Ruma 15 - Manobo Western Bukidnon

Is Egkesuatan te Zuma he Etew

¹ Ne sikitew is meheg̵et is kedtuu te Megbevayà, kinahanglan he ed-entusen ta is kenè ta ked-ul-ulaha te ulaula he ibpekesalà te menge zuma ta he kenè pa meheg̵et is kedtuu zan. Ne kenè ta iyan idteg̵el is kenita he egkesuatan,

² kekenà, iyan ta ebpen-ahaan is igkesuat te zuma ta su wey meheg̵et is kedtuu zin.

³ Su si Kristu, wazè din isipa is kandin he egkesuatan su insurat dengan is midtagnà he menge lalag din diyà te Megbevayà he edhenduen te, “Is menge mezaat he lalag te menge etew he insulè dan kenikew, ne iyan daan kedsulaa zan kediey.”

⁴ Su is minsan hengkey he insurat dengan he Lalag te Megbevayà, ne umba impesurat din su wey kiw mepenurù. Su pinaag̵i te Lalag te Megbevayà ibpenurù kenitew is kebmeinentusen te kemereg̵enan wey edsembag̵an kiw su wey kenà maawà is kebpeebuta tew te meupiya he egkeulaula keuzemà.

⁵ Is Megbevayà, ne iyan edsambag kenitew wey ebeg̵ey kenitew te kebmeinentusen te kemeresayan. Berakat he himuwa zin he mesevaha is gehinawa niw wey isip niw kayi te kedsundani niw ki Jesu Kristu.

⁶ Ne emun iyan haazà ne human egkesevaha is kedalig niw te Megbevayà tew wey Amey te Nengazen tew he si Jesu Kristu.

Is Kedtuu te Kenà Menge Hudiyu

⁷ Is menge zuma niw he tumutuu, ne zewata niw he iring te menge tempezè niw en te pused niw su midawat kew zaan ni Kristu he iring te tempezè din en te pused. Ne emun ed-ul-ulahan niw heini egkezalig is Megbevayà.

⁸ Benar is egkeg̵iyen ku he si Kristu, nehimu sikandin he iring te sulug̵uen te menge Hudiyu su wey zin ikepaahà kandan he tutuu iyan he edtumanen te Megbevayà is menge penaad din dengan diyà te menge kepuun dan.

⁹ Ne elin daan ketezengan ke maan is neulaula heini su wey sikiyu is kenà menge Hudiyu, mehizuwi kew zaan te Megbevayà ne tenged kayi ebpekezalig kew zaan kandin. Su zuen insurat he lalag ni Kristu ziyà te Megbevayà he edhenduen te, “Siak wey is menge etew he kenà menge Hudiyu, utew zekelà is kebpeselemati zey kenikew ne egkentahan ku is kedalig kenikew.”

¹⁰ Ne zuen pa egkeehè ta ziyà te insurat he Lalag te Megbevayà he edhenduen te, “Sikiyu is menge etew he kenà menge Hudiyu, tampu kew te kelipey su iring kew en te menge Hudiyu, sikan is daan he nengepilì te Megbevayà.”

¹¹ Ne zuen pa zaan edhenduen te, “Sikiyu is langun he menge etew he kenà menge Hudiyu, delig̵a niw is Nengazen; ne sikiyu is tivuuk he menusiyà, delig̵a niw sikandin.”

¹² Ne zuen pa migkag̵i zengan ni Esaias he egkevasa ta, ke sikandin te, “Duen ebpekeuma he kevuwazan ni Isai ne iyan sikandin edhadì te menge etew he kenà menge Hudiyu. Ne iyan sikandin edserig̵an dan,” ke sikandin.

¹³ Is Megbevayà he iyan puunà te langun he meupiya he ebpeebuten tew, berakat he veg̵ayi kew zin te utew zekelà he kelipey wey melinawen he kebpekesavuk tenged te kedtuu niw kandin su wey pinaag̵i te g̵ehem te Wag̵as he Mulin-ulin meheg̵et is kebpeebuta niw te langun he meupiya he egkezawat niw keuzemà.

Si Pablo Sugù Diyà te Kenà Menge Hudiyu

¹⁴ Menge suled, netuenan ku en he layun meupiya is menge ulaula niw, ne netuenan ku zaan he nepurung niw en mesavut is Lalag te Megbevayà, ne egkehimu en he ebpekepenurù kew te zuma.

¹⁵ Ne minsan pa te iyan heini, kayi te surat ku kenà a egkelenew he edsambag keniyu su zuen mezakel he impenurù keniyu he kenè ku egkesuatan he melipati niw. Umba kenà a egkelenew su mibeg̵ayan a te Megbevayà te keg̵ehem

¹⁶ wey a mehimu he sug̵ù ni Jesu Kristu ziyan te keniyu te menge etew he kenà menge Hudiyu. Henduen te memumuhat a su ke pinaag̵i kedì ebpeketuu is menge etew; egkehimu zan he iring te pemuhat ku he pinaag̵i te kedlumpiyuwi kandan te Wag̵as he Mulin-ulin edewaten te Megbevayà.

