Mateo 23 - Manobo Western Bukidnon

Is Ikemekehihizu te Menge Punuan

¹ Ne zutun migkag̵i si Jesus diyà te mezakel he menge etew wey ziyà te menge sumusundan din te,

² “Is menge menunudlù te kesug̵uan wey menge Perisiyu, insarig kandan is kebpenurù te kesug̵uan he imbilinbilin ni Moises.

³ Umba, kinahanglan he ebentayan niw wey edtumanen niw is minsan hengkey he penurù dan keniyu. Iyan, kenè niw iringi mulà is ulaula zan su kenè dan edtumanen is ibpenurù dan keniyu.

⁴ Utew mezakel is mereg̵en he tulumanen he ibpetuman dan te menge etew, iyan, wazà minsan hengkey he idtavang dan dutun te menge etew wey meketuman haazà is etew zutun te ibpetuman dan.

⁵ Mezakel is ed-ul-ulahan dan wey sikandan mezalig te menge etew su ibpeehè dan he edtumanen dan is sug̵ù te Megbevayà pinaag̵i zà te ebped-eepizen dan he insurat he Lalag te Megbevayà he ibedbed dan diyà te velad dan wey ziyà te vuked dan, wey pinaag̵i te utew meluag he sidsid te kemisula zan.

⁶ Iyan egkesuatan dan he utew zan tehuza ke edtelavuk dan te keemuran; ne emun diyè dan te simbahan, egkesuatan dan he iyan sikandan ibpepinuu ziyà te ebpepinuuwan te lavew he menge etew.

⁷ Utew ibmeupiya te g̵ehinawa zan ke edtehuzen sikandan te menge etew ziyà te tiyenggiyan wey ke ed-umawen sikandan he ‘menunudlù.’

⁸ Kenè niw itug̵ut he iyan id-umew keniyu is ‘menunudlù’ su teltelesuled kew is langun ne sebsevaha zà is menunudlù niw he iyan a.

⁹ Kenè niw zaan gerari te ‘amey’ is minsan hentei kayi te kelibutan su sebsevaha zà is Amey niw he iyan is Megbevayà diyà te langit.

¹⁰ Kenè niw zaan itug̵ut he iyan id-umew keniyu is ‘egalen’ su siak is mibpilì te Megbevayà, iyan e zà egalen niw.

¹¹ Ne is ed-isipen niw he lavew ziyà te keniyu, kinahanglan he egkehimu sikandin he sulug̵en niw te langun.

¹² Sikan is ebpelavew, edhimuwen te Megbevayà he egkelevawan sikandin te langun. Ne sikan is ed-isipen din he lavew kandin is minsan hentei keniyu, edhimuwen sikandin te Megbevayà he lavew te minsan hentei keniyu.

¹³ Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Su ke zuen etew he ibeg̵ey zin pezem is gehinawa zin diyà te hadì tew he Megbevayà, kenè niw edtug̵utan, ne kenè niw zaan ibpeveyveyaan is gehinawa niw te Megbevayà.

¹⁴ Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Edlimbungan niw is menge valu he vahi wey niw maangken is baley zutun te edlimbungan niw. Ne utew melug̵ayad is ked-ampù niw he iyan paag̵i te kedtembuni niw te mezaat he mibeelan niw. Tenged kayi utew zekelà is silut keniyu te Megbevayà.

¹⁵ Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Edlayun kew te zag̵at ne edhipenawen niw is meluag he tanà wey niw mekabig is etew; ne is egkekabig niw, edhimuen niw he tuwas pa he zait sikandin he edsilutan diyà te Impirnu, kenà sikiyu.

¹⁶ Kehizu niw, su iring kew te lakap he ed-ag̵ak te sengelelakap. Ibpenurù niw he ke zuen etew he ebpenaad ne ibpengumew-umew zin duen te zekelà he simbahan, egkehimu he kenè din edtumanen haazà he penaad. Ne ibpenurù niw zaan he emun iyan din ebpengum-umawen sikan is bulawan duen te simbahan, kenà egkehimu ke kenè din edtumanen haazà is penaad din.

¹⁷ Menge lakap kew he tulebung! Su iyan bes lavew sikan is bulawan duen te Valey te Megbevayà! Kenà egkehimu! Su sikan is bulawan, iyan igketeg̵ui zin te g̵ehem te Megbevayà su g̵eina te nekeseled duen te Valey te Megbevayà.

