Ruma 1 - Manobo Western Bukidnon

^1-2 Iyan a si Pablo is teg̵isurat kayi. Uripen a ni Jesu Kristu ne midhimu e zin daan he epustul. Impenaad dengan te Megbevayà pinaag̵i te impesurat din te menge ebpeneuven din he zuen timpu he zuen Meupiya he Tudtulanen he ibpesavut kenitew. Umba mibpilì a he epustul su wey a mekepenudtul kayi te Meupiya he Tudtulanen.

³ Tudtul heini te keag̵i te Nengazen tew he si Jesu Kristu he Anak te Megbevayà. Ne heini si Jesus, nehimu he etew su in-anak sikandin he kevuwazan te tipehuna he hadì he si David.

⁴ Ne is Nengazen tew he si Jesu Kristu, wag̵as sikandin he Megbevayà su anak daan sikandin te Megbevayà su impaahà heini kenitew pinaag̵i te zekelà he g̵ehem te Megbevayà he iyan imbanhew kandin.

⁵ Pinaag̵i ki Jesu Kristu midtuvazan a te Megbevayà su midhimu e zin he epustul, he ke và dà egkeg̵iya, sug̵ù, su wey mevantug si Jesus. Umba mid-ulaula zin heini su wey ku mepenurù is menge etew he kenà menge Hudiyu ziyà te minsan hendei he inged wey zan mekepemineg ne wey zan meketuu ki Jesu Kristu.

⁶ Ne sikiyu is diyan te inged he Ruma, inragkes kew zaan kayi te menge etew su midhimu te Megbevayà is paag̵i wey kew meketuu ne wey kew mehimu he menge sakup ni Jesu Kristu.

⁷ Ne tenged kayi, ebpesuratan ku sikiyu is langun diyan te inged he Ruma he mahal ziyà te g̵ehinawa te Megbevayà he midhimu zin he menge sakup din. Is Amey tew he Megbevayà wey is Nengazen tew he si Jesu Kristu, berakat he ikeg̵ag̵ew kew zan wey iveg̵ey keniyu is melinawen he kebpekesavuk.

Is Ked-ampù ni Pablo

⁸ Iyan idhuna ku keniyu te ebpenudtul is: pinaag̵i ki Jesu Kristu ebpeselematan ku is Megbevayè tew tenged keniyu su nepenudtul ziyà te minsan hendei is kedtuu niw ki Jesu Kristu.

⁹ Tenged te Megbevayà, edhimuwen ku is taman te egkehimu ku wey ku ikesangyew is Meupiya he Tudtulanen mehitenged te Anak din. Ne iyan sikandin nesayud wey ebpeketistig̵us he layun ku sikiyu id-ampù diyà te kandin.

¹⁰ Layun ku sikiyu id-ampù ne edhengyuan ku sikandin he ke egkesuatan din, himuwa zin is paag̵i he mekehendiyan ad human te keniyu.

¹¹ Su utew ku igkesuat is kedhendiyan ku te keniyu, ne egkesuatan ku he ibpenurù ku keniyu is impenurù kediey te Wag̵as he Mulin-ulin su wey meheg̵et is kedtuu niw te Megbevayà.

¹² Ne iyan ibpesavut ku is ebpein-iniyatè kiw te kedtuu.

¹³ Egkesuatan ku, menge suled, he metueni niw he kenà egkeawà dini te isip ku is kegkesuat ku te edhendiyan, iyan, kenè e pa g̵untaan ebpekehendiyan su zuen edsanggen kedì. Egkesuat a he edhendiyan su pinaag̵i te kebpenurù ku, kela ke zuen menge etew ziyan he ebpeketuu ki Jesus, iring te pinaag̵i te kebpenurù ku, duen menge kenà Hudiyu zaan diyà te zuma he menge inged he nemeketuu kandin.

¹⁴ Su iring te zekelà is utang ku te tivuuk he menusiyà ne iyan kebeyazi ku kayi te utang is: ebpenudtulen ku kandan is keag̵i ni Kristu. Kinahanglan he edweliyan ku is nemeketunghà wey is wazà memeketunghà. Kinahanglan he edweliyan ku is menge metau wey is menge paglung.

¹⁵ Tenged kayi, utew ku zaan egkesuati he ibpenudtul ku is Meupiya he Tudtulanen diyan te keniyu he ziyan te inged he Ruma.

Is Gehem te Meupiya he Tudtulanen

¹⁶ Utew zekelà is kedsarig ku te Meupiya he Tudtulanen su emun edtuuwan heini te minsan hentei, puun te menge Hudiyu pehendiyà te kenà menge Hudiyu, edlibriyen sikandin te silut pinaag̵i te zekelà he g̵ehem te Megbevayà.

¹⁷ Su pinaag̵i te Meupiya he Tudtulanen ibpetuenan kenitew te Megbevayà is paag̵i wey kiw zin meisip he metazeng. Ne heini is paag̵i, ne pinaag̵i te kedtuu zà. Su zuen insurat he Lalag te Megbevayà he edhenduen te, “Is etew he nehimu he metazeng pinaag̵i te kedtuu zin, ne iyan ebeg̵ayan te untung he wazè din pidtemanan.”