¹⁷ Ne tenged te kedtevangi kediey ni Jesu Kristu kenà a egkeeled te kebpenudtul kayi te langun he nehimu ku te sulug̵uen te Megbevayà.

¹⁸ Asal iyan dà igkepenudtul ku is nehimu ni Kristu pinaag̵i kediey. Su pinaag̵i kedì duen menge etew he kenà menge Hudiyu he edtumanen dan en is menge sug̵ù te Megbevayà. Nehimu heini pinaag̵i te impepenudtul kedì, pinaag̵i te impeulaula kedì,

¹⁹ pinaag̵i te menge singyal wey egkein-inuwan wey pinaag̵i zaan te g̵ehem te Wag̵as he Mulin-ulin. Midhipanew a puun diyà te inged he Hiruselim pehendiyà te inged he Iliriku ne mibpurungan ku te ebpesavut is Meupiya he Tudtulanen te keag̵i ni Kristu.

²⁰ Ne egkesuatan ku layun he mepenudtul ku is Meupiya he Tudtulanen diyà te menge inged he wazè pa zutun mezineg is ngazan ni Kristu. Umba ed-ul-ulahan ku heini su wey ku kenà mesublì te ebpenudtul te Meupiya he Tudtulanen is menge etew he netudtulan en te zuma.

²¹ Su netuman ku is insurat he Lalag te Megbevayà he edhenduen te, “Haazà is wazè pa mekezineg te ngazan din, egketuenan dan gihapun ke hentei sikandin. Ne is wazè pa metudtuli, duen timpu he human dan ebpekesavut.”

Is Suat ni Pablo te Kedhendiyà te Ruma

²² Ne tenged kayi te langun he menge vaal ku te ebpenudtul zutun te menge inged, nesanggen a is edhendiyan te keniyu.

²³ Ne g̵untaan te netapus ku en is baal ku kayi te menge inged, wey g̵eina te neug̵et en utew is ked-isipa ku he edhendiyan a,

²⁴ egkeisip ku he g̵untaan human e en ebpekehendiyan te keniyu. Egkesuatan ku he mekehendiyà a te Ispanya, iyan, edtuluy a ziyan te keniyu. Ne emun egkeipus haazà is mevavà he kebpekiduma ku keniyu he igkelangan ku, ne egketevangan a keniyu zutun te kedhipanew ku.

²⁵ Ne g̵untaan egenat ad su edhendiyà a zè pa te inged he Hiruselim su zuen idtavang he ibpehated kedì diyà te menge tumutuu te Megbevayà diyà.

²⁶ Su is menge tumutuu zini te prubinsya he Mesidunya, wey te prubinsya he Gerisya, neisip dan he meupiya ke ebeg̵ey zan te tavang diyà te menge tumutuu he egkengeayuayu ziyà te inged he Hiruselim.

²⁷ Utew meupiya ziyà te g̵ehinawa zan is kebeg̵aya zan kayi te tavang, ne utew hustu zaan heini su zekelà is utang dan diyà te menge tumutuu he Hudiyu ziyà te Hiruselim su pinaag̵i te menge Hudiyu neuwit dini te kandan te kenà menge Hudiyu is Lalag te Megbevayà, ne tenged kayi hustu zaan ke zuen selapì he igketavang dan diyà te menge Hudiyu he egkengeayuayu.

²⁸ Ne emun egketapus en heini is baal ku igkehated ku en heini is selapì he idtavang kandan, ne zutun edhipanew ad maan pehendiyà te Ispanya ne edtuluy a ziyan te keniyu.

²⁹ Ne netuenan ku he ke ebpekeuma a ziyan, utew zekelà is kedtuvazi kenitew ni Kristu pinaag̵i kayi te kebpehendiyan ku.

³⁰ Menge suled, tenged te mahal ziyà te g̵ehinawa niw is Nengazen tew he si Jesu Kristu wey tenged te kebpekedhihizuwè tew he ibeg̵ey kenitew te Wag̵as he Mulin-ulin, edhengyuan ku sikiyu he peniguduwi a keniyu iampù diyà te Megbevayà.

³¹ Iampù niw he kenà a mekeizi te menge etew he kenà tumutuu ziyà te inged he Hiruselim. Iampù niw zaan he ikelipey te menge tumutuu ziyà te Hiruselim heini is selapì he idhated ku kandan.

³² Ne emun egketapus heini, wey ke egkesuatan te Megbevayà, ebpekehendiyan a te keniyu he utew zekelà is kelipey ku ne egkehimu he ebmelinawen is ked-isip-isip ku pinaag̵i te kebpenumbaley ku ziyan te keniyu.

³³ Is Megbevayà he iyan puunà te kelinew, berakat he ulini kew zin.