ibḛfiŋ məd ya bɔ̀ŋ mànì anjìm inug chɔm mbe ne wì yaya ghìyə̀.

²³ Anug ne Àŋwàʼrì Ŋwiye ya gha imbə̀ʼ Abràham ya dù ane tesiʼ. Anug ze ya gha, “Abràham ya bḛ Ŋwiye, ane Ŋwiye niŋ aməd ane wə̀d ne təmi kòʼ.” Àze ya ghì Ŋwiye kàrì aməd ane ìwi ìsə̀ʼ.

²⁴ Ane, àghò fə bàd gha Ŋwiye ya nìŋə wə̀d gha wè təm kòʼ imbə̀ʼ inug chɔm mbe ne tengàŋ we ghìyə̀, kayi məyi imbə̀ʼ ibḛfiŋ.

²⁵ À ya bə̀ ane ne Ŋwiye ya niŋi àkwàrì ze ne mbi yaya kàrà ane Rahàb gha wè təm kòʼ anjìm anug chɔm ze ne wì ya ghi anyumə̀ ne mə̀Izre mɔ̀ʼɔ ya gho ni chə̀ʼ aben Jèrikò. Wì ya niŋ awɔb ibo inga achan icheg chɔm bə̀ si chà mbi ghò awɔb ane inɔnjì ndəŋ.

²⁶ Icheg ne nyàmnyɔd ne chəyi azwighi inga yaʼi ati ako, à ya bə̀ ane ne ibḛfiŋ ne chəyi wə̀d we ghìyə̀ inug chɔm bə yaʼ ati ako.