Mateo 25 - Manobo Western Bukidnon

Is Sepulù he Menge Rag̵a

¹ “Dutun te kedlikù ku, is kedhadì te Megbevayà, ne iring te sempità he sepulù he rag̵a he netukid te sulù su edsinug̵ungen dan is ebpengesawa.

² Is lelima kandan, ne tulebung; ne is duma zan he lelima, ne memetau.

³ Haazà is menge tulebung, mid-uwit dan is menge sulù dan, iyan, wazà gas he mid-uwit dan he teg̵ana ke egkeamin is gas dutun te seled te sulù dan.

⁴ Ne haazà is memetau, kada sevaha kandan mid-uwit te sulù lapik is gas he intag̵ù te butilya he teg̵ana ke egkeamin is gas dutun te sulù dan.

⁵ Ne g̵eina te neug̵et mekeuma sikan is ebpengesawa, ebpemekezungkàdungkè dan en dutun is edtag̵ad he ebpemekelipezeng.

⁶ Ne hein metaneb en dutun is kezukileman ne nezineg dan is ed-umew te, ‘Heini en sikan is ebpengesawa; sinug̵unga niw en sikandin.’

⁷ Ne nepukew haazà is sepulù he rag̵a ne midsusi zan is menge sulù dan ne mibpurungan dan.

⁸ Ne zutun migkag̵i haazà is menge tulebung dutun te menge memetau te, ‘Beg̵ayi key te gas su egkengeevukan en is kenami he menge sulù.’

⁹ Ne midtavak haazà is memetau te, ‘Kenà egkehimu su kenà egkampet kenitew te langun is gas he neuwit dey. Hendiyè kew te tindahan wey kew mekepemasa te gas.’

¹⁰ Ne zutun migenat haazà is menge tulebung su ebpemasa zan te gas, ne hein nehaus dan en nekeuma sikan is ebpengesawa. Ne haazà is lelima he menge rag̵a he memetau, miduma zan kandin te edseled dutun te valey he zutun is eseweey. Ne hein nekeseled dan en dutun ne midlekevan haazà is baley.

¹¹ Ne netegteg̵aad dutun nekeuma zaan haazà is menge zuma zan he rag̵a; ne ziyè dan dà te g̵awas is egkag̵i te, ‘He Nengazen, he Nengazen, puwasi key.’

¹² Ne midtavak haazà is ebpengesawa te, ‘Kenè ku sikiyu egkekilala.’ ”

¹³ Ne ke si Jesus te, “Iring dutun, kinahanglan he andam kew su wazè niw metueni ke hengkey he andew wey ke hengkey he uras is kedlikù ku.

Is Tetelu he Sinerig̵an

¹⁴ Is kedhadì te Megbevayà ne iring daan te etew he edhipanew. Te wazè pa sikandin megenat, midtig̵um din is menge sulug̵uen din su idsarig din kandan is selapì din wey zan ikepetig̵ayun.

¹⁵ Mibahin din kandan sumalà is egkeveleveg te uman sevaha kandan te ebpetig̵ayun. Is sevaha, mibeg̵ayan din te lelima he libu he pisus; ne is sevaha, mibeg̵ayan din te zezuwa he libu; ne is sevaha pa, nengkelibu he pisus is imbeg̵ey zin dutun. Ne zutun migenat haazà is etew he edhipanew.

¹⁶ Ne sikan is sulug̵uen he mibeg̵ayan te lelima he libu he pisus, impetig̵ayun din haazà is kandin, ne netig̵ayun te lelima pa he libu.

¹⁷ Iring din ded daan sikan is sulug̵uen he mibeg̵ayan te zezuwa he libu he pisus, su netig̵ayun daan te zezuwa pa he libu.

¹⁸ Iyan, sikan is sulug̵uen he mibeg̵ayan te nengkelibu he pisus, mid-awà dutun ne inleveng din diyà te tanà haazà is selapì dutun te egalen din.

¹⁹ Ne hein neug̵et dutun, mid-ulì haazà is egalen dan su edsusiyen din haazà is selapì din.

²⁰ Ne midtelavuk kandin sikan is sulug̵uen din he mibeg̵ayan te lelima he libu he pisus ne indata zin haazà is selapì ragkes sikan is genansya he lelima he libu. Ne ke sikandin te, ‘Mibeg̵ayan a kenikew te lelima he libu he pisus; ne heini zed is genansya he lelima he libu he pisus.’

²¹ Ne migkag̵i haazà is egalen din te, ‘Utew meupiya is baal nu! Metinumanen ka he sulug̵uen! Ne g̵eina te egkeserig̵an ka te zeisey he selapì idsarig ku kenikew is dekelà. Seled ka zini wey ka mekeambit te kelipey ku.’

²² Ne midtelavuk daan kandin sikan is mibeg̵ayan din te zezuwa he libu he pisus ne ke sikandin te, ‘Datù, mibeg̵ayan a kenikew te zezuwa he libu he pisus. Ahaa nu, heini zed daan is genansya he zezuwa he libu he pisus.’

²³ Ne migkag̵i haazà is egalen din te, ‘Utew meupiya is baal nu! Metinumanen ka he sulug̵uen! Geina te egkeserig̵an ka te zeisey he selapì, idsarig ku kenikew is dekelà. Seled ka zini wey ka medlipey te kelipey ku.’

²⁴ Ne midtelavuk daan sikan is sulug̵uen he mibeg̵ayan din te nengkelibu he pisus. Ke sikandin te, ‘Datù, netuenan ku he wazè nu kehizu su edreg̵unen nu is kenè nu pinemula, ne ebpenggenansya ka te wazè nu ipetig̵ayun.

