Ruma 7 - Manobo Western Bukidnon

Is Kegkelibriya Kenitew

¹ Menge suled, nesavut te en ke hengkey is belaud te gubirnu ne netuenan ta he zizalem ki te menge sug̵ù te velaud taman te kenè ki pa ebpatey, ne emun ebpatey ki, kenè en egkehimu he ibpetuman pa kenita is menge sug̵ù te velaud.

² Penenglitan, insug̵ù te velaud he is bahi ke zuen din esawa, kenà ebpekepeuman ebpekepeesawa emun uuyag pa haazà is esawa zin. Ne emun ebpatey haazà is esawa zin, egkehimu ke ebpeuman ebpeesawa.

³ Iyan, emun wazè pa mebpatey haazà is esawa zin ne ebpekiduma wey ebpekidhulid te sengememaame en, ne nesupak din is belaud su neselselaan din haazà is esawa zin. Ne emun ebpatey is esawa zin, ebpekepeesawa ne kenè en ebpekesalà sikandin su nelibri sikandin dutun te velaud mehitenged te telteleesawa.

⁴ Ne iring din ded daan, menge suled, heini is nehitavù kenitew su zutun te kebpatey ni Kristu he elili kenitew, ne mibpatey ki zaan, ne tenged kayi kenè en egkehimu he ibpetuman kenita te minatey en is menge sug̵ù he imbilinbilin ni Moises. Ne umba nehimu heini su wey kiw mesakup ni Kristu he nevanhew en ne wey tew metuman is egkesuatan te Megbevayà.

⁵ Su zengan hein kemulu tew pa edtumana is kenitew he kebayà, duen menge ulaula he indawey te kesug̵uan, ne tenged te indawey heini, ne nasì nehimu he iyan daan heini utew tew egkesuatan te ed-ulaula. Ne tenged te mid-ulaula tew is iring dutun, iyan dà egkepaabut tew zengan is kemetayen he wazè din pidtemanan.

⁶ Ne hein nemeketuu kiw ki Jesus, nelibri kiw te Megbevayà ne wazè en kinahanglan he iyan tew pa edserig̵an is kedtuman te kesug̵uan, su zutun te kebpatey ni Jesus minatey kiw zaan ne nevelukasan kiw te kegkeuripen kenitew te salà. Ne g̵untaan beg̵u en is paag̵i te ked-ul-ulaha tew te egkesuatan te Megbevayà su pinaag̵i heini te kedtavang te Wag̵as he Mulin-ulin, ne kenè en pinaag̵i te zaan he paag̵i he iyan is kenitew he kedtumana te insurat he kesug̵uan.

Is Kesug̵uan wey is Salà

⁷ Ne kunaan te zuma ke zutun ebpuun te kesug̵uan is menge mezaat he ulaula! Iyan, kenà dutun ebpuun su zaan is ulaula he mezaat dini te kenita. Is kesug̵uan, ne iyan ebpesavut kenita ke hengkey is mezaat he ulaula. Su emun wazà izawey ziyà te kesug̵uan is kegkeima, ne wazè ku g̵eina metueni he mezaat bes is kegkeima he zaan dini te g̵ehinawa ku.

⁸ Daan dini te kedì is kebpekesalà, ne hein impesavut kediey pinaag̵i te kesug̵uan he salà is kegkeima, mid-iseg is kegkeima ku ne mid-iseg daan is kebpekesalè ku. Su emun wazà kesug̵uan he egkesupak ta, wazà daan egketuenan ta he salà.

⁹ Hein aney, wazè ku metueni ke hengkey is kesug̵uan, ne zutun, henduen be te wazè ku salà. Ne hein impenurù kedì is kesug̵uan, netuenan ku he mezaat bes is menge ulaula ku. Ne tenged kayi nesavut ku he ziyè e ves ebpekezunggù te kemetayen he wazè din pidtemanan!

¹⁰ Umba nehimu is kesug̵uan he imbeg̵ey te Megbevayà su wey mekeangken is menge etew te untung he wazè din pidtemanan emun kenè dan edsupaken. Iyan, nehimu en he iyan idsiluti kedì is kesug̵uan su nesupak ku.

¹¹ Henduen be te mid-ekalan a te mezaat he ulaula su pinaag̵i te mezaat he ulaula ku he supak te kesug̵uan, human ku mesavut he nehukuman ed bes te kemetayen he wazè din pidtemanan.

¹² Is kesug̵uan, diyà ebpuun te Megbevayà, ne is langun he menge sug̵ù dutun, menge sug̵ù te Megbevayà, ne kenà haazà mezaat, kekenà, meupiya wey metazeng.

¹³ Ne emun meupiya is kesug̵uan, kela ke ebpekekag̵i ki he tenged te meupiya, he ke và dà egkeg̵iya, tenged te kesug̵uan, nehukuman ad te kemetayen he wazè din pidtemanan. Ne kenà iyan haazà su tenged te mezaat he mid-ulaula ku, midhukuman ad te kemetayen su wey ikepesavut kediey he utew mezaat is kedsupaka ku te kesug̵uan.

Is Kebpekedsupakà te Daan wey Beg̵u he Kineiya

¹⁴ Netuenan tew he meupiya is kesug̵uan su imbeg̵ey te Wag̵as he Mulin-ulin. Iyan, siak, geina te edtumanen ku is menge mezaat he suat te lawa ku ne nehimu a he iring te uripen te menge mezaat he kebayà.

¹⁵ Ne kenè ku egkesavut ke maan is ed-ul-ulahan ku is iring kayi su is meupiya he egkesuatan ku he meulaula ku, kenè ku egkeulaula. Ne is menge mezaat he ulaula he utew ku igkeepes, ne iyan ed-ul-ulahan ku.

¹⁶ Ne emun nekesupak a te kesug̵uan, iyan, kenè ku pezem egkesuatan he mesupak ku, ne heini is kenè ku kegkesuat, ne iyan tuus he zini te isip ku meupiya is kesug̵uan.

¹⁷ Ne emun iyan haazà, ne kenà a iyan ed-ulaula zutun te mezaat, kekenà, iyan is daan he menge mezaat he kebayà te lawa ku ed-ulaula zutun.

¹⁸ Netuenan ku he wazà minsan hengkey he meupiya he zini ebpuun te mezaat he kebayà te lawa ku, su minsan ke egkesuatan ku te ed-ulaula is meupiya, kenè ku egkeulaula.

¹⁹ Su is ed-ul-ulahan ku, ne kenà iyan sikan is meupiya he egkesuatan ku, kekenà, iyan is mezaat he igkeepes ku he ed-ul-ulahan ku.

²⁰ Ne emun ed-ul-ulahan ku is kenè ku pezem ed-ul-ulahan, ne kenà a iyan ed-ulaula kayi, kekenà, iyan is mezaat he kebayà te lawa ku he iyan ebpuunan dutun te mezaat he ulaula.

²¹ Ne layun iring kayi is egkehitavù dini te kedì, ne emun ed-ulaula a pezem te meupiya, egkeeg̵en a te mezaat he kebayà he zini te lawa ku.

²² Ne sumalà is egkesuatan te g̵ehinawa ku, utew ku pezem egkesuati is kedtumana te egkesuatan te Megbevayà.

²³ Iyan, dini te lawa ku, selakew is ebayàbayà kedì su edsug̵uen a te menge mezaat he kebayà te lawa ku he supaka ku is hustu he ulaula he egkesuatan te g̵ehinawa ku. Uripen a te mezaat he kebayè ku, ne ebpeketuman a te suat te lawa ku.

²⁴ Utew merasey is egkeulaula ku! Hentei is ebpekevelukas kedì kayi te kegkeuripena kedì kayi te mekesesalà he lawa ku he midhukuman en te kemetayen?

²⁵ Ne utew zekelà is kebpeselemati ku te Megbevayà su pinaag̵i te Nengazen tew he si Jesu Kristu nevelukasan e en! Ne egkesavut niw en is egkeulaula ku. Su sakup is gehinawa ku te Megbevayà, ne is lawa ku, ne sakup mulà te mezaat he kebayè din.