Nengeulaula 9 - Manobo Western Bukidnon

Is Kebpeketuu ni Seulu

¹ Igkikinehendekè pa zutun si Seulu te menge sumusundan te Nengazen he si Jesus su ebpenhimetayan din sikandan.

² Ne tenged dutun midhendiyà sikandin te lavew he memumuhat ne midhangyù he pesurati zin is menge egalen te menge simbahan te menge Hudiyu ziyà te inged he Demasku; ne hengyua zin he itug̵ut dan ki Seulu is kedekepa te minsan hentei he egkeehè din, maama se vahi, he edsunud te paag̵i ni Jesus. Ne sikan is egkengezakep din, ebekusen ne ed-uwiten diyà te Hiruselim.

³ Ne hein uvey en si Seulu te inged he Demasku, netekewtekew sikandin te zuen utew merayag he ebpuun te langit he neketayew kandin.

⁴ Ne nepiley sikandin diyà te tanà ne nezineg din is egkag̵i te, “He Seulu, maan is ebpesipelahan a kenikew?”

⁵ Ne migkag̵i si Seulu te, “Hentei ka?” Ne midtavak te, “Iyan a si Jesus kes ebpesipelahan nu.

⁶ Enew ka ne laus ka ziyà te inged ne zuen dutun etew he ebpenurù kenikew te ebpeveelan ku kenikew.”

⁷ Ne midteren dutun is menge zuma ni Seulu, ne wazè dan mekekag̵i; nahandek dan su nezineg dan haazà is egkag̵i, iyan, wazè dan naahà.

⁸ Ne mid-enew si Seulu ne hein migimerat, ne kenè en ebpekeahà ne mid-ag̵ak dan dà sikandin pehendiyà te Demasku.

⁹ Ne seled te tetelu he andew is kenà ebpekeahà ne wazè din nekaan wey neinum.

¹⁰ Ne zutun te inged he Demasku, duen sumusundan ni Jesus he egngezanan ki Eneniyas. Ne mibpaahà kandin is Nengazen he si Jesus ne migkag̵i te, “He Eneniyas.” Ne midtavak si Eneniyas te, “Hei e zed.”

¹¹ Ne migkag̵i is Nengazen te, “Hendiyè ka te kersada he egngezanan te Metandang. Ne ziyà te valey ni Hudas, iinsè nu is etew he tigTarsu he egngezanan ki Seulu. Kemulu en ed-ampù.

¹² Ne pinaag̵i te g̵ehem ku, neehè ke zin en, Eneniyas, is edseled diyà te kandin he edepenet kandin wey mepuwasi is ked-ehè din.”

¹³ Ne midtavak si Eneniyas te, “Nengazen, netuenan ku pinaag̵i te mezakel he etew is utew memezaat he mid-ulaula zin diyà te menge sumusundan nu ziyà te Hiruselim.

¹⁴ Ne midhendini te Demasku su intug̵ut kandin te menge punuan he memumuhat is kebpendekepa te langun he ebpengumew-umew kenikew.”

¹⁵ Ne migkeg̵iyan si Eneniyas te Nengazen te, “Beyai nu su nepilì ku sikandin wey zin ikesangyew is ngazan ku ziyà te menge etew he kenà Hudiyu wey minsan diyà te menge hadì wey ziyà daan te menge zuma nu he kevuwazan ni Israyil.

¹⁶ Ne ibpesavut ku kandin he mezakel is menge kemereg̵enan he egkeeg̵iyan din tenged te sulug̵uen ku sikandin.”

¹⁷ Ne zutun migenat si Eneniyas ne midhendutun te valey ne hein nekeseled midepenetan din si Seulu te egkag̵i te, “Sikew Seulu, is suled ku, midsug̵ù a zini te Nengazen he si Jesus he mibpaahà kenikew ziyà te imbayè nu. Impehendini e zin su wey mepuwasi en is ked-ehè nu, wey ka meulini te Wag̵as he Mulin-ulin.”

¹⁸ Ne zutundutun henduen be te zuen nelekat diyà te mata ni Seulu ne nepuwasan is ked-ehè din. Ne mid-enew ne mibpebewtismu.

¹⁹ Ne migkaan ne nekeulì is desen din. Ne seled te nepipira he andew zutun, mibpekiduma si Seulu te menge sumusundan ni Jesus diyà te Demasku.

Is Kebpenurù ni Seulu Diyà te Demasku

²⁰ Ne zutun midseled te simbahan te menge Hudiyu ne impenurù din is keag̵i ni Jesus. Ne ke sikandin te, “Si Jesus, Anak te Megbevayà.”

²¹ Ne nengeinuinu is langun he nekezineg kandin ne mibpein-inseey zan te, “Kenè be heini kes etew he mibpesipelahan din is langun diyà te Hiruselim he ed-zap ki Jesus? Umba kun midhendini te Demasku su edekepen din is langun he edtuu ki Jesus ne ed-uwiten din kun diyà te Hiruselim ne ibpeetuvang din sikandan te menge punuan he menge memumuhat.”

²² Ne si Seulu, mid-iseg is gehem din te kebpesavut te Lalag te Megbevayà ne kenà sikandin egkezaag te menge Hudiyu ziyà te Demasku su melig-en is menge ketezengan din he si Jesus, iyan sikan is mibpilì te Megbevayà he ibpahadì.

