Ruma 12 - Manobo Western Bukidnon

Is Dait he Ebeelan te Menge Tumutuu

¹ Na, menge suled, tenged te utew zekelà he hizu kenitew te Megbevayà, edhengyuan ku sikiyu he ipeveyveyai niw kandin is lawa niw wey g̵ehinawa niw. Iyan heini ibpemuhat he kenà edhimetayan, ne kinahanglan he wazà igkesawey zuen su wey mesuati te Megbevayà. Ne iyan heini hustu he ked-ezapa niw kandin.

² Kenè niw iringi is menge ulaula te menge etew he kuntada te Megbevayà, kekenà, itug̵ut niw he helina kew te Megbevayà pinaag̵i te kebeg̵uwa zin te isip niw. Ne zutun egkesavut niw human is egkesuatan te Megbevayà, he ke và dà egkeg̵iya, egkesavut niw ke hengkey is menge ulaula he metazeng he egkesuatan he kenà egkesewayan te Megbevayà.

³ Ne tenged te imbeg̵ey kedì te Megbevayà is keg̵ehem te kedsengyawa te lalag din, egkeg̵iyen ku keniyu te langun he kinahanglan he kenè niw isipa he lavew kew te menge zuma niw, kekenà, kinahanglan he hustu is ked-isipa niw te ketau niw sumalà is kedtuu he imbeg̵ey te Megbevayà diyà te kada sevaha keniyu.

⁴ Su is kada sevaha kenitew ne zuen din lawa, ne is menge parti kayi, ne kenà ed-iiring-iring is baal te kada sevaha.

⁵ Ne iring din ded daan, sikitew is menge tumutuu ki Kristu, ne nehimu kiw he iring te lawa zin, ne iyan kiw menge parti zutun. Neubpu is kada sevaha he parti te menge zuma zin he parti.

⁶ Ne zuen ketau he imbeg̵ey te Megbevayà diyà te kada sevaha he parti, asal, kenà ebpeked-iiring haazà is ketau te kada sevaha. Kinahanglan he egemiten ta is ketau he imbeg̵ey kenita. Ne penenglitan ke imbeg̵ey ziyà te sevaha is ketau te kebpesevuta te Lalag te Megbevayà ne kinahanglan he mekeikul heini te tuluuwen he midtuuwan ta.

⁷ Ne emun iyan imbeg̵ey kenita is ketau te kedtavang te menge zuma ta, kinahanglan he ebpeniguduwan ta is kedtavang. Ne emun duen ketau ta te kebpenurù te Lalag te Megbevayà, ne ebpurungan ta is kebpenurù ta.

⁸ Ne emun iyan imbeg̵ey kenita is ketau te kedheg̵eta te kedtuu te menge zuma ta ne iyan heini ed-ul-ulahan ta. Ne emun iyan imbeg̵ey kenita is ketulanged ta te kedtavang te menge etew he egkengeayuayu, ne kinahanglan he edtulanged ki te kedtavang kandan. Ne emun iyan imbeg̵ey kenita is kedumelaha te menge tumutuu ne kinahanglan he ebpurungan ta is kedumala ta. Ne emun iyan imbeg̵ey kenita is kedtavang te menge etew he edlised ne kinahanglan he kenà pinaag̵i te ked-usur is ked-ul-ulaha ta kayi.

⁹ Kinahanglan he kenà tarù is kegkeg̵eg̵awi ta te menge zuma ta. Kinahanglan he utew ta igkeepes is mezaat he ulaula. Edhemenan ta is meupiya he ulaula.

¹⁰ Sikitew is midsusuled pinaag̵i ki Kristu, ibpeehè tew he mahal zini te g̵ehinawa tew is kada sevaha kenitew, ne ibmeupiya te g̵ehinawa tew is kedtahud tew te menge zuma tew.

¹¹ Kenè kiw ebpepepeg̵ul, kekenà, edheg̵eten tew ziyà te g̵ehinawa tew is kedtumana tew te menge sug̵ù te Megbevayà.

¹² Kinahanglan he layun kiw edlipey su zuen utew meupiya he egkezawat tew keuzemà. Ed-entusen tew is menge kemereg̵enan ne layun kiw ed-ampù diyà te Megbevayà.

¹³ Ebeg̵ayan tew te tavang is menge suled tew he egkengeayuayu. Ne ibpepemenahik ta ziyà te valey ta is etew he humuhulevungà.

¹⁴ Is ebpesipala kenita, id-ampù ta ziyà te Megbevayà he tuvazi zin. Ne kenè ta iyan id-ampù he siluti zin.

¹⁵ Ke zuen etew he zuen din igkelipey, melipey kew zaan tenged dutun te kelipey zin. Ne ke zuen etew he zuen igkeseeng din, keseeng kew zaan tenged dutun te igkeseeng din.

¹⁶ Kinahanglan he mesevaha is gehinawa niw te menge tumutuu. Kenè kew mebmepelevawen, kekenà, mebpekiduma kew te menge etew he minus is pid-etawan dan. Ne kenè niw isipa he uluwanen kew kenà sikandan.

¹⁷ Ke zuen ebpesipala keniyu kenè kew mebales. Peniguduwi niw te ed-ulaula is menge ulaula he kenà egkesewayan te minsan hentei.

¹⁸ Himuwa niw is taman te egkehimu niw su wey melinawen is kebpekesavuk niw, ne wazà igkepeuki keniyu te minsan hentei.

¹⁹ Kenè niw, menge minahal ku he suled, velesi is etew he ed-ulaula te mezaat diyà te keniyu, kekenà, pesegdana niw he iyan edsilut is Megbevayà su zuen insurat he Lalag te Megbevayà he edhenduen te, “Iyan a ebales; iyan a edsilut.”

²⁰ Iyan ed-ul-ulahan ta is sambag te insurat he Lalag te Megbevayà he edhenduen te, “Emun egkevitil is kuntada nu, ipekaan nu. Emun egkemezahan, ipeinum. Su emun iyan heini ed-ul-ulahan nu, utew sikandin egkeeled tenged te pesipala zin kenikew.”

²¹ Minsan ke utew mezaat is pesipala kenita kenè ta ebelesan te mezaat su emun ebelesan ta, egkezaag ki su egkeuwit ki te mezaat. Iyan ed-ul-ulahan ta is meupiya he vales ne tenged kayi iyan egkezaag is kuntada ta su egkeuwit sikandin te meupiya.