Nengeulaula 28 - Manobo Western Bukidnon

Si Pablo Ziyà te Malta

¹ Ne hein nekeg̵aun key he wazà nemenu kenami, netuenan dey is ngazan dutun te pulu ne Malta.

² Ne is menge meg̵inged dutun, utew key zan midtulengezi. Ed-uzan dutun ne utew meg̵enew ne midtetavun dan.

³ Nengayu si Pablo ne zuen ibpenavuk din he kayu ziyà te hapuy ne zuen mevisa he uled he neinitan he ebpuun dutun te impenavuk din he kayu. Ne migkag̵at diyà te velad ni Pablo.

⁴ Ne is menge etew he meg̵inged dutun hein neehè dan haazà is uled he mibpikit diyà te velad ni Pablo, mibpelelelag̵è dan he egkag̵i te, “Memumunù bes heini su maan is wazà sikandin mekelikey te silut kandin; su minsan te nelibri en sikandin, su wazà melened diyà te zag̵at, egkepatey g̵ihapun.”

⁵ Iyan, bà dà impirik ni Pablo haazà is uled ne neulug dutun te hapuy ne wazà sikandin mekeizi te uled.

⁶ Kunaan dan ke zutundutun ne segugunà edlevag is belad ni Pablo ne egkepiley ne segugunà egkevinteng. Iyan, hein netegteg̵aad dutun he wazà nehitavù ki Pablo, nahalin is isip dan ne ke sikandan te, “Diwata ves heini sikandin.”

⁷ Ne uvey zutun is menge tanà ni Publiyu he iyan edlingahaan dan dutun te pulu. Impepemenahik key zin dutun te valey zin ne mid-elimahan key zin. Ne zutun key med-ubpà taman te tetelu he andew.

⁸ Nezeruwan is amey ni Publiyu. Edhidhizeg̵à su edetengen wey mesakit is getek din. Ne midseled si Pablo zutun te rug̵u zin ne in-ampù din. Midepenetan din haazà ne neulian.

⁹ Ne hein netuenan haazà te menge etew, midhendutun is langun he nengezeruwan dutun te pulu ne nengeulian daan sikandan.

¹⁰ Mezakel is menge vutang he inggasa zan kenami, ne hein mid-untud key en maan te selakew en he barku, ingkarga zan daan dutun te barku is minsan hengkey he egkinehenglanen dey.

Is Kebpekeuma ni Pablo Ziyà te Ruma

¹¹ Hein tetelu en he vulan is ked-ubpè dey zutun ne midlaus key. Mid-untud key te barku he zutun mekeubpà tenged te tipenguzan. Tig-Elihendriya haazà is barku ne iyan igketuusi ta zutun su ziyà te zulung din is ledawan te sereping he ziwata.

¹² Ne midtuluy key ziyà te inged he Sirekusa, ne neketelu pa zutun

¹³ midlaus key ne nekeuma key ziyà te inged he Rihiyu. Ne hein mid-ilis he andew mibpengeramag. Ne haazà is keramag, diyà ebpuun te imbayè dey ne nekezuwa pa zutun, ne nekezunggù key human diyà te inged he Putiyuli.

^14-15 Duen menge tumutuu zutun he neuma zey ne mid-eg̵ut key zan he med-ubpè key ziyà te kandan seled te sengesimana. Ne zutun midlaus key medhipanew pehendiyà te Ruma. Hein nezineg te menge tumutuu ziyà te Ruma he ebpekeuma key en, midsinug̵ung key zan diyà te mirkadu ni Apio wey zuen daan diyà te egngezanan te Tetelu he Valey he Hulevungà. Ne hein naahà sikandan ni Pablo mibpeselamat sikandin te Megbevayà ne neteg̵uan sikandin te kebpekesarig ne zutun nekeuma key human diyà te inged he Ruma.

¹⁶ Ne hein diyè key en te Ruma wazà si Pablo iseled te pirisuwan, kekenà, impeveyàbayà sikandin ke hendei ed-ubpà, asal zuen sundaru he ebantey kandin.

