Mateo 26 - Manobo Western Bukidnon

Is Bitiyara Mehitenged te Kedekepa ki Jesus

¹ Ne hein nepasad ni Jesus haazà is kebpenurù din dutun te langun, migkag̵i sikandin diyà te menge sumusundan din te,

² “Netuenan niw he mekezuwa zà guntaan ne egketuman en sikan is pista he egngezanan te Pista te Kedlevayi. Ne zutun, siak is Kakey te Menusiyà, ibpalad a ziyà te menge etew wey e zan ikeransang te krus,” ke sikandin.

³ Ne zutun is menge punuan he memumuhat wey is ebmeg̵urangen te menge Hudiyu, midtig̵um dan diyà te turug̵an ni Keyipas he lavew he memumuhat

⁴ su ebpengahaan dan is paag̵i wey zan mezakep si Jesus he kenà egketuenan te mezakel he menge etew.

⁵ “Deyzey nasì,” ke sikandan, “ke kenè tew sikandin edekepen dutun te timpu te pista su kela ke edsinamuk is menge etew.”

Is Kebpetig̵is te Pehemut

⁶ Ne hein diyà si Jesus te inged he Bitanya, diyà sikandin te valey ni Simun te it-iten he neulian en.

⁷ Ne mid-uvey ziyà te kandin is bahi he zuen din pelenahan he mibeelan puun te vatu he egngezanan te elebastru he midteg̵uan haazà is pelenahan te mehemut he agwa he utew mahal. Ne impetig̵is din haazà is agwa ziyà te ulu ni Jesus te kemulu pa zutun egkaan si Jesus.

⁸ Ne hein naahà haazà dutun te menge sumusundan din ne nengepauk dan. Ke sikandan te, “Maan is mid-us-usikan din heeyan is agwa?

⁹ Meupiya pa ke imbelegyè din heeyan te utew mahal wey ikeveg̵ey is halin diyà te egkengeayuayu!”

¹⁰ Ne netuenan ni Jesus haazà is migkag̵i zan, ne ke sikandin te, “Pesegdana niw en heini is bahi. Utew meupiya heini is mid-ulaula zin dini te kedì.

¹¹ Layun niw egketevangi is egkengeayuayu su kenè niw mulà sikandan egkesuwey, iyan, siak, meg̵aan ku en sikiyu egkesuwey.

¹² Mid-egwahan e zin su wey meteg̵ana is lawa ku zutun te kedlevenga kedì.

¹³ Tenuzi niw he kenà sikandin egkelipatan. Su minsan hendei idsangyew heini is Meupiya he Tudtulanen dini te tivuuk he kelibutan, egketudtul zaan heini is mid-ula-ula zin dini te kedì.”

Is Paag̵i te Kedekepa ki Jesus

¹⁴ Ne te iyan daan haazà he timpu, sevaha zuen te sepulù wey dezuwa he sumusundan, sikan is migngezanan ki Hudas he tigKeriyuti, midhendiyà sikandin te menge punuan he memumuhat.

¹⁵ Ke sikandin diyà te kandan te, “Pira is idsuhul niw kedì ke pinaag̵i kedì igkepalad diyà te keniyu si Jesus?” Ne mibilang dan dutun is ketluan he elad he pelata ne imbeg̵ey zan diyà te ki Hudas.

¹⁶ Ne puun dutun mibpeng-ahà si Hudas te paag̵i ke ebmenmenuwen din te ed-akal si Jesus su wey mezakep dutun te menge etew.

Is Kedseulug ni Jesus Duma te Menge Sumusundan Din

¹⁷ Ne zutun te nehuna he andew te Pista te Kegkeena te Supas he Wazè Din Tapey, mid-uvayan si Jesus te menge sumusundan din ne ke sikandan te, “Hendei is baley he egkesuatan nu he edhilutuan dey wey meteg̵ana is idlavung nu kayi te Pista te Kedlevayi?”

¹⁸ Ne zutun migkag̵i si Jesus he medhendiyè dan te inged, diyà te etew he zaan he migkag̵i zin kandan ne keg̵iyi zan haazà is etew he egkag̵i is menunudlù tew te, “Meg̵aan en is kebpatey ku; dini key edlavung te menge sumusundan ku su Pista te Kedlevayi heini.”

¹⁹ Ne mid-ulaula te menge sumusundan ni Jesus haazà is insug̵ù din kandan ne midteg̵ana zan is idlavung dan dutun te Pista te Kedlevayi.

²⁰ Ne te kegkezukilem dutun, si Jesus wey sikan is sepulù wey zezuwa he menge sumusundan din, diyè dan te lemisahan.

²¹ Ne hein egkaan dan en dutun migkag̵i si Jesus te, “Duen egkeg̵iyen ku keniyu. Iyan is: sevaha kayi te keniyu is ed-akal kedì wey a mehimetayi.”

