Pilipus 4 - Manobo Western Bukidnon

Is Menge Telaan ni Pablo

¹ Umba menge minahal ku he menge suled, heg̵eta niw is kedtumana niw te menge sug̵ù te Nengazen. Utew a mibulung keniyu. Igkelipey ku sikiyu wey ibmeupiya kew te g̵ehinawa ku.

² Edhengyuan ku sikiyu, Ibudya wey Sintiki, he melinew is kebpekid-upakat niw su telesuled kew tenged te upakat niw te Nengazen.

³ Ne sikew zaan is timbang ku ziyan, egkesuatan ku he tevangi nu heini is menge vahi wey zan heini metuman su mibpenigudu zan te kedtavang kedì te kedsengyawa ku te Meupiya he Tudtulanen. Ne elin daan si Clemente wey zuen pa menge zuma niw he midtavang kedì. Is menge ngazan dan te langun, ne nekesurat en diyà te libru te Megbevayà he zutun inlista zin is mibeg̵ayan te untung he wazè din pidtemanan.

⁴ Egkeg̵iyan ku sikiyu he sigudu kew lipey tenged te kebpekidsevaha niw te Nengazen, su meupiya ke zekelà layun is kelipey niw.

⁵ Kinahanglan he peketulanged kew te minsan hentei su meg̵aan en edlikù is Nengazen.

⁶ Kenè niw ikeseeng is minsan hengkey he egkeulaula niw, kekenà, emun ed-ampù kew buyua niw ziyà te Megbevayà is egkinehenglanen niw ne emun ebuyù kew, ne kinahanglan he peselemati niw en he zaan.

⁷ Ne zutun wazà samuk diyà te isip niw wey g̵ehinawa niw su pinaag̵i te kebpekidsevaha niw ki Jesu Kristu ibeg̵ey keniyu te Megbevayà is melinawen he g̵ehinawa he kenà egkesavut te minsan hentei he etew.

⁸ Ketepusan heini, menge suled, he menge lalag ku keniyu. Iyan niw itag̵ù diyà te isip niw is meupiya, is dait he igkezelig̵i, is tutuu he tuluuwen, is metazeng wey hustu wey mekempet he ulaula, wey is minsan hengkey he igkehimu te minsan hentei he egketahud.

⁹ Pen-ul-ulaha niw heini is langun he impenurù ku, wey impesavut ku keniyu pinaag̵i te menge lalag ku wey pinaag̵i zaan te menge ulaula ku. Ne zutun, is Megbevayà he iyan puunà te kelinew tew te wazè din pidtemanan, iyan ed-ulin keniyu.

Is Kedtevangi ki Pablo

¹⁰ Utew zekelà is kelipey ku wey is kebpeselemati ku te Nengazen su nehimu en maan he ingkepeehè niw is gag̵ew niw pinaag̵i kayi te impeuwit niw kedì. Kenè ku iyan ibpesavut keniyu he wazè niw gag̵ew kedì dutun te nengehuna he timpu, kekenà, wazè niw pa zutun paag̵i wey niw ikepaahà is gag̵ew niw.

¹¹ Kenà iyan igkeg̵iya ku kayi is tenged te zuen kurang ku te menge egkinehenglanen ku, su minsan ke kenà utew meupiya is kebpekesavuk ku, impenurù kedì te Megbevayà he kinahanglan he mebmeupiya g̵ihapun is gehinawa ku.

¹² Neseg̵azan ku en is kegkealang-alang wey is neezenan te langun he egkinehenglanen ku. Ne neleyaman ku en heini he egkeulaula te minsan hendei wey te minsan keenu, se zuen keuyag̵an ku se wazè ku keuyag̵an, ke neeezenan a wey ke egkealang-alang a.

¹³ Egkehimu ku is minsan hengkey he ibpeulaula kedì tenged te tavang ni Kristu he iyan edlig-en kedì.

¹⁴ Ne minsan pa te iyan heini, utew kew metulanged su midtevangan a keniyu kayi te menge seeng ku he mezakel.

¹⁵ Sikiyu is menge tigPilipus, netuenan niw he zutun te kedhipanew ku puun diyan te prubinsya he Mesidunya hein aney ku en ipenudtul ziyan is Meupiya he Tudtulanen, iyan kew zà menge tumutuu he midtavang kedì. Wazà duma he gurupu te menge tumutuu he nehimu he menge timbang ku su iyan kew zà nekeveg̵ey kedì te selapì.

¹⁶ Ne hein diyè e pa te Mesidunya, diyà te inged he Tiselunika, ne layun kew ebpeuwit te tavang niw kedì.

¹⁷ Kenè ku iyan igkekeg̵iya kayi su wey a layun mekezawat te ibeg̵ey niw, kekenà, egkesuatan ku he zekelà is suhul keniyu te Megbevayà.

¹⁸ Nezawat ku en is impeuwit niw ne utew subra is imbeg̵ey niw. Ne kenà ad egkealang-alang su inhated en ni Ipepruditu zini is idtavang niw kedì. Iring heini te pemuhat he utew mehemut, he ke và dà egkeg̵iya, utew igkesuat te Megbevayà.

¹⁹ Ne is Megbevayà, iyan daan ebeg̵ey keniyu te langun he kinahanglan niw tenged te kebpekidsevaha niw ki Jesu Kristu su utew zekelà is ketig̵eyunan din.

²⁰ Berakat he zelig̵a is Amey tew he Megbevayà te wazà pidtemanan.

Menge Pengemusta

²¹ Ebpengemusta a keniyu te langun he menge tumutuu ki Jesu Kristu ziyan. Is menge suled tew he zuma ku kayi, ebpengemusta zan daan keniyu.

²² Ne is langun he menge zuma ku he tumutuu kayi te inged, lavew en is menge suled tew he zini ed-ubpà te valey te hadì, ebpengemusta zan daan keniyu.

²³ Berakat he ikeg̵ag̵ew kew is langun te Nengazen tew he si Jesu Kristu. Iyan a si Pablo.