Is Kedwali ni Pablo Ziyà te Ruma

¹⁷ Ne neketelu zutun te kebpekeuma zey mibpenenawag ni Pablo is menge egalen te menge Hudiyu he medtig̵um dan. Ne hein netig̵um dan en migkag̵i si Pablo ziyà te kandan te, “Menge suled, minsan te wazè ku pesipelahi is menge zuma tew he Hudiyu ziyà te Hiruselim ne wazà a zaan medsupak te menge vetasan he imbilinbilin kenitew te menge apù tew, mibpirisu e zan ne impalad e zan diyà te menge upisyal he Rumanu.

¹⁸ Ne is menge Rumanu, mid-imbistige e zan ne ibpaawè e zan pezem su netuenan dan he wazà mid-ulaula ku he zait he igkehimetayi kediey.

¹⁹ Ne hein kenà egkesuatan te menge zuma tew he Hudiyu he ipaawà a, ne g̵eina te wazà ku zaan duma he paag̵i, ebpetavang a te hadì tew zini te Ruma, minsan te wazè ku igkesumbunga kandan te menge zuma ku he Hudiyu.

²⁰ Umba mibpenenawag a keniyu su wey a mekepekidlalag keniyu. Su nepusasan a tenged te kedtuu ku te hadì he ibulus he ebpeebuten tew te menge Hudiyu.”

²¹ Ne migkeg̵iyan dan si Pablo te, “Wazà surat he nezawat dey he ebpuun diyà te prubinsya he Hudiya he ebpesavut mehitenged kenikew. Ne wazà daan nekeuma he zuma zey he ebpuun diyà te Hudiya he zuen din tudtul mehitenged te mid-ulaula nu he mezaat.

²² Egkesuatan dey te ebpemineg is menge penurù nu wey zey mesusi su netuenan dey he is menge tumutuu kayi te tuluuwen he ibpenurù nu, egkuntedahan te menge etew ziyà te minsan hendei.”

²³ Ne midtelaan dan is andew ne hein netuman haazà, mezakel is menge Hudiyu he nengetig̵um dutun te ed-ubpaan ni Pablo. Ne nehepunan si Pablo is edseysey wey ebpesavut kandan ke egkemenumenu is kedhadì te Megbevayà. Impesavut din kandan is insurat dengan ni Moises dutun te kesug̵uan wey is insurat daan te ebpemeneuven te Megbevayà su wey meketuu sikandan he iyan si Jesus sikan is hadì.

²⁴ Ne is duma zutun neketuu te migkag̵i zin, iyan, is duma, wazè dan meketuu.

²⁵ Ne g̵eina te kenè dan egkeuyun, ebpemen-ulì dan en. Ne te kemulu zan pa zutun, impelaus ni Pablo is lalag din te, “Utew tutuu is migkag̵i zengan te Wag̵as he Mulin-ulin diyà te menge kepuun tew pinaag̵i te kebpeneuva zin ki Esaias.

²⁶ Su ke sikandin te, ‘Beyai nu heini is menge etew ne keg̵iyi nu sikandan he ebpurung dan ebpemineg, iyan, kenè dan ebpekesavut. Ebpurung dan edtengteng, iyan, kenè dan ebpekeahà. Umba ibpekag̵i ku heini he menge lalag

²⁷ su heini is menge etew, mibmezesen is isip dan. Edsebpengen dan is telinga zan, edlipezengen dan is menge mata zan. Su emun kenà, ne ebpekeehè dan ne ebpekezineg dan ne egkesavut dan is hustu, ne edsarig dan kedì, ne ebewian ku sikandan.’ ”

²⁸ Ne migkag̵i zaan si Pablo te, “Ibpesavut ku en keniyu he is tudtul te paag̵i te kegkelibriya te Megbevayà te menusiyà, insug̵ù din he ipesavut heini zaan diyà te menge etew he kenà Hudiyu, ne ebpemineg dan mulà.”

²⁹ Ne te nekag̵i ni Pablo haazà mid-awà is menge Hudiyu he utew gerabi is kegkesumpakì dan.

³⁰ Ne seled te zezuwa pa he tuig dutun, diyà med-ubpà si Pablo te valey he mibpilitiyan din ne impepemenahik din is minsan hentei he ebpenumbaley ziyà te kandin.

³¹ Impesavut din kandan ke egkemenumenu is kedhadì te Megbevayà ne impenurù din daan ke hentei is Nengazen tew he si Jesu Kristu. Ne wazè din ieles is kebpenurù din ne wazà daan midawey kandin.