¹⁸ Ne ibpenurù niw zaan he ke zuen etew he ebpenaad, ne ke ibpengumew-umew zin duen te vangkù he ebpemuhatan diyà te Valey te Megbevayà, egkehimu he kenè din edtumanen is penaad. Iyan, emun iyan din ebpengum-umawen sikan is impemuhat he ziyà mekesavuk te vangkù ne kenà egkehimu ke kenè din edtumanen is penaad din.

¹⁹ Utew kew nelakap su iyan bes lavew is impemuhat? Kenà egkehimu, su iyan igketeg̵ui zin te g̵ehem te Megbevayà sikan is bangkù he ebpemuhatan.

²⁰ Ne tenged dutun, ke zuen ebpenaad, ne ebpengum-umawen din sikan is bangkù duen te seled te Valey te Megbevayà, kenà iyan dà sikan is bangkù egkeambit din, kekenà, elin sikan is impemuhat he zuen mekesavuk te vangkù.

²¹ Iring din ded daan ke zuen etew he ebpengum-umawen din is Baley te Megbevayà, kenà iyan sikan is baley egkeambit din, kekenà, iyan is Megbevayà he zutun ed-ubpà.

²² Ne ke zuen etew he ebpenaad ne ebpengum-umawen din is langit, iyan tutuu he egkeumew zin sikan is pinuuwà te Megbevayà, ne emun egkeambit din sikan is pinuuwà te Megbevayà, iyan tutuu he egkeambit din is Megbevayà.

²³ Kehizu niw te menge menunudlù te kesug̵uan wey sikiyu is menge Perisiyu, su tarù is kedtuu niw te Megbevayà! Ibeg̵ey niw te Megbevayà is ikepulù he vahin minsan te menge perehemut te egkeenen iring te yirbebuyna, anis, wey kuminu, iyan, kenè niw edtumanen is menge lavew pa he sug̵ù iring te ked-ula-ula te metazeng, kegkehizu te zuma niw, wey kedtumana niw te menge penaad niw. Kinahanglan he ibeg̵ey niw is ikepulù, iyan, kenè niw zaan teg̵aka heini is menge lavew pa he sug̵ù.

²⁴ Iring kew te lakap he ed-ag̵ak te sengelelakap. Kenè niw egkeaku te ebaal is utew zeisey he salà, iyan, egkeekuwan niw mulà te ebaal is utew zekelà he salà.

²⁵ Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Ebpurungan niw ebentayi is menge vetasan niw, iyan, diyà te isip niw wey g̵ehinawa niw ne zuen keheheramham wey kelelalung. Iring kew te vasu wey pinggan he nelumpiyuwan diyà te g̵awas, iyan, meremerik is diyà te seled.

²⁶ Iring kew te lakap is menge Perisiyu! Lumpiyuwi niw hunai is idseled niw zutun ne human egkelumpiyu is tasa niw wey pinggan niw.

²⁷ Kehizu niw, te menge menunudlù te kesug̵uan wey sikiyu is menge Perisiyu, su tarù is kedtuu niw te Megbevayà! Iring kew te valey he vatu he iyan lungun he mibpintalan te meputì he zutun idsavuk is lawa te nemematey. Meupiya he ed-ahaan diyà te g̵awas, iyan, dutun te seled din ne menge tulan te minatey he nengeredak en.

²⁸ Iring kew zutun su emun ed-ahaan kew te etew henduen be te meupiya is ulaula niw, iyan, diyà te g̵ehinawa niw, dutun is kedtarùtarù wey kedsupak te sug̵ù te Megbevayà.

²⁹ Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Mideyzeyanan niw is menge valey he vatu he iyan inlungun niw te menge lawa te nemematey zengan he menge metazeng wey ebpemeneuven te Megbevayà.

³⁰ Ne egkag̵i kew te, ‘Angin ke neetew kiw en dutun te timpu te menge kepuun tew he mibpenhimetayan dan sikan is ebpemeneuven dengan te Megbevayà su kenè kiw mulà dutun edtampu te mibeelan dan.’

³¹ Ne venar ves iyan he iyan kew sikan is menge kevuwazan te menge etew zengan he nekevunù te ebpemeneuven te Megbevayà su iring kew kandan.

³² Himesaza niw en is mezaat he ulaula he wazà mepasad te