2 Kɔrèn 3 - Ikan feg

Bəd àfàʼì inga ikan feg

¹ Tì wa biri ko se chɔ̀tɔ̀ awa mba mba gha mba ya bəd àfàʼì chɔm? Kə̀ mbə̰ wa kə̀b gha mbe cha àŋwàʼrì inən ni chwi gha mba ya bəd àfàʼì chɔm, icheg ne bəd mɔ̀ʼɔ mbe ghìyə̀? Kə̀ mbə̰ kə kə̀bə̀ ni nàʼ àŋwàʼrì ina ni chwi gha mba ya bəd àfàʼì Ŋwiye ne fàʼà icheg chɔm?

² Mbə̰ ya àza àŋwàʼrì ne ìta fìŋ kyeri ne chwìye gha mba ya bəd àfàʼì Ŋwiye ne fàʼà icheg chɔm. Wə̀d ijìm ne kàri àŋwàʼrì ze biri kyeri àfàʼì chɔm ze ne tì faʼi inga ìwən ìtḛ̀.

³ Ìwən ikuchèg chwi ze dù zen gha àŋwàʼrì ze ya Kristo ŋwàʼri chà awa tì yèʼe tì àzewən. Àŋwàʼrì ze ya kayi mbi ŋwàʼrì ane ìkɔŋ àŋwàʼrì igun ja kə̀ igun iba igho. À ya Kristo Ŋwàʼri inga fìŋ abə bəd ane Azwighi Ŋwiye we ne yaʼi izɔm.

⁴ Tè kyèri ane kwàʼ icheg chɔm imbə̀ʼ icheg ne tì chè anjìm Kristo nɔ̀ŋì ibḛfiŋ igun Ŋwiye.

⁵ Chəyi tì koʼi ni se gha, ika ni fàʼ inug mbo̰ nɔ̀ʼ ina. À ya Ŋwiye nàʼi ika we ina.

⁶ Wì fə ghì tì koʼ ni yaʼ bəd àfàʼì məd inga ikan feg. Ikan feg kayi mbi ŋwaʼri ŋwaʼri. À ya ikan ne Ŋwiye wàri ane àzi Azwighi. Mə̀nɔ̀ʼɔ̀ ne mbi ŋwaʼri ŋwàʼri ya yèʼe tì iwu, àsi Azwighi ze yèʼe tì ìtḛ̀.

⁷ Mə̀nɔ̀ʼɔ̀ Muse ya mbi ya ŋwàʼi igun iba igho. Anyumə̀ ne Ŋwiye ya nàʼi Mə̀nɔ̀ʼɔ̀ mbe, ìzḛzḛ njandi njandi məd ya yaʼ igun, ka Mə̀nɔ̀ʼɔ̀ mbe yaya zwète bəd. Ìzḛzḛ we yaya zùʼə kà igun ìfe abə Muse ne chəyi tì mə̀Izre ya nèn Muse kwàʼ igun ìfe tàndì. Ìzḛzḛ we yaya nìmne mèghè ghò.

⁸ Ane, àkə chəyi àfàʼì ze ne Azwighi Ŋwiye ze fàʼà biri bèrì ìzḛzḛ njandi njandi chè ìwi mə̀nɔ̀ʼɔ̀?

⁹ Icheg ne àfàʼì mə̀nɔ̀ʼɔ̀ ne ghìyə̀ bəd kùyə ya beri ìzḛzḛ njandi njandi, àkə chəyi àfàʼì Azwighi ne ghìyə̀ bəd tə̀mə kòʼò beri ìzḛzḛ njandi njandi chè?

¹⁰ Tesiʼ ya gha, ìzḛzḛ mbègtog ya ati ako, ni mə̀grì ane ìzḛzḛ kyen ne yaʼi amad anìŋ.

¹¹ Icheg ne Ŋwiye chi àfàʼì mə̀nɔ̀ʼɔ̀ ne beri ìzḛzḛ njandi njandi chà iban, ane ya gha, àfàʼì Azwighi ne yaʼi ane ighə̀m imɔʼ bèrì ìzḛzḛ ne njànda chè.

¹² Icheg ne tì nɔŋi fìŋ igun àfàʼì feg azo̰, chəyi te ywìrè bɔ.

¹³ Chəyi mba yaʼi icheg Muse ne yaya kəndə ìwi ìfe ane ndwi ni gha imbə̀ʼ mə̀Izre nɔ̀ʼ ya nḛ̀ ìzḛzḛ njandi njandi we icheg ne wi yaya nìmne mèghè ghò.

¹⁴ Chəyi tì bəd ya kyeri anug ne mə̀nɔ̀ʼɔ̀ Muse yaya ghà. Ka bèyi amad anìŋ, anyumə̀ ne bəd mbe fɔ̀ŋɔ mə̀nɔ̀ʼɔ̀ Muse, ndwi ze kiri kəndə iwe bəd. Anyumə̀ ne wə̀d yaʼi ane ifɔti tì Kristo, ndwi ze ya dùwə̀, iwe məd fìʼè.

¹⁵ Ka bèyi tèchɔ̀ŋ, anyumə̀ ne mbe fɔ̀ŋɔ mə̀nɔ̀ʼɔ̀ Muse, ndwi ze ze kiri kəndə fìŋ abə bəd.

¹⁶ Tesiʼ ya gha, wə̀d mə bə̀ŋi fìŋ ghò abɔ̀ʼ Anɔŋisəg, ndwi ze du.

¹⁷ Amad anìŋ, Anɔŋisəg ya Azwighi Ŋwiye ze. Asiŋi ne Azwighi Anɔŋisəg yaʼi angu, wə̀d ya pùmə.

¹⁸ Mba məjìm mbe ne chəyi ndwi ze ywirì kən ìta tìfe, ne te bàrà icheg ne ìzḛzḛ Anɔŋisəg we njànda icheg ni gha à ya inga manə̀m, Anɔŋisəg ya kɔ̀pɔ awa tì fùghə məd. Tì ya kɔ̀pɔ yètì yeti ghò imbìghè ni bèrì ìzḛzḛ icheg məd. Ìzḛzḛ we ya nɔ̀ʼɔ ibo, məd we ne yaʼi Azwighi Ŋwiye.