Ruma 2 - Manobo Western Bukidnon

Is Hukum te Megbevayà

^1-2 Netuenan ta he utew metazeng is idsiluti te Megbevayà te menge etew he ed-ulaula te menge mezaat he iring kayi, iyan, sikew is egkag̵i he utew mezaat heini is menge ulaula kayi te menge etew, wazè nu zaan kebpekeg̵awas su edsudien nu is mezaat he ulaula te zuma, iyan, mezaat daan is ed-ul-ulahan nu. Ne tenged kayi zutun te kedsudia nu kandin, nesudì nu zaan is kenikew he ulaula.

³ Ne emun edsilutan te Megbevayà is ed-ulaula te mezaat, sikew is ed-ulaula zaan te mezaat, ne edsudì ka te menge zuma nu, iyan ke pe be kenà siluti zin daan.

⁴ Kunaan nu vuwa ke g̵eina te utew mepelevayen wey metulanged is Megbevayà, ne kenè en kinahanglan he ebpezumdumahan nu is menge lalag din. Iyan, iyan ketezengan ke maan is utew velig̵eg̵awen is Megbevayà su ed-eg̵aken ke zin su wey nu meiniyug̵i is mezaat he ulaula.

⁵ Ne minsan pa zutun, mezesen pa utew is gehinawa nu ne kenè ka egkesuat he ed-iniyug te mezaat he ulaula; ne kada andew ed-iseg ebmeveg̵at is silut he idrasey kenikew keuzemà dutun te andew te kedsilut te Megbevayà. Ne zutun he timpu ibpeehè din kenitew is metazeng he kedhukum din.

⁶ Su ibeg̵ey zin diyà te langun is dait he ibeg̵ey te kada etew sumalà is mid-ulaula zan.

⁷ Iyan, duen menge etew he edhemenan dan is meupiya he ulaula su iyan ed-isipen dan layun is kedelig̵a wey is kedtulusa kandan keuzemà te Megbevayà wey is kegketehuza zin kandan keuzemà. Ne untung he wazè din pidtemanan is ibeg̵ey zin kandan.

⁸ Iyan, duen daan duma he menge etew he iyan dan ed-isipen is kandan he egkesuatan ne kenè dan edtuuwan is tutuu he tuluuwen, kekenà, iyan dan edtumanen is kenà hustu. Ne kenà deisek dà is pauk te Megbevayà he ibpeehè din kandan, kekenà, utew meveg̵at is idsilut din kandan.

⁹ Su is langun he menge etew he ed-ulaula te mezaat, lavew en is Hudiyu pehendiyà te kenà Hudiyu, kemeresayan wey kegkeseeng is idsilut kandan.

¹⁰ Iyan, is menge etew he ed-ulaula mulà te meupiya, lavew en is Hudiyu pehendiyà te kenà Hudiyu, edtulusen sikandan keuzemà te Megvevayà, ne ibpetehuzan din sikandan ne ibeg̵ey zin diyà te kandan is melinawen he kebpekesavuk,

¹¹ su is Megbevayà, wazè din ibpelavi te minsan hentei.

¹² Is menge etew he kenà menge Hudiyu, wazè dan metueni ke hengkey is insug̵ù te kesug̵uan he imbilinbilin ni Moises. Ne ke ebeelan dan is mezaat, edhukuman gihapun sikandan keuzemà te Megbevayà, iyan, kenè din egemiten is kesug̵uan dutun te kedhukumi zin kandan, ne idsilut din kandan is kemetayen he wazè din pidtemanan. Ne is menge etew he Hudiyu, netuenan dan mulà is insug̵ù dutun te kesug̵uan, ne emun ebeelan dan is mezaat, edhukuman sikandan te Megbevayà sumalà is nesupak dan dutun te kesug̵uan.

¹³ Su emun iyan ta edserig̵an is kesug̵uan, kenè egkehimu he ed-isipen ki te Megbevayà he metazeng pinaag̵i zà te kebpemineg te insug̵ù dutun te kesug̵uan, kekenà, kinahanglan he wazà minsan hengkey he sayep ta zutun te kedtumana ta te kesug̵uan.

¹⁴ Is menge etew he kenà menge Hudiyu, wazà sikandan mesayud te kesug̵uan he imbilinbilin ni Moises, iyan, duen timpu he egketuman dan is insug̵ù dutun te kesug̵uan su minsan pa te kenè dan egketuenan is kesug̵uan, duen diyà te g̵ehinawa zan ebpekepenurù kandan ke hengkey is meupiya he ed-ul-ulahan. Ne tenged dutun ebpekekag̵i ki he zuen kesug̵uan diyà te g̵ehinawa zan.