²² Ne utew nengeseeng haazà is menge sumusundan din, ne zutun mid-insà kandin is kada sevaha zutun te, “Nengazen, iyan e ve egkeg̵iyen nu?”

²³ Ne midtavak si Jesus te, “Sevaha kayi te edtug̵en kedì iyan ed-akal kedì.

²⁴ Siak is Kakey te Menusiyà, ebpatey a sumalà te netagnà duen te insurat he Lalag te Megbevayà, iyan, kehizu utew zuen te etew he ed-akal kedì. Meupiya pa ziyà te kandin ke wazè en sikandin ianak.”

²⁵ Ne zutun migkag̵i si Hudas, kes ed-akal kandin te, “Menunudlù, iyan e ve ed-akal kenikew?” Ne ke si Jesus te, “Uya, iyan ka.”

Is Kedlavung te Nengazen

²⁶ Ne zutun te kemulu zan pa egkaan, mid-amì si Jesus te supas, ne mibpeselematan din te Megbevayà ne mibpenevìtevì din ne impemeg̵ey zin diyà te menge sumusundan din. Ke sikandin te, “Iyan heini lawa ku; dewata niw wey keena niw.”

²⁷ Ne zutun mid-amì din is tasa he midteg̵uan te vinu te paras, ne mibpeselematan din daan te Megbevayà ne induwal zin diyà te kandan. Ke sikandin te, “Pudu kew kayi inum.

²⁸ Su lengesa ku heini he ibpetig̵is wey mepelisi is mezakel he menge etew wey mepesaylu is menge salè dan. Tuus heini te paag̵i te kegkelibri he midtukud te Megbevayà.

²⁹ Egkeg̵iyen ku keniyu he kenè ku en maan ed-inumen is binu taman dutun te timpu keuzemà he ed-iinumey kiw te veg̵u en he vinu emun edhadì en is Amey ku he Megbevayà.”

³⁰ Ne zutun migkanta zan te kedalig te Megbevayà ne hein nepasad haazà migawas dan ne midhendiyè dan te vuvungan he egngezanan te Ulivuwan.

Is Kegkeg̵iya ni Jesus te Kebarew ni Pedro

³¹ Ne zutun migkag̵i si Jesus diyà te kandan te, “Is langun te sikiyu, ne edluyahan is kedsarig niw kediey g̵untaan te mezukilem tenged te egkehitavù kedì; su zuen insurat he Lalag te Megbevayà he edhenduen te, ‘Edhimetayan ku is ed-elima te menge kerehidu ne ebpekedsusuwey is menge kerehidu.’

³² Iyan, emun egkevanhew ad, edhuna a keniyu ziyà te prubinsya he Geliliya.”

³³ Ne zutun migkag̵i si Pedro ziyà te kandin te, “Minsan ke edluyahan is kedsarig kenikew kayi te langun he menge zuma ku ne kenà mulà edluyahan is kedì, minsan egkemenumenu.”

³⁴ Ne zutun migkag̵i si Jesus diyà te ki Pedro te, “Benar is egkeg̵iyen ku kenikew he te kenè pe kan ebpengukarà is manuk, ne ketetelu ke en ebpekekag̵i he kenà a kenikew egkekilala!”

³⁵ Ne migkag̵i si Pedro te, “Minsan pa ke edhimetayan a zuma kenikew kenà a egkag̵i he wazè ku sikew mekilala!” Ne iring ded daan dutun is menge pesarig dutun te zuma he menge sumusundan ni Jesus.

Is Ked-ampù ni Jesus Diyà te Gitsimeni

³⁶ Ne kebpekeuma zutun eni Jesus diyà te Gitsimeni, migkeg̵iyan din is menge sumusundan din te, “Kayi kew zà pinuu su edlaus key ziyà su ed-ampù a.”

³⁷ Ne miduma zin si Pedro wey sikan is dezuwa he anak ni Sibidiyu. Ne zutun utew neseeng sikandin wey mibmesakit utew is gehinawa zin.

³⁸ Ne migkag̵i sikandin diyà te kandan te, “Utew mesakit is gehinawa ku. Henduen be te egkevidtew en. Kayi kew zà ne kenè kew medlipezeng.”

³⁹ Ne midlaus si Jesus diyà te uvey zà dutun ne midlangkeb sikandin ne mid-ampù, ke sikandin te, “Amey ku, ke egkehimu zà ne kenè nu en kediey ipeseg̵azi heini is merasey he imbanglis nu kediey, iyan, kenà egkesunud is kediey he egkesuatan, kekenà, iyan egkesunud is kenikew he egkesuatan.”

