Santiago 2 - Manobo Western Bukidnon

Indawey is Kebpeleviya te Zuma

¹ Menge suled, geina te menge tumutuu ki ki Jesu Kristu, is mekeg̵eg̵ehem he Nengazen, kinahanglan he pedrerepenga ta is kedtehuza ta te langun he menge etew.

² Penenglitan duen edseled diyà te simbahan niw he sepian he edsisising te vulawan ne utew mahal is bisti zin. Ne zuen daan edtampu he egkeayuayu ne nenggeremisey is kandin he bisti.

³ Ne edtehuzan niw heeyan is meupiya is bisti zin ne ke sikiyu te, “Kayi ka te meupiya he vangkù.” Iyan, haazà mulà is egkeayuayu, egkeg̵iyan niw zà te, “Kayi ka hitindeg,” wey ke, “Dini ka pinuu te saag uvey te kedì he vangkù.”

⁴ Kenè be mezaat heeyan he ulaula su kenè niw ebpedrerepengen is kedtahud niw te menge zuma niw he tumutuu su kunaan niw ke hustu ke ebmahalen ta is sepian ne kenà is egkeayuayu.

⁵ Pemineg̵a niw, menge minahal ku he suled, is ibpesavut ku keniyu. Duen mibpilì te Megbevayà he egkengeayuayu. Ne minsan deisek is ketig̵eyunan dan midhimu te Megbevayà he zekelà mulà is kedsarig dan kandin ne iyan sikandan edtuvazan din pinaag̵i te kedhadì din sumalà is penaad din diyà te langun he ebmahalen dan sikandin diyà te g̵ehinawa zan.

⁶ Iyan, sikiyu mulà, wazè niw kedtahud dutun te egkengeayuayu. Hentei is ebpenlupig keniyu? Iyan is menge sepian. Ne hentei is edsumbung keniyu ziyà te etuvangan te huwis?

⁷ Hentei is edsumpalit te mahal he ngazan ni Jesus he iyan teg̵ig̵aked kenitew? Iyan is menge sepian.

⁸ Utew meupiya is ed-ul-ulahan niw emun edtumanen niw is lavew he sug̵ù te Nengazen he egkevasa niw ziyà te insurat he lalag din he edhenduen te, “Kinahanglan he mahala nu is duma nu; isipa nu sikandin he iring te kenikew en he g̵ehinawa.”

⁹ Iyan, emun duen niw ibpelavi, ebpekesalè kew. Ne sumalà is impenurù dutun te kesug̵uan te Megbevayà he imbilinbilin ni Moises, mesinupaken kew.

¹⁰ Su minsan ke sevaha zà duen te menge sug̵ù te kesug̵uan is egkesupak te etew, ed-isipen gihapun te Megbevayà he mesinupaken sikandin he iring te nesupak din is langun he menge sug̵ù.

¹¹ Su is migkag̵i te, “Kenè nu selselai is esawa nu,” ne iyan daan migkag̵i te, “Kenè ka pemumunù.” Ne minsan wazè nu selselai is esawa nu, ke nekevunù ka nesupak nu en is tivuuk he kesug̵uan su sebsevaha zà is teg̵isug̵ù dutun te langun he menge sug̵ù.

¹² Duen selakew en he kesug̵uan he ebpekelibri kenita wey ki kenà mekesalà ne iyan heini kesug̵uan he idhukum kenita keuzemà te Megbevayà. Ne tenged kayi kinahanglan he ebpurungan ta is menge lalag ta wey ulaula ta su wey kenè ta mesupak haazà is kesug̵uan.

¹³ Su is Megbevayà, kenè din keuzemà egkehizuwan is etew he wazè din hizu te zuma zin. Iyan, is etew mulà he hihizuwen, wazà kinahanglan he egkehandek sikandin su kenà sikandin edsilutan te Megbevayà.