Is Kebpekesalà te Etew

¹⁸ Is Megbevayà diyà te langit, impeehè din en he utew zin igkepauk is langun he menge mezaat he ulaula te menge etew wey is kenè dan kedtahud kandin. Su pinaag̵i te kelelalung dan egkesanggen is kebpesevuta te tutuu he tuluuwen.

¹⁹ Kinahanglan he edsilutan sikandan su melemu zan pezem ebpekesavut te hustu mehitenged te Megbevayà su midhimu heini te Megbevayà he utew keladu.

²⁰ Su is Megbevayà, minsan te kenà sikandin egkeahà, puun pa te kedlimbag̵a zin te kelibutan, egketuusan sikandin gihapun pinaag̵i te langun he midlimbag din, pinaag̵i te utew zekelà he g̵ehem din he wazè din pidtemanan, wey pinaag̵i te nekag̵i he kegkemegbevayè din. Ne tenged dutun kenà ebpekevarew is minsan hentei he kenè dan egketuenan he zuen Megbevayà.

²¹ Su minsan te nesavut dan en he zuen Megbevayà, wey netuenan dan he zait sikandin he edtehuzen, wazè dan sikandin tehuza, ne wazè dan peselemati is gag̵ew zin kandan, kekenà, nehimu he wazè en pulus te egketag̵ù diyà te isip dan. Ne tenged kayi, iring te nezukileman is menge isip dan su kenè dan en ebpekesavut te hustu he ibpesavut pezem kandan te Megbevayà.

²² Ne minsan pa te egkeg̵iyen dan he metau zan he ed-isip, iyan, nehimu zan en he menge taleng.

²³ Su kenè dan ed-ezapen is tutuu he mekeg̵eg̵ehem he Megbevayà he wazè din kemetayen, kekenà, iyan dan ed-ezapen is menge ledawen he mibeelan dan he iring te menge etew he zuen din kemetayen wey iring te menge tagbis, wey ke menge langgam be, wey ke menge uled.

²⁴ Ne tenged kayi mibpesagdan en sikandan te Megbevayà wey zan meulaula is langun he menge meremerik he ulaula he egkesuatan dan. Ne utew mekeeled-eled is ebeelan dan te lawa zan te kada sevaha.

²⁵ Kenè dan edtuuwan is tutuu mehitenged te Megbevayà, kekenà, tarù is edtuuwan dan. Ed-ezapen dan wey ebpezumdumahan dan is linimbag dà duen, kenà is Nenlimbag. Berakat he wazà pidtemanan te kedelig̵a kandin te menge etew.

²⁶ Ne tenged te mibpesagdan te menge etew is Megbevayà, mibpesagdan din daan sikandan wey zan metuman is menge suat dan he utew mahawag. Minsan is menge vahi, ne kenè en maama is edhulizen dan, su iring dan he vahi is igkeerig̵i zan.

²⁷ Ne iring din ded daan is menge maama; kenè en bahi is edhulizen dan su minsan is iring dan he maama ne igkeerig̵i zan. Ne utew mekeeled-eled is ed-ul-ulahan dan te menge lawa zan. Ne pinaag̵i te menge kelelalung he ulaula zan nezeetan dan is lawa zan ne nehimu heini he silut he kenè dan egkelikayan.

²⁸ Ne g̵eina te egkeg̵iyen dan he wazè en pulus te kedtuuwi te Megbevayà, mid-iniyug̵an sikandan te Megbevayà ne tenged kayi iyan ebayàbayà kandan is kelelalung he netag̵ù diyà te isip dan ne ed-ul-ulahan dan is kenà hustu.

²⁹ Iyan dà egkeisip dan is kelelalung wey is mezaat he ulaula. Leg̵ezen dan ne meremerik is ulaula zan. Egkesina sikandan; ebpemumunù dan; ebpeeg-eg̵etè dan; edtarùtarù dan; ne ebpesipelahan dan is menge zuma zan. Ed-ituk dan,

³⁰ ne edsudien dan is menge zuma zan. Menge kuntada sikandan te Megbevayà. Ne wazè dan kedtahud te minsan hentei. Ebpelavew zan ne edantal zan. Utew zan metau he ed-isip te menge veg̵u he paag̵i te kebaal te mezaat. Kenè dan ebpemineg te menge g̵inikanan dan

³¹ ne wazè dan kedsavut te minsan hengkey he meupiya he ulaula. Kenè dan edtumanen is menge pesarig dan ne wazè dan gag̵ew wey hizu.

³² Netuenan dan pezem he ke ed-ul-ulahan dan is menge iring kayi, edsilutan sikandan te kemetayen he wazè din pidtemanan, iyan ebpeniguduwan dan gihapun, ne kenà duen dà taman, su utew zan egkesuat emun egkeehè dan is ulaula te zuma he iring ded te kandan.