¹⁵ Pinaag̵i te menge ulaula zan he meupiya egketuusan ta he ibpenurù kandan te g̵ehinawa zan is insug̵ù te kesug̵uan. Netuenan dan diyà te isip dan ke hengkey is meupiya wey ke hengkey is mezaat he ed-ul-ulahan su zuen ke egkeg̵iyen dan he meupiya is ulaula zan ne zuen ke keg̵iya zan he mezaat.

¹⁶ Ne kenà heini egkelipatan te Megbevayà keuzemà te andew he zutun pinaag̵i ki Jesu Kristu edsusiyen din is minsan in-eles he menge isip te langun he menge etew. Iyan heini ibpenurù pinaag̵i kayi te Meupiya he Tudtulanen he idsangyew ku.

Is Kesug̵uan wey is Menge Hudiyu

¹⁷ Ne sikiyu zaan is menge zuma ku he menge Hudiyu, kunaan niw ke egkeserig̵an niw is kedtumana niw te kesug̵uan ne ibpezalig niw is upakat niw te Megbevayà.

¹⁸ Netuenan niw is egkesuatan te Megbevayà, ne nesavut niw ke hengkey is hustu he ed-ul-ulahan su impenurù keniyu is kesug̵uan.

¹⁹ Kunaan niw ke iyan kew ebpekeag̵ak te menge etew he nengelakap is isip dan, ne kunaan niw zaan ke iyan kew sulù he ebpeketayew te ibayè dan pehendiyà te Megbevayà.

²⁰ Kunaan niw ke iyan kew ebpekepenurù te menge etew he wazà mesayud te Megbevayà, ne kunaan niw zaan ke iyan kew ebpekepenudlù te menge etew he sikan pa mekeistudyu te hustu. Umba iyan heini ed-isipen niw su insarig keniyu te Megbevayà is kesug̵uan ne utew hustu is ketau wey utew tutuu is tuluuwen he ebpuun dutun.

²¹ Ebpekepenurù kew te zuma, ne maan is kenè niw ebpenuruen is gehinawa niw? Su ibpenurù niw he kenà meupiya is kebpenakew, iyan, tekawen kew!

²² Ibpenurù niw he mezaat is kegkevuta ta te kenè ta esawa, iyan, egkevuten niw is kenè niw esawa! Utew niw igkeepes is ledawan he ed-ezapen te kenà Hudiyu, iyan, edseled kew zutun te valey he zutun ed-ezapa is menge ledawan wey kew mekepenakew.

²³ Ibpezalig niw is kedtumana niw te kesug̵uan, iyan, edsupak kew g̵ihapun te kesug̵uan, ne tenged kayi egkesudian is Megbevayà.

²⁴ Ne mehitenged kayi, duen impesurat dengan te Megbevayà he edhenduen te, “Tenged keniyu te menge Hudiyu, is menge etew he kenà Hudiyu, edsumpeliten dan is Megbevayà.” Iyan haazà impesurat dengan.

²⁵ Sikiyu is menge Hudiyu, kunaan niw ke zekelà is pulus te kebpesirkunsidar niw, ne zuen iyan pulus te kebpesirkunsidar ta emun egkepurungan ta te edtuman is kesug̵uan, iyan, ke kenè ta egkepurungan te edtuman is kesug̵uan ne iring ki zed te menge kenà Hudiyu he wazè mebpesirkunsidar.

²⁶ Ne iring din ded daan penenglitan, ke zuen etew he kenà Hudiyu ne egkepurungan din te edtuman is kesug̵uan, edewaten sikandin gihapun te Megbevayà he iring te nesirkunsidar en.

²⁷ Ne minsan ke kenà Hudiyu sikandin, pinaag̵i te kedtumana zin te kesug̵uan, igkepeehè din he edsilutan kew is menge Hudiyu te Megbevayà su edsupak kew mulà te kesug̵uan. Ne iyan kew pezem kes mibilvilinan te kesug̵uan ne iyan kew nesirkunsidar!

²⁸ Su is tutuu he Hudiyu, ne kenà iyan dà is Hudiyu he midtuusan is lawa zin pinaag̵i te kedsirkunsidara kandin, su is tutuu he kedsirkunsidar, ne kenà iyan is kedtuusi te lawa.

²⁹ Ne iring din ded daan su is tutuu he Hudiyu, ne iyan is etew he midtuusan te Megbevayà is gehinawa zin pinaag̵i te Wag̵as he Mulin-ulin, ne kenà pinaag̵i te kedtumana te kesug̵uan. Ne is etew he iring kayi, ne egkehimu he kenà sikandin egkezalig te menge zuma zin he etew, iyan, egkezalig sikandin mulà te Megbevayà.