⁴⁰ Ne hein midlikuan din haazà is tetelu he menge sumusundan din, nekelipezeng dan, ne migkeg̵iyan din si Pedro te, “Wazè niw ve metigker he kenè kew medlipezeng te minsan sengeuras dà?

⁴¹ Kenè kew lipezeng, kekenà, ampù kew wey kew mekelikey te menge penggezam keniyu. Edsunud is gehinawa niw, iyan, is lawa niw ne meluya.”

⁴² Ne midlikù si Jesus ne mid-ampù med-uman, ke sikandin te, “Amey ku, emun kenè en egkehimu he id-awà sikan is kedresaya kedì ne iyan egkesunud is kenikew he egkesuatan.”

⁴³ Ne zutun midlikuan din sikan is menge sumusundan din ne neehè din he nemekelipezeng dan en maan su wazè dan maantus is kebpemetpetayi kandan te tuzug.

⁴⁴ Ne midlikù si Jesus ne mid-ampù med-uman te iketelu ne in-uman din in-ampù kes in-ampù din.

⁴⁵ Ne zutun midlikuan din sikandan ne migkag̵i te, “Kemulu kew ves nehurep he ebpemenhidhizeg̵à? Siak is Kakey te Menusiyà, iyan en heini timpu he ibpalad a ziyà te menge lalung he etew.

⁴⁶ Enew kew su heini en sikan is etew he ed-akal kedì. Kuwa kew en, su edsinug̵ungen tew.”

Is Kedekepa ki Jesus

⁴⁷ Ne te kemulu pa zutun egkag̵i si Jesus, nekeuma si Hudas is sevaha zuen te sepulù wey zezuwa he epustul. Duma zin is mezakel he menge etew he nengeg̵umeenan te menge ubpit wey menge lagkut. Menge sug̵ù haazà te menge punuan te memumuhat wey menge ebmeg̵urangen te menge Hudiyu.

⁴⁸ Si Hudas, is giya zan pehendiyà te ki Jesus, migkag̵i zin he zaan ke hengkey is tuus te kegketueni zan ki Jesus. Ke sikandin te, “Is etew he edhezekan ku, ne iyan en ebpen-ahaan niw. Ne zekepa niw en.”

⁴⁹ Ne hein nekeuma si Hudas, segugunè din mid-uvayi si Jesus ne migkag̵i te, “Na! Menunudlù!” Ne zutun midhezekan din si Jesus.

⁵⁰ Ne migkag̵i si Jesus diyà te kandin te, “Pekezilepeti nu, Mama, is ed-ul-ulahan nu.” Ne midakep dutun te menge etew si Jesus ne mibpekehemenan dan te egawed.

⁵¹ Ne sevaha zutun te zuma ni Jesus, nekehulavut te sundang din, ne midtibas din is sulug̵uen te lavew he memumuhat ne netenaan haazà diyà te telinga, ne nesapla haazà is telinga zin.

⁵² Ne migkeg̵iyan ni Jesus haazà te, “Ig̵umè nu heeyan is ubpit nu su sikan is utew meg̵aan he ebpenggumaan, gumaan daan is ibpatey zin.

⁵³ Wazè nu ve metueni he emun ebpetavang a te Amey ku he Megbevayà ne edliblibuwen is ibpehendini zin he velinsug̵uen din?

⁵⁴ Iyan,” ke si Jesus, “emun ebpetavang a kandin ne kenà egketuman sikan is nengetagnà dengan dutun te insurat he Lalag te Megbevayà; ne kinahanglan he egkeulaula haazà sumalà is netagnà,” ke sikandin.

⁵⁵ Ne zutun migkeg̵iyan ni Jesus haazà is menge etew te, “Tulisan e ve? Su maan is neg̵umeenan kew te menge ubpit wey menge lagkut is edakep kedì? Kada andew ne egkeahà a keniyu is ebpenurù te menge etew ziyà te Valey te Megbevayà, ne maan is wazà a keniyu zutun dà dekepa?

⁵⁶ Iyan, guntaan, human en egkeulaula heini is langun kayi su egketuman sikan is menge tagnà he insurat dengan te ebpemeneuven te Megbevayà.” Ne hein nekag̵i en ni Jesus haazà, mid-ewaan sikandin dutun te menge sumusundan din su nemelag̵uy zan is langun.

Is Ked-imbistigaha ki Jesus te Menge Punuan

⁵⁷ Ne zutun, haazà is menge etew he midakep ki Jesus, mid-uwit dan sikandin diyà te ki Keyipas he lavew he memumuhat. Ne zutun, daan en he netig̵um is menge menunudlù te kesug̵uan wey is menge ebmeg̵urangen te menge Hudiyu.

⁵⁸ Si Pedro, midtinundug, asal kenà utew ed-uvey ne zutun te nekeuma zan en diyà te valey te lavew he memumuhat ne ziyè dà medtaman si Pedro te lama. Ne hein nekeseled en sikandin dutun te lama, mibpesahugsahug sikandin mebpinuu zuen te menge guwardya su ed-ahaan din ke hengkey en is egkeulaula ki Jesus.