²³ Ne wazà dutun utew meug̵et, mid-uyun is menge Hudiyu he edhimetayan dan si Seulu,

²⁴ iyan, duen midlag̵uy zutun ki Seulu. Ne te maandew wey mezukilem mibentayan te menge Hudiyu is menge g̵emawan dutun te ingkutà te inged su edhimetayan dan si Seulu ke egkeehè dan.

²⁵ Iyan, sevaha zutun he mezukilem midumahan sikandin te menge sumusundan din, ne midteyuntun dan sikandin liyu te kutà he in-ahuk te rinara he teleg̵uey.

Si Seulu Ziyà te Hiruselim

²⁶ Ne midhendiyà si Seulu te Hiruselim, iyan, hein ebpekiduma te menge sumusundan ni Jesus, nahandek dan su kenè dan ebpeketuu he tutuu he sumusundan si Seulu ni Jesus.

²⁷ Ne midtevangan si Seulu ni Bernabe ne miduma zin diyà te menge epustul ne mibpenudtul zin kandan is kebpaahà te Nengazen ki Seulu ziyà te imbayè din, wey is lalag kandin te Nengazen. Ne midtudtul zin daan he si Seulu, minsan te nekuntada zin is menge Hudiyu diyà te Demasku, wazè din kegkehandek te kedsengyawa zin te kedtuu te ngazan ni Jesus.

²⁸ Ne zutun nekeamur si Seulu kandan ne midrig̵urig̵u sikandin diyà te Hiruselim ne wazè din kegkehandek te kedsengyawa zin te kedtuu te ngazan te Nengazen he si Jesus.

²⁹ Ne ebpekidlalag wey ebpekidibati te menge Hudiyu he Gerisyahanen is kineg̵iyan dan. Ne ed-isipen dan en sikandin edhimetayi.

³⁰ Ne hein netuenan haazà te menge zuma zin he tumutuu miduma zan si Seulu ziyà te inged he Sisarya ne zutun impeuntud dan te barku pehendiyà te inged he Tarsu.

³¹ Ne zutun mibmelinew is kebpekesavuk te langun he menge tumutuu ki Jesus diyà te prubinsya he Hudiya, wey Semarya wey Geliliya. Neheg̵et is kedtuu zan ne tenged te layun dan ibpehuna is kedtahud dan te Nengazen wey tenged te kedtavang kandan te Wag̵as he Mulin-ulin mid-iseg dan mebmezakel.

Hein Diyà si Pedro te Lida wey Hupi

³² Ne mibeyaan ni Pedro is langun he menge inged. Ne midhendiyà daan sikandin te menge etew he g̵aked te Megbevayà he ziyà te inged he Lida.

³³ Ne zutun neehè din is maama he egngezanan ki Iniyu. Ne haazà si Iniyu, walu en he tuig he kenà ebpekeenew su minatey is divaluy he lawa zin.

³⁴ Ne migkeg̵iyan sikandin ni Pedro te, “He Iniyu, ebewian ka ni Jesu Kristu.” Enew ka ne tepiza nu is menge g̵elemiten nu te kedhizeg̵à. Ne zutundutun neulian si Iniyu ne mid-enew.

³⁵ Ne naahà te langun he menge meg̵inged dutun te menge inged he Lida wey Sarun he neulian sikandin. Ne pudu zan nemeketuu te Nengazen he si Jesus.

³⁶ Ne ziyà te inged he Hupi, duen sumusundan he vahi he egngezanan ki Tebita, ne emun kineg̵iyan he Gerisyahanen, iyan ngazan din si Durkas, he ke và dà egkeg̵iya, Kuleping. Ne heini is bahi, mezakel is menge meupiya he vaal zin; layun edtavang te egkengeayuayu.

³⁷ Ne zutun he timpu nezeruwan ne minatey. Imperey-as is lawa zin ne insavuk dan diyà te rug̵u he ziyà te zivavew he ziyà te valey zin.

³⁸ Ne is inged he Hupi, uvey te inged he Lida, ne is menge sumusundan diyà te Hupi, hein nezineg dan he ziyà si Pedro te Lida, midsug̵ù dan diyà te kandin is dezuwa he maama he impepenudtul kandin te, “Hendini ka g̵aanggaan.”

³⁹ Ne migenat si Pedro is eduma kandan. Ne hein nekeuma si Pedro miduma zan diyà te rug̵u he ziyà te zivavew. Ne zuen dutun menge valu he vahi ne midlingutan dan si Pedro te ebpemenineg̵ew. Ne impeehè dan kandin is menge kumbalà wey zuma pa he ugelingen he mibpenahì ni Durkas hein uuyag pa.

⁴⁰ Ne impeg̵awas ni Pedro is langun te sikandan ne midluhud sikandin is ed-ampù diyà te Megbevayà. Ne zutun midsineruwan din haazà is lawa zutun te minatey ne ke sikandin te, “He Tebita, enew ka.” Ne migimerat si Tebita ne neehè din si Pedro, ne mid-enew ne mibpinuu.

⁴¹ Ne migewezan ni Pedro is belad din ne impehitindeg din. Ne zutun mid-umew ni Pedro haazà is menge zuma zin he tumutuu he ragkes dutun is menge valu he vahi ne impeehè din kandan si Tebita.

⁴² Ne nekeeneb haazà he tudtul te tivuuk he inged he Hupi, ne mezakel is nemeketuu te Nengazen he si Jesus.

⁴³ Ne si Pedro, mid-ubpaubpè pa zutun, diyà te valey te etew he egngezanan ki Simon he mememaal te g̵elemiten puun te lundis he egenguwen din.