Nengeulaula 24 - Manobo Western Bukidnon

Is Sumbung Diyà te Gubirnedur Mehitenged ki Pablo

¹ Ne nekelima zutun, is lavew he memumuhat, midhendiyà te Sisarya he edumahan te zuma he menge ebmeg̵urangen wey is sevaha he ebugadu he egngezanan ki Tertulu. Mid-etuvang dan ki Gubirnedur Felix ne midtudtul zan is insumbunga zan ki Pablo.

² Ne impetawag din si Pablo ne zutun midhitindeg si Tertulu su ibpesavut din is menge sumbung dan mehitenged ki Pablo. Ne ke sikandin te, “Minahal he Gubirnedur, tenged te ketau nu te edumala kenami, melug̵ayad en is kelinew zini te prubinsya tew wey mezakel is menge keupianan he egkengehimu zini te kenami.

³ Ne utew zey igkelipey heini is langun ne zekelà layun is kebpeselemati zey kenikew.

⁴ Ne kenè ku egkesuatan he meyawat ka te egkeg̵iyen ku, iyan, edhengyuan ku sikew he pemineg̵a nu zè pa is ibpesavut dey kenikew.

⁵ Iyan is: netuenan dey he heini is etew, utew mesamuk, su is menge vaal zin, ne iyan idsinamuk te menge Hudiyu ziyà te minsan hendei. Ne sevaha zaan sikandin he egalen te menge etew he egngezanan te menge Neserinu.

⁶ Ne kenà duen dà taman su edremerikan din pezem is simbahan dey he Valey te Megbevayà, umba midakep dey. Ne edsusiyen dey pezem dutun sikandin sumalà is impenurù kenami te kesug̵uan dey,

⁷ iyan, mibeyaan key te kepitan he si Lisyas ne mibpemug̵el key zin ne mid-ag̵ew zin heini is etew zini te kenami.

⁸ Ne migkeg̵iyan key zutun ni Lisyas he sikami is midsumbung ki Pablo, dini key ibpeetuvang te kenikew. Emun edsusiyen nu heini is etew egketuenan nu zaan diyà te kandin he tutuu is langun he idsumbunga zey kandin.”

⁹ Ne zutun is menge Hudiyu he zuma ni Tertulu midtistig̵usan dan is langun he migkag̵i zin.

Is Ketezengan ni Pablo Zutun te Gubirnedur

¹⁰ Ne mid-uyawan dutun te gubirnedur si Pablo he iyan tuus te ibpekag̵i sikandin. Ne migkag̵i si Pablo ziyà te kandin te, “Netuenan ku he neug̵et ke en he edumala kayi te prubinsya tew, umba kenà a egkelenew he ebpezayag te ketezengan ku kayi te etuvangan nu.

¹¹ Ne emun edsusiyen nu ne petuluy nu egketueni he sepulù en wey zezuwa he andew g̵untaan midtekezeg a is edhendiyà te Hiruselim su edsimba a.

¹² Ne wazà a maahà te menge Hudiyu is ebpekidibati ziyà te simbahan he Valey te Megbevayà wey ziyà te menge simbahan te menge Hudiyu. Ne wazè e zan daan maahà is midhimu te menge kesamuk te menge etew ziyà te minsan hendei ziyà te inged.

¹³ Ne wazè dan daan igkepaahà he tutuu is insumbunga zan kedì.

¹⁴ Iyan, kenè ku igkeeled he egkeg̵iyen ku kenikew he ed-ezapen ku is Megbevayà he ed-ezapen daan dengan te menge kepuun dey. Iyan, heini is tuluuwen he edsunuzen ku, egkeg̵iyen kayi te menge etew he tarù. Ne edsunuzen ku zaan is langun he insurat duen te kesug̵uan he imbilinbilin dengan ni Moises wey is insurat dengan te ebpemeneuven te Megbevayà.

¹⁵ Is edtuuwan kayi te menge etew, edtuuwan ku zaan su edtuu a he is Megbevayà, ebenhawen din keuzemà is langun he etew, se meupiya is ulaula zin se mezaat is ulaula zin.

¹⁶ Ne edhemenan ku is menge meupiya he menge vaal su wey wazà igkesewayi kedì te minsan hentei he etew lavew en is Megbevayà.

¹⁷ Umba midhendiyà a te Hiruselim su nepipire en he tuig is wazà a mekehendiyà. Midhendiyà a su wey ku ikehated is selapì he idtavang diyà te menge zuma ku he Hudiyu wey a zaan mekepemuhat diyà te Megbevayà.

¹⁸ Ne zutun te ed-ul-ulahan ku en heini, neehè e zan diyà te simbahan he Valey te Megbevayà dutun te nepasad ku en is betasan dey te kegkelumpiyuwi. Wazà mezakel he etew he zuma ku; ne wazà daan edsinamuk.

¹⁹ Iyan, duen menge Hudiyu he tig-Asya he zutun daan; deyzey ke iyan sikandan med-etuvang kenikew emun duen igkesumbunga zan kediey.

²⁰ Ne heini zaan is menge etew he edsumbung kedì guntaan, meupiya ke ibpesavut dan en kenikew ke hengkey is salè ku he netuenan dan hein impeetuvang e zan te menge ebmeg̵urangen.

²¹ Su wazè dan netuenan gawas te imbensag ku he menge lalag diyà te kandan he ke siak te, ‘Iyan dà igkesumbunga niw kedì guntaan is kebpeketuu ku he egkengevanhew keuzemà is menge minatey!’ ”

²² Ne zutun midsirahan dè pa ni Felix haazà is husayen su nesayud sikandin he zaan ke hengkey is tuluuwen he midtuuwan te menge tumutuu ki Jesus. Ke sikandin te, “Wey ku en ibeg̵ey is kedì he hukum ke ebpekeuma si Kepitan Lisyas.”

²³ Ne migkeg̵iyan din sikan is serhintu he kenè din engkezi te ebantey si Pablo asal kinahanglan daan he elimahi zin sikandin ne egkehimu he ebpenumbelayan si Pablo te menge emig̵u zin ne egkehimu zaan he edtevangan dan sikandin.

Is Kebpelelag̵à ni Pablo wey ni Felix

²⁴ Ne nepipira he andew zutun, midhendutun si Felix he miduma is esawa zin he Hudiyu he si Drusila. Ne impetawag din si Pablo ne mibpemineg din si Pablo is ebpesavut kandin te kedtuu ki Jesu Kristu.

²⁵ Ne zutun te kebpenurua ni Pablo te metazeng he ulaula, wey kebpurungi te ed-ul-ulahan wey is kebpeebuta te andew te kedsilut, nahandek si Felix ne ke sikandin te, “Ereg ki en dè pa. Ibpetawag ku sikew ke zuen ku timpu.”

²⁶ Egkesuatan pezem ni Felix he mebeg̵ey si Pablo te selapì diyà te kandin, umba layun din ibpetawag wey zin melelag̵i.

²⁷ Ne hein dezuwa en he tuig dutun nekeilis si Pursyu Pistu ki Felix he gubirnedur. Ne si Felix, geina te egkesuatan din he wazà ibmezaat te g̵ehinawa te menge Hudiyu kandin, wazè din libriya si Pablo.