Tito 3 - Manobo Western Bukidnon

Menge Sambag

¹ Keg̵iyi nu is menge tumutuu ziyan he kinahanglan he mebpesakup dan te velaud te gubirnu wey te menge upisyal ziyan. Medtuman dan te menge sug̵ù dan kandan ne medtavang dan ke zuen meupiya he ed-ul-ulahan te gubirnu.

² Keg̵iya nu kandan he kenè dan med-ituk te minsan hentei, kekenà, melinawen is kedepitè dan te langun, mebpekid-emig̵u zan te langun, wey kenè dan mepelevawen.

³ Su sikita zaan is tumutuu, engey ki zengan wey mesinupaken ki te Megbevayà su wazè ta meturedu is tutuu he ibayà. Nengeuripen ki te menge mezaat he kebayà te lawa ta wey te menge kelipey he kenà meupiya. Neteg̵eb dengan is isip ta te kelelalung wey kesina. Nepeukan ki te menge etew ne nepeukan ta zaan sikandan.

⁴ Ne is Megbevayà he Menluluwas tew, hein neuma is timpu te kebpaahaa zin kenita te gag̵ew zin wey ketulanged din,

⁵ midlibri ki zin te silut. Iyan ingkelibriya zin kenita is: kenà tenged te menge metazeng he ulaula he nehimu ta, kekenà, tenged dà te hizu zin kenita. Midlibri ki zin pinaag̵i te kedlumpiyuwi kenita he iyan is kebpeuman ta kebpaanak pinaag̵i te g̵ehem te Wag̵as he Mulin-ulin he nekeveg̵ey kenita te veg̵u he untung.

⁶ Midhimu te Megbevayà he mepurung ki meulini te Wag̵as he Mulin-ulin pinaag̵i te kebpehimatey ni Jesu Kristu he Menluluwas tew.

⁷ Umba mid-ulaula zin heini su wey tenged te g̵ag̵ew zin kenita meisip ki zin he metazeng ne maangken ta is untung he wazà pidtemanan he iyan ebperetengen ta.

⁸ Utew tutuu heini is impesavut ku kenikew. Egkesuatan ku he ipurung nu ipenurù heini ziyan su utew hustu wey zekelà is pulus kayi ziyà te minsan hentei. Ne emun nesavut en heini te menge tumutuu te Megbevayà iyan dekelà diyà te g̵ehinawa zan is ked-ul-ulaha zan te meupiya.

⁹ Iyan, likayi nu is winalì he kebpekidlewanà te menge etew. Likayi nu zaan is ked-istudyu te menge g̵ug̵ud te menge ngazan te menge kepuun te etew he iyan baal zan. Ne elin nu zaan likayi is kebpekid-eg̵et dan mehitenged te kedtumana te kesug̵uan he imbilinbilin ni Moises. Wazà pulus te langun kayi su ebpekezezaat.

¹⁰ Ke zuen duma niw he edsemuken din is upakat te menge tumutuu, dewaya nu, ne emun kenà ebpemineg, umani nu zewaya. Ne emun kenè pa zutun ebpemineg engkezi nu sikandin.

¹¹ Su egketuenan nu zutun he is etew he iring kayi, nekesuwey is isip din te hustu he ulaula. Minsan pa te netuenan din he mezaat is ulaula zin, ebpeniguduwan din gihapun.

¹² Emun ebpeveyaan ku sikew ki Ertimas ne emun kenà, si Tikiku, gaanggaan ka telavuk kediey ziyà te Nikupulis su ziyà a ed-ubpà ke egkeuma is tipenguzan.

¹³ Himuwa nu is taman te egkehimu nu wey nu metevangi is ebugadu he si Sinas wey si Epulus ke edhipanew zan. Susiya nu sikandan su wey wazà kurang dan.

¹⁴ Ipenurù nu ziyà te menge zuma nu he tumutuu ziyan he kinahanglan he iyan dekelà diyà te g̵ehinawa zan is ked-ulaula zan te meupiya wey zan metevangi is menge edlised. Kenà meupiya ke zuen tumutuu he peg̵ulen su wazà pulus dutun.

¹⁵ Ebpepengemusta kenikew is langun he menge zuma ku kayi. Ipengemusta key zaan te langun he menge emig̵u zey he tumutuu ziyan. Berakat he ikeg̵ag̵ew kew te Megbevayà is langun.