Nengeulaula 22 - Manobo Western Bukidnon

¹ Ke sikandin te, “Menge suled wey menge g̵inikanan, pemineg̵a niw is ibpesavut ku keniyu he menge ketezengan ku.”

² Ne hein nezineg dan he Hinibriyuhanen is kegkag̵i zin, ne mibpurung dan mebpemineg. Ne ke si Pablo te,

³ “Hudiyu e man; diyà a ianak te prubinsya he Silisya, diyà te inged he Tarsu asal kayi a medekelà te Hiruselim su mibpenurù a ni Gemelil. Impenurù kediey is kebpurungi kedtumana te kesug̵uan he nesunud te g̵in-epuan tew. Utew meheg̵et dutun is kedtumana ku te kunaan ku he ibpetuman kedì te Megbevayà su iring a keniyu g̵untaan.

⁴ Ne tenged dutun, mibpesipelahan ku is menge tumutuu ki Jesus ne mibpenhimetayan ku. Mibpendakep ku is menge maama wey menge vahi ne mibpirisu ku.

⁵ Is lavew he memumuhat wey is langun he ebmeg̵urangen tew, ebpeketistig̵us dan he tutuu heini is egkeg̵iyen ku keniyu su mibeg̵ayan e zan te menge surat he impeuwit dan kedì diyà te menge zuma zan he Hudiyu ziyà te inged he Demasku. Umba edhendiyà a su wey ku mezakep dutun is menge tumutuu ki Jesus su ed-uwiten ku sikandan dini te Hiruselim wey mesiluti sikandan.

⁶ Ne zutun te uvey e en diyà te Demasku, neudtu is andew ne netekewtekew a enlag̵i te utew merayag he ebpuun te langit.

⁷ Ne nepiley a ne zutun nezineg ku is egkag̵i te, ‘He Seulu, maan is ebpesipelahan a kenikew?’

⁸ Ne mid-insà a te, ‘Hentei ka?’ Ne ke sikandin te, ‘Iyan a sikan is ebpesipelahan nu he si Jesus he tigNeserit.’

⁹ Ne is menge zuma ku, neehè dan haazà is merayag, iyan, wazè dan mesavut haazà is egkeg̵iyen diyà te kediey.

¹⁰ Ne nekeinsà a te, ‘Nengazen, hengkey is ebpeveelan nu kediey?’ Ne migkag̵i kedì is Nengazen te, ‘Enew ka ne laus ke en diyà te Demasku ne zutun ibpesavut kenikew is langun he intuvad en kenikew te Megbevayà he ebpeveelan kenikew.’

¹¹ Ne nelakap a tenged dutun te midsirang kedì he utew merayag, umba mid-ag̵ak e zà te menge zuma ku pehendiyà te Demasku.

¹² Ne zuen dutun etew he egngezanan ki Eneniyas; metinumanen sikandin te kesug̵uan tew, wey telehuzen te langun he menge Hudiyu he tigDemasku.

¹³ Mibeyaan e zin ne mid-uvayan e zin ne ke sikandin te, ‘Sikew is suled ku he Seulu, berakat he mekeehè ke en maan.’ Ne segugunà mibmerayag is ked-ehè ku ne midtengtengan ku sikandin.

¹⁴ Ne ke sikandin te, ‘Is Megbevayà te menge apù tew, mibpilì ke zin su wey nu maahà is sulug̵uen din he metazeng wey nu zaan mezineg is egkeg̵iyen kayi kenikew wey nu zaan metueni is egkesuatan din.

¹⁵ Su ibpesangyew zin kenikew is tudtul te keag̵i zin ne ibpesavut nu ziyà te langun he menge etew is impezineg din wey impeehè din kenikew.

¹⁶ Ne kenè ka medlanganlangan, kuwa ke en wey ka mebewtismuwi. Pengumew-umew ka te Nengazen wey ka mepesaylu te menge salè nu.’

¹⁷ Ne mid-ulì a zini te inged he Hiruselim ne zutun te ked-ampù ku ziyà te simbahan he Valey te Megbevayà, duen mibpaahà kediey.

¹⁸ Neehè ku is Nengazen he si Jesus ne ke sikandin te, ‘Gaanggaan ka genat ne awè ka kayi te Hiruselim su is menge etew kayi, kenè dan edewaten is ibpesavut nu kandan mehitenged kediey.’

¹⁹ Ne midtavak ku is Nengazen, ke siak te, ‘Iyan, netuenan dan en he mibeyaan ku is menge tumutuu kenikew ziyà te menge simbahan ne mibpendakep ku wey mibpemug̵el ku zaan sikandan.

²⁰ Ne hein midhimetayan si Esteban, is sevaha he etew he wazè din menug̵uni is untung din dini te kelibutan tenged kenikew, dutun a su mid-uyun a zaan dutun te kedhimetayi kandin. Iyan a impevantey te menge kumbalà te midhimatey kandin.’

²¹ Ne migkag̵i en maan is Nengazen te, ‘Genat ke en su edsug̵uen ku sikew ziyà te meziyù wey nu ikepesavut is lalag ku ziyà te kenà menge Hudiyu.’ ”

Si Pablo wey Sikan is Kepitan te Menge Sundaru

²² Ne te nekag̵i haazà ni Pablo wazè en mebpemineg haazà is menge etew. Mibpememensag dan te, “Himetayi en su zait he edhimetayan!”

²³ Ebpememensag he pesivayew zan te menge kumbalè dan wey edsimburè dan te menge tanà diyà te zivavew.

²⁴ Ne haazà is kepitan te menge sundaru he Rumanu, wazè din mesavut ke hengkey is egkeg̵iyen dan ne zutun insug̵ù din te menge sundaru he uwita zan si Pablo zutun te kutà ne vug̵ela zan su wey zin iketug-an ke hengkey is ingkepeuki kandin te menge Hudiyu su maan is ebpememensag dan te iring dutun.

²⁵ Ne hein midhiketan dan si Pablo su ebug̵elen dan en, migkeg̵iyan ni Pablo is serhintu he zutun, ke sikandin te, “Idtug̵ut be te velaud he vug̵ela a keniyu is sakup te inged he Ruma te wazè e pa imbistigaha?”

²⁶ Ne hein nezineg haazà dutun te serhintu, mibeyaan din is kepitan, ke sikandin te, “Maan is ibpevug̵el nu kenami is etew he sakup te Ruma?”

²⁷ Ne midhendutun te ki Pablo haazà is kepitan ne ke sikandin te, “Sakup ke ve te inged he Ruma?” Ne ke si Pablo te, “Uya.”

²⁸ Ne migkag̵i en maan haazà is kepitan te, “Utew zekelà is selapì he ingkeveg̵ey ku wey a mehimu he sakup te Ruma.” Ne ke si Pablo te, “Siak mulà, puun pa te ked-enaka kedì ne sakup ad te Ruma.”

²⁹ Ne segugunà, nemekeendud haazà is menge etew he ebug̵el pezem kandin ne nahandek daan haazà is kepitan geina te sakup bes te inged he Ruma si Pablo ne maan is nepusasan din.

Is Ked-etuvang ni Pablo te Menge Punuan

³⁰ Ne hein nepawà impaawà dutun te kepitan si Pablo. Egkesuatan din he metueni zin ke hengkey is insumbunga ki Pablo te menge Hudiyu, umba midtig̵um din is menge punuan he memumuhat wey is langun he menge ebmeg̵urangen. Ne migkuwa zin si Pablo ne impeetuvang din.