Is Tutuu he Kedtuu

¹⁴ Menge suled, wazà pulus te kedtuu te minsan hentei ziyà te Megbevayà emun kenà egketuusan is kedtuu zin pinaag̵i te menge ulaula he meupiya. Is kedtuu he iring dutun, ne kenà tutuu, ne kenà din igkelibri te silut.

¹⁵ Su penenglitan duen menge suled tew he tumutuu ne edlised sikandan tenged te wazè dan igkekuwa te bisti wey egkekaan.

¹⁶ Ne emun egkeg̵iyan tew zà sikandan te, “Ehè kew zà. Berakat he mekekuwa kew te egkeenen niw wey igkebisti niw,” iyan, kenè tew sikandan edtevangan, wazà pulus te migkag̵i tew.

¹⁷ Iring din ded daan is etew he egkeg̵iyen din he edtuu sikandin, iyan, kenà meupiya is menge ulaula zin. Egkesavut ta zutun he kenè bes tutuu is kedtuu zin.

¹⁸ Ne ke zuen egkag̵i te, “Edtuu zà is sevaha te Megbevayà wey melibri sikandin te silut ne is duma, ne ed-ulaula te meupiya wey sikandin melibri, ne pudu hustu.” Iyan, iyan tavak ku zutun te zezuwa is: kinahanglan he edtuu ki, iyan, kenà egkehimu he tutuu is kedtuu ta te Megbevayà ke kenà egketuusan haazà is kedtuu ta pinaag̵i te menge ulaula ta he meupiya. Kinahanglan he ibpeehè ta is kedtuu ta pinaag̵i te menge ulaula ta.

¹⁹ Emun midtuu ki he sebsevaha zà is Megbevayà utew meupiya heeyan, iyan, kenè pa hustu su minsan is menge mezaat he mulin-ulin, midtuu zan daan te iring keniyan, iyan, egkerkeren dan te kegkehandek su netuenan dan he edsilutan sikandan keuzemà.

²⁰ Utew kenà metau he ed-isip is etew he iring dutun. Ebpenuruen ku sikiyu he is kedtuu ta, emun kenà egketuusan pinaag̵i te menge ulaula ta he meupiya, ne kenà ebpekelibri kenita te silut.

²¹ Hengkey is paag̵i he impetimaan te kepuun tew he si Abraham he iyan impeketezenga kandin te Megbevayà? Iyan is menge ulaula zin dutun te kedtumana zin te insug̵ù kandin te Megbevayà te kebpemuhata zin pezem te anak din he si Isaak.

²² Netuenan ta he pinaag̵i te kedtuu zin, midtuman din is insug̵ù kandin ne pinaag̵i zaan te kedtumana zin kayi, neheg̵et is kedtuu zin te Megbevayà.

²³ Ne tenged dutun egkesavut ta he utew tutuu sikan is insurat he Lalag te Megbevayà he edhenduen te, “Midtuu si Abraham te Megbevayà, ne tenged dutun te kedtuu zin, mid-isip sikandin te Megbevayà he metazeng.” Ne migeraran sikandin he Emig̵u te Megbevayà.

²⁴ Ne tenged dutun egkesavut ta he ed-isipen ki he metazeng te Megbevayà ke zuen menge ulaula ta he meupiya he tuus te kedtuu ta ne kenà tenged te kedtuu zà he wazè din tuus.

²⁵ Ne iring dutun daan is kedtuu ni Rahab, is bahi zengan he mezaat is dengeg din. Umba mid-isip sikandin he metazeng te Megbevayà su zuen meupiya he mid-ulaula zin su impeseled din te valey zin is menge sug̵ù ni Josue, ne midtevangan din sikandan wey zan mekepelag̵uy pinaag̵i te selakew en he ibayà.

²⁶ Is lawa te etew, emun wazè din en gehinawa, egketuusan ta he minatey en ne wazè din en pulus. Ne iring din ded daan is kedtuu te minsan hentei su emun kenè egkezumahan haazà is kedtuu te menge ulaula he meupiya, wazà daan pulus dutun te kedtuu zin.