Jems 1 - Ikan feg

Ichaʼri

¹ À ya mo Jem, wə̀d àfàʼì Ŋwiye fɔrɔ wə̀d àfàʼì Anɔŋisəg Yeso Kristo ŋwàʼri àŋwàʼrì azo̰. Mə ŋwàʼrì anìŋ abə tinəbi te ìghum chɔ̀b ibe ne saka isiŋi ijìm, inga iben mbe ne kayi iben mə̀Ju. Mə chàʼrì awən.

Aghi ni ghì inga nyùmə̀ àkwàʼrì

² Ìmbum məfi fɔrɔ ìtum njàbi, mbə̀ ya gyènde mà nyumə̀ ijìm ne mbə̰ mbe chè inga aku àkwàʼrì nɔʼ nɔʼ.

³ Mbə̀ ya ghìyə̀ ane imbə̀ʼ icheg ne mbə̰ kyèri gha àkwàʼrì ya zwèʼre ìwən ibḛfiŋ ni ghì gha mbə kyeri icheg ni nyìʼ fìŋ.

⁴ Mbə̀ che imbìghè ni nyìʼ fìŋ. Mbə̰ mə̀ taŋ nyìʼ fìŋ ane, nji ìwən ibḛfiŋ biri təm kà, ìwən ikuchèg bə̀ bɔ̀ŋ mànì, ne chəyi anug tibɔ̀ŋ mɔ̀ʼɔ ne tì wə̀d ghà imbə̀ʼ awən.

⁵ Wə̀d mɔ̀ʼɔ mə̀ yaʼ abɔ̀ʼ inən ne chəyi wì beri iwe, tengàŋ nɔn iwe abə Ŋwiye. Ŋwiye we ne nàʼà ighi abə bəd abu abu bə̀ nàʼà ane fìŋ chɔm, wì biri nàʼ iwe ibo.

⁶ Anug ne angu ya gha, anyumə̀ ne wə̀d we nɔ̰ aghi mɔ̀ʼɔ abə Ŋwiye, wì bere ibḛfiŋ gha Ŋwiye biri nàʼ ibo. Wì bere ibḛfiŋ. Imbə̀ʼ wì jəmə yi imbə̀ʼ icheg ne, wə̀d ne jə̀mə̀ ya icheg àwàwà ne afim ze ghìyə̀ ze chè kɔ̀ʼɔ chè swìʼe.

⁷ Imbə̀ʼ wə̀d ne jə̀mə̀ kɔndɔ yi gha Anɔŋisəg biri nɔ̀ʼ nàʼ aghi mɔ̀ʼɔ ibo.

⁸ Iku wə̀d gho̰ ya wə̀d ne beri fìŋ tibe. Chəyi wì ya zìyè atog ane anug afibì.

⁹ Wə̀d Kristo we ne chəyi bəd mbe nìŋə məd ane aghi mɔ̀ʼɔ, wì ya gyènde gha Ŋwiye nɔ̀ aməd ikaŋ.

¹⁰ Àsi wə̀d Kristo we ne beri ikab, wì ya gyènde gha Ŋwiye swi aməd aseg. Wì ya gyènde imbə̀ʼ icheg ne bəd mbe ne beri ikab biri chè nim kwàʼ icheg tewàrà.

¹¹ Nyùmə̀ ya zùʼə kà, achwi ghìyə̀ ighi nə̀ŋə̀. Anyumə̀ ne ighi nəŋə, tewàrà fèndi. Nyùmə̀ ne tewàrà fèndi, chəyi ighi mbe mbe ywìrè bèrè ngwèn. À ya bə̀ ane ne wə̀d ikab biri nim icheg ne we nòtò anjìm abə ìmbi ighi.

¹² Ŋwiye biri zì àbɔrɔ̀bɔd igun wə̀d we ne nyìʼè fìŋ anyumə̀ ne àkwàʼrì nyi igun məd. À ya ane imbə̀ʼ icheg ne anyumə̀ ne wì che àkwàʼrì ze, wì biri niŋ ineʼi. Ineʼi we ya ìtḛ̀ ighə̀m imɔʼ we ne Ŋwiye ya kàʼi ni nàʼ abə bəd mbe ne kɔŋi aməd.

¹³ Anyumə̀ ne àkwàʼrì nyi igun wə̀d, imbə̀ʼ tengàŋ si gha yi gha, “Ŋwiye zì àkwàʼrì igun inum,” imbə̀ʼ icheg ne chəyi anug tibɔ̀ŋ mɔ̀ʼɔ ne tì ze kwàʼra Ŋwiye, chəyi Ŋwiye we bə̀ kwàʼrà wə̀d.

