Santiago 4 - Manobo Western Bukidnon

Is Kebpesakup te Megbevayà

¹ Hengkey is puunà te menge kesevaan wey tebek diyan te keniyu? Iyan is menge mezaat he kebayè niw he ebpekigkuntada te meupiya he ulaula.

² Duen egkesuatan niw he kenè niw egkekuwa ne tenged dutun ebpekeisip kew te kebpemumunù. Duen egkeimahan niw, iyan, kenè niw egkeangken ne tenged dutun ebpekidsavè kew wey ebpekidtebek kew. Umba kenè niw egkekuwa is egkesuatan niw su kenè niw ebuyuen diyà te Megbevayà.

³ Ne minsan ke ebuyuen niw ziyà te kandin, kenè din ibeg̵ey su mezaat is tuyù niw te kebuyua niw kayi. Iyan ketezengan te kebuyù niw is wey niw metuman is mezaat he kebayè niw.

⁴ Kenè kew metinumanen te pesarig niw ziyà te Megbevayà. Wazè niw ves metueni he emun iyan niw egkesuatan is mezaat he ed-ul-ulahan te menge kuntada te Megbevayà dini te kelibutan, ne menge kuntada kew zaan te Megbevayà. Is minsan hentei he iyan egkesuatan din is mezaat he ulaula zini te kelibutan, mibpekigkuntada sikandin te Megbevayà.

⁵ Kenè niw isipa he kenà tutuu sikan is insurat he Lalag te Megbevayà he edhenduen te, “Is gehinawa he imbeg̵ey kenita te Megbevayà, nehimu he mezesen is kegkesuati zin te mezaat he ulaula,

⁶ iyan, mezesen pa utew is tavang kenita te Megbevayà.” Ne tenged dutun duen insurat he lalag din he edhenduen te, “Egkuntedahan te Megbevayà is mepelevawen, iyan, edtevangan din mulà is ebpesakup kandin.”

⁷ Ne tenged dutun, pesakup kew te Megbevayà. Sukuli niw si Setanas ne ebpelag̵uy keniyu.

⁸ Aput kew ziyà te Megbevayà ne ed-uvayan kew zin. Sikiyu is mekesesalà, engkezi niw is menge ulaula niw he mezaat. Sikiyu is uvag dà is kedtuu zan, pelumpiyuwi niw te Megbevayà is isip niw wey g̵ehinawa niw.

⁹ Meseeng kew tenged te menge ulaula niw he mezaat; medlug̵ib kew wey medsineg̵ew kew; kenè kew engit, kekenà, erang kew; kenè kew medlipey, kekenà, mebmezaat is gehinawa niw.

¹⁰ Pesakup kew te Megbevayà, ne ibpelavew kew zin.

Is Kedsudì

¹¹ Menge suled, kenè kew mebpesudsudiey wey mebpesewsewayà su is edsudì wey edsawey te zuma zin he tumutuu, ne iring te edsudien din wey edsewayen din is lavew he sug̵ù. Ne emun edsewayen ta haazà is sug̵ù, kenè ta edtumanen, kekenà, edsumpeliten ta.

¹² Sebsevaha zà is ebpuunan te kesug̵uan he iyan is Megbevayà ne sebsevaha zà daan is duen din keg̵ehem te kedhukum te menge ulaula te menusiyà ne iyan ded daan is Megbevayà. Iyan sikandin edsilut ne iyan daan ebpekelibri te silut. Iyan, sikita mulà, wazè ta keg̵ehem te kedhukum te minsan hentei.

Is Kedantal te Etew te Egkehitavù Kandin te Huziyan he Timpu

¹³ Pemineg kew, sikiyu is egkag̵i te, “Guntaan ne emun kenà ne keeselem, edhendiyè ki te sevaha he inged. Ne zutun ki ebpetig̵ayun taman te sengetuig wey ki mekemanggad.”

¹⁴ Turebung kew su minsan is keeselem dà he hitavù, kenè ta egketuenan. Is untung ta zini te kelibutan, ne utew mevavà ne iring te menipis he g̵apun he egketik-ew egkeahà ne egketik-ew zaan egkeawà.

¹⁵ Meupiya pa ke egkag̵i ki te, “Emun idtug̵ut kenita te Nengazen he kenè ki pa ebpatey, ebeelan ta is iring dutun.”

¹⁶ Iyan, sikiyu mulà, memepedelig̵en su idantal niw is ed-ul-ulahan niw, ne mezaat is iring dutun.

¹⁷ Tentenuzi niw he ke netuenan te minsan hentei kenitew ke hengkey is meupiya he ed-ul-ulahan ne kenè din ed-ul-ulahan, nekesalà sikandin diyà te Megbevayà.