⁵⁹ Ne is menge punuan te memumuhat wey is langun he nengetig̵um he ebmeg̵urangen te menge Hudiyu, ebpen-ehè dan te salà he id-ulug dan ki Jesus su wey zan mehimetayi.

⁶⁰ Iyan, minsan pa te mezakel is teruen he ebpenistig̵us te menge ulaula ni Jesus ne wazè dan dutun egkeahà he zait he igkehimetayi kandin. Ne hein neug̵et, duen dezuwa he mid-etuvang

⁶¹ he egkag̵i te, “migkag̵i heini he etew te, ‘Egkerundus ku is dekelà he simbahan te Megbevayà ne seled te tetelu he andew ne igkepehitindeg ku.’ ”

⁶² Ne zutun midhitindeg sikan is lavew he memumuhat dutun ne migkeg̵iyan din si Jesus te, “Tutuu ve heini is menge sumbung dan mehitenged kenikew? Hengkey is igketavak nu?” ke sikandin.

⁶³ Ne wazà medtavak si Jesus. Ne mid-uman megkag̵i haazà is lavew he memumuhat te, “Tangdù ka su kayi ka te etuvangan te Megbevayà he wazè din kemetayen. Emun iyan ka sikan is Anak te Megbevayà, sikan is mibpilì din he ibpahadì, keg̵iya nu,” ke sikandin.

⁶⁴ Ne midtavak si Jesus te, “Iyan heeyan sumalà is migkag̵i nu ne ekeg̵iyan ku sikiyu is langun he siak is Kakey te Menusiyà, keuzemà egkeahà a keniyu is diyà ebpinuu te zapit te egkekewanan te Megbevayà. Ne egkeahà a zaan keniyu ziyà te menge g̵apun is ebulus he ebpuun diyà te langit,” ke sikandin.

⁶⁵ Ne haazà is lavew he memumuhat, mibpemindas din is kumbalè din he tuus te utew sikandin nepauk dutun te migkag̵i ni Jesus, ne ke sikandin te, “Uvag en kun Anak te Megbevayà! Nekesupak en heini te Megbevayà! Wazè en kinahanglan he zuen pa tistig̵us su sikiyu is langun, nezineg niw en heini is menge lalag din he utew supak te Megbevayà!

⁶⁶ Hengkey is hukum niw?” Ne midtavak is menge zuma zin te, “Dekelà is salè din; kinahanglan he edhimetayan.”

⁶⁷ Ne zutun mibpengilevan dan is ulu ni Jesus; ne mibug̵el zan. Ne is duma, midtabpì kandin

⁶⁸ he egkag̵i te, “Sikew is mibpilì bes te Megbevayà, tegnaa nu ke hentei is neketabpì kenikew,” egkag̵i zan.

Is Kebpemarew ni Pedro

⁶⁹ Ne si Pedro, diyà te lama is ebpimpinuu. Ne zuen sulug̵uen he vahi he mid-uvey ziyà te kandin is egkag̵i te, “Sikew, duma ka zaan ni Jesus he tigGeliliya.”

⁷⁰ Iyan, mibarew haazà ni Pedro is migkag̵i zutun te vahi, ne nekezineg dutun is langun te kebarew zin. Ke sikandin te, “Kenè ku egkesavut heeyan is egkeg̵iyen nu.”

⁷¹ Ne migawas si Pedro pehendiyà te pultahan dutun te lama. Ne zuen sevaha pa he sulug̵uen he vahi he nekeahà kandin ne migkag̵i haazà is bahi ziyà te menge etew zutun te, “Duma heini ni Jesus he tigNeserit!”

⁷² Ne utew mezesen is kebarew zutun ni Pedro. Ke sikandin te, “Kenè ku egkekilala heeyan he etew.”

⁷³ Ne hein netegteg̵aad dutun, mid-uvayan si Pedro zuen te menge etew he nerivurun dutun, ke sikandan te, “Tutuu iyan he zuma ke zin daan su egketuusan tenged te kegkag̵i nu.”

⁷⁴ Ne zutun mid-amin-amin si Pedro te sapà, ke sikandin te, “Siluti a te Megbevayà ke tarù heini is lalag ku he kenè ku egkekilala heeyan he etew.” Ne zutundutun, mid-ukarà is manuk.

⁷⁵ Ne human metenuzi ni Pedro sikan is migkag̵i kandin ni Jesus he, “Te kenè pe kan ebpengukarà is manuk, ne ketetelu ke en ebpekekag̵i he kenà a kenikew egkekilala.” Ne zutun migawas si Pedro ne nekelelendag.