¹⁴ Tesiʼ ya gha, àkwàʼrì ya nyḭ̀yḛ igun wə̀d anyumə̀ ne məd we ghə̀ʼrə̀ inug tibɔ̀ŋ ibo inga fìŋ. À ya inug tibɔ̀ŋ mbe ne yaʼi inga fìŋ abə wə̀d mbe nɔ̀ngɔ aməd, sìmè ghò gha wì ghiyə anug tibɔ̀ŋ.

¹⁵ Anyumə̀ ne inug tibɔ̀ŋ mbe ne wə̀d we ghə̀ʼrə̀ fə nyi chùghi ibo inga fìŋ, mbi ya ghìyə̀ gha wì ghiyə inug tibɔ̀ŋ. Anyumə̀ ne inug tibɔ̀ŋ fə ka inga wə̀d, mbi ya zwète məd.

¹⁶ Ìmbum məfi fɔrɔ ìtum njàbi, imbə̀ʼ mbə̰ bḛ awən gha wə̀d mɔ̀ʼɔ tambi awən.

¹⁷ Tineʼi chɔm ne bɔŋi mànì ya nɔ̀ʼɔ̀ abə Ŋwiye. Ti ya nɔ̀ʼɔ̀ abə Ŋwiye we ne tangi ighi mbe ne zùʼə ikaŋ àbɔ̀ŋɔ. Chəyi məd we kɔ̀pɔ kə̀ ghàbra nyɔd icheg achwi ni ghì gha isiŋi fin.

¹⁸ À ya məd zìye ya kɔ̀ŋi ni chè anjìm ìngam məd ne yaʼi ìngam tesiʼ ni ghì awa gha tì yaʼ bəd məd. Wì ya niŋ awa ni ghì gha tì bere ati mbègtog inga ighi ijìm ne məd ya tangi.

Anug ni zug Ìngam Ŋwiye bə̀ fàʼ anug ne ìngam Ŋwiye we ghà

¹⁹ Ìmbum məfi fɔrɔ ìtum njàbi ne mə̀ taŋ kɔ̀ŋ, mbə̀ ya tɔ àtɔ̀ŋi ane anug. Imbə̀ʼ mbə̰ ya kə ghàmà awən. Imbə̀ʼ mbə̰ ya bə̀ kə gàŋa awən.

²⁰ Aton ya gha, chəyi agaŋ wə̀d ze ghìyə̀ gha ìtḛ̀ məd təm kòʼ icheg ne Ŋwiye we kə̀bə̀.

²¹ Ane, mbə̀ waʼ izṵ inug ijìm fɔrɔ ikuchèg tibɔ̀ŋ ijìm ne mbə̀ beri. Mbə̀ swi ìwən nyɔd aseg abə Ŋwiye, bḛ ìngam we ne mbi zi inən inga fìŋ icheg ne wə̀d we zìyè ngwèd inga ìseg. Ìngam we we tì wì ghì mbə pum.

²² Imbə̀ʼ mbə̰ si tambi awən ìwən nyɔd gha mbə̰ mbe zùghə Ìngam Ŋwiye. Mbə faʼa anug ne Ìngam Ŋwiye we ghà.

²³ Wə̀d ne zùghə Ìngam Ŋwiye ne chəyi wì ya fàʼà anug ne Ìngam Ŋwiye we ghà, tengàŋ ya icheg wə̀d ne nḛ̀ ìwi ìfe inga manə̀m,

²⁴ ne anyumə̀ ne wì nḛ ìwi nyɔd, wì nɔ̀ʼ ghò yi, bə̀ nèbì icheg ne wì yaʼi kwàʼ ati.

²⁵ Àsi wə̀d we ne taŋ zì atog ni zug mə̀nɔ̀ʼɔ̀ mbe ne bɔŋi mànì, ne pùmnə bəd, bə̀ chè imbìghè ni ya nḛ̀ igun mə̀nɔ̀ʼɔ̀ mbe, ne chəyi wì ya zùghə inug nèbè, Ŋwiye biri zì àbɔrɔ̀bɔd igun məd.

²⁶ Wə̀d mɔ̀ʼɔ abɔ̀ʼ inən wa kɔ̀ndi gha zìye təm kà inga anug Ŋwiye? Àmə chəyi wì kyèri ni nyimbi ìwi ichug, wì ya tàmba ìwi nyɔd. Anug Ŋwiye məd ya bə̀ ati ako.

²⁷ Anug Ŋwiye ne Ŋwiye ne yaʼi ìwa Mbaʼ wì bḛ gha ze kòʼ bə̀ zen, ya anug ni nèn bɔn iti tì məku àyi, wètì awɔb anyumə̀ ne mbɔb yaʼi inga ngəʼ. Wì bə̀ bḛ gha wə̀d duwə inga inug tibɔ̀ŋ mbe ne yaʼi igun isəg.