²⁵ Ingkehandek ku sikew umba inleveng ku ziyà te tanà is selapì nu. Ahaa nu; heini zed sikan is selapì nu.’

²⁶ Ne midtavak haazà is egalen din te, ‘Utew mezaat is baal nu! Peg̵ulen ka he sulug̵uen! Netuenan nu ves he edreg̵unen ku is kenè ku pinemula ne ebpenggenansya a te wazè ku ipetig̵ayun?

²⁷ Maan is wazè nu ipeutang heeyan is selapì ku wey mepursintuwi wey medekelà is bali zin wey ku mezawat kayi te kedlikù ku?’

²⁸ Ne zutun migkag̵i sikandin diyà te selakew en he sulug̵uen te, ‘Kuwaa nu heeyan is nengkelibu he pisus keniyan te kandin ne iveg̵ey nu ziyà te nekekuwa te sepulù he libu.

²⁹ Su sikan is egkeserig̵an te insarig kandin, ed-umanan pa. Iyan, sikan is kenà egkeserig̵an, edhewien diyà te kandin minsan is deisek he insarig kandin.

³⁰ Ne heini is wazè din pulus he sulug̵uen, itimbag niw ziyà te merusirem he utew meziyù diyà te g̵awas. Dutun ne ebpekekulahì wey ebpekengingitel tenged te utew ebpekedsendit.’

Is Igkehukumi te Keet-etawan

³¹ Siak is Kakey te Menusiyà, dutun te kedlikù ku he utew zekelà is gehem te ked-anlag ku wey edumahan ad te langun he menge velinsug̵uen ku, ebpinuu ad is edhadì.

³² Ebpekeetuvang kedì is tivuuk he menusiyà. Ne zutun edtepizen ku sikandan te zezuwa he vahin iring te kedtepiza te bekidu zuen te menge kambing wey menge kerehidu.

³³ Idtapid ku is iring te menge kerehidu ziyà te zapit te egkekewanan ku, ne sikan is iring te menge kambing, idtapid ku ziyà te zapit te egkeg̵ivang ku.

³⁴ Ne zutun, siak is hadì, ekeg̵iyan ku is menge etew ziyà te zapit te egkekewanan ku te, ‘Sikiyu is midtuvazan te Amey ku he Megbevayà, kayi kew su iyan kew edhedian ku. Su is kedhadì ku keniyu, integ̵ana en dengan puun pa te kedlimbag̵a te kelibutan.

³⁵ Su hein nevitil a, impekaan a keniyu; ne hein nemezahan a, impeinum a keniyu; minsan wazà a keniyu mekilala, midawat a keniyu ziyan te valey niw.

³⁶ Hein wazè ku ugelingen mibeg̵ayan a keniyu; hein nezeruwan a, mid-elimahan a keniyu. Hein nepirisu a, midlauy a keniyu.’

³⁷ Ne ed-insaan a zutun te menge etew he metazeng he ziyà te zapit te egkekewanan ku te, ‘Nengazen, keenu zey sikew maahà he nevitil wey nemezahan ne impekaan dey wey impeinum dey sikew?

³⁸ Keenu zey sikew zewata ziyà te valey zey te wazè dey sikew mekilala? Keenu ka megkinahanglan te ugelingen nu, ne mibeg̵ayan dey sikew?

³⁹ Keenu zey sikew melauy he egkezeruwan wey ziyà te pirisuan?’

⁴⁰ Ne zutun, siak is hadì, edtavak a te, ‘Egkeg̵iyen ku keniyu he ke mid-ulaula niw heini ziyà te minsan sevaha kayi te menge suled ku, he ke và dà egkeg̵iya, menge tumutuu kedì, minsan ke utew minus is pid-etawen din, neulaula niw en heini ziyà te kedì.’

⁴¹ Ne zutun ekeg̵iyan ku is menge etew he ziyà te zapit te egkeg̵ivang ku te, ‘Sikiyu is midrewakan te Amey ku he Megbevayà, awè kew kayi! Su zutun kew te regreg he wazè din pidtemanan he integ̵ana he zaan ki Setanas he iyan idsilut kandin duma te menge velinsug̵uen din!

⁴² Su zengan nevitil a, iyan, wazà a keniyu ipekaan; nemezahan a, ne wazà a keniyu ipeinum.

⁴³ Wazè ku egkepemenehikan ne wazà a keniyu zewata ziyà te valey niw. Egkinahanglan a te ugelingen, iyan, wazà a keniyu meveg̵ayi. Nezeruwan a, ne ziyà a te pirisuan, iyan, wazà a keniyu leuya.’

⁴⁴ Ne ed-insè dan te, ‘Nengazen, keenu zey sikew maahà he egkevitil, ebpekeinum, wazà egkepemenehikan, wazà ugelingen, nezeruwan, wey ziyà te pirisuan ne wazè dey sikew metevangi?’

⁴⁵ Ne zutun edtavak a is hadì te, ‘Egkeg̵iyen ku keniyu he ke wazè niw tevangi is minsan sevaha kayi te utew minus is pid-etawan din, siak is wazè niw metevangi.’

⁴⁶ Ne heini he menge etew,” ke si Jesus, “id-awà kayi su edsilutan sikandan te silut he wazè din pidtemanan; iyan, is menge metazeng mulà, ebeg̵ayan sikandan te untung he wazè din pidtemanan.”