Ruma 6 - Manobo Western Bukidnon

Minatey ki Iring ki Kristu

¹ Tutuu iyan he ingkeg̵ag̵ew ki en te Megbevayà. Ne tenged kayi zuen buwa etew he ebpekekag̵i he meupiya ke kenè ta ed-engkezan is ked-ulaula te mezaat su wey mekeiseg is kebpaahaa kenita te Megbevayà te g̵ag̵ew zin pinaag̵i te kebpeseyluwa zin kenita.

² Ne kenà heini egkehimu su kenà egkehimu he ebpeniguduwan ta te ed-ulaula is mezaat su wazè en kelavet kenita te mezaat he ulaula. Su iring ki te minatey he naawè en diyà te kandin is daan he untung din.

³ Netuenan te en is neulaula zutun te kebewtismuwi kenita. Su nebewtismuwan ki he tuus te zuen en kebpekidsevaha ta ki Jesu Kristu ne pinaag̵i zutun ibpesavut daan kenita he zutun te kebpehimatey ni Jesus, henduen te iyan ki mibpatey.

⁴ Su pinaag̵i te kebewtismuwi kenita tenged te elili ta si Jesus, nehimu he iring te iyan ki minatey wey inleveng duma kandin. Ne nehimu heini su wey meveg̵ayi ki te veg̵u he untung iring te mibanhew si Kristu pinaag̵i te g̵ehem te Amey tew he Megbevayà.

⁵ Su emun minatey ki zuma ki Kristu tenged te elili ta sikandin, kenè en ebperis he ebeg̵ayan ki zaan te veg̵u he untung iring te mibeg̵ayan daan sikandin te veg̵u he untung hein nevanhew sikandin.

⁶ Su netuenan tew he is daan he mesinupaken he kegkeetew tew, ne iring te inransang duma ki Kristu ziyà te krus su wey mebpatey. Ne tenged kayi, egkeawà is layun tew kebpekesalà ne human dutun kenè kiw en egkeuripen te ked-ulaula te mezaat.

⁷ Su is minsan hentei he minatey en, ne kenè en sikandin egkeuripen te mezaat he kebayè din.

⁸ Ne nesavut te en he zutun te kebpatey ni Kristu ne minatey ki zuma kandin su elili tew sikandin. Ne tenged kayi egkesavut ta zaan he egkevanhew ki zaan, ne zuen te en untung duma kandin.

⁹ Netuenan tew he g̵eina te nevanhew en si Kristu ne kenè en egkehimu he ebpatey pa maan sikandin su wazè en gehem te kemetayen diyà te kandin.

¹⁰ Kesevaha zà is kebpehimatey zin he elili te langun he menge etew, ne netengkaan en haazà ne tenged kayi naawè en diyà te kandin is kegkesemuki kandin te salè tew. Ne g̵untaan nevanhew en, ne nehimu is untung din he igkezalig te Megbevayà.

¹¹ Ne iring din ded daan, tentenuzi niw he g̵eina te minatey ki en he zuma ki Kristu, naawè en daan dini te kenita is kegkesemuki kenita te salè ta, ne pinaag̵i zaan ki Jesu Kristu imbeg̵ey en kenita is beg̵u en he untung, ne kinahanglan he igkezalig daan te Megbevayà heini is beg̵u en he untung ta.

¹² Ne tenged kayi, menge suled, kenè te en idtug̵ut he iyan ebayàbayà te menge lawa ta he melemu ebpatey, is mezaat he kebayè dan. Su emun idtug̵ut ta heini, egkepezumdumahan ta is menge mezaat he suat te lawa ta.

¹³ Kenè ta egemiten is minsan hengkey he vahin te lawa ta te ked-ulaula te mezaat, kekenà, idtug̵ut ta he iyan ebayàbayà kenita is Megbevayà su zait heini kenita te nelibri en te kemetayen ne mibeg̵ayan te veg̵u en he untung. Ne idtug̵ut ta he iyan egamit te lawa ta is Megbevayà wey ta meulaula is metazeng.

¹⁴ Su kenè en kinahanglan he iyan ebayàbayà kenita is mezaat he kebayè ta su kenè ta iyan edserig̵an is kedtumana te kesug̵uan, kekenà, iyan ta edserig̵an is kedtavang wey kegkeg̵eg̵awi te Megbevayà kenita.

Is Uripen te Ketazeng

¹⁵ Ne kunaan buwa te zuma ke tenged te kenè en kinahanglan he tumana te pa is kesug̵uan, wey tenged te ingkeg̵ag̵ew ki te Megbevayà, ne egkehimu he ebpeniguduwan te pa is ked-ulaula ta te mezaat, iyan, kenà iyan haazà egkehimu.

¹⁶ Su netuenan niw he ke ebpesakup ki te minsan hentei su wey ki zin meveyveyai, egkehimu ki en he iring te uripen din. Ne iring din ded daan is etew he ebpilien din he iring te egalen din is mezaat he kebayè din. Ne idsilut kandin is kemetayen he wazè din pidtemanan. Ne is etew mulà he ebpesakup te Megbevayà ne ed-isipen te Megbevayà he metazeng sikandin.

¹⁷ Dengan iring te nengeuripen kew te mezaat he kebayà, iyan, guntaan utew zekelà is kebpeselemati ku te Megbevayà su mibpurungan niw te edtuman is tutuu he tuluuwen he impenurù keniyu.

¹⁸ Nevelukasan kew en te Megbevayà, ne nehimu kew en he menge sulug̵uen din he metazeng en is ed-ul-ulahan niw.

¹⁹ Umba insempitè ku is egkeulaula te uripen su wey melemu niw mesavut is ibpesavut ku. Su zengan iring te mibpeuripen kew te mezaat he kebayà ne ingkesuat niw he ed-ul-ulahan te lawa niw is menge meremerik wey mezaat he ulaula he layun ed-iseg he mezaat. Iyan, guntaan kinahanglan he himuwa niw is lawa niw he metazeng he sulug̵uen te Megbevayà wey niw metuman is egkesuatan din.

²⁰ Ne zengan, hein kemulu kew pa nengeuripen te mezaat he kebayà, wazè niw hanew te metazeng he ulaula.

²¹ Ne wazà pulus he nekuwa niw te ked-ul-ulaha niw zengan te menge mahawag he g̵untaan utew niw en igkeeled. Su emun ebpeniguduwan te etew is iring dutun, iyan edungguan din is kemetayen he wazè din pidtemanan.

²² Iyan, guntaan, nevelukasan ki en te Megbevayà, ne nelibri ki en te kebpekeulaula ta te mezaat. Ne tenged kayi menge sulug̵uen ki en te Megbevayà, ne utew zekelà is pulus kayi kenita su ebpeketuman ki en te egkesuatan din, ne iyan rimeg̵as kayi te mid-ulaula te Megbevayà is kegkeveg̵ayi kenita te untung he wazà pidtemanan.

²³ Ke zuen etew he ebpevayàbayà te suat te mekesesalà he lawa zin ne zuen silut kandin he iyan is kemetayen he wazè din pidtemanan. Iyan, is etew mulà he edtuuwan din si Jesu Kristu he Nengazen tew, duen ibeg̵ey kandin te Megbevayà he iyan is untung he wazè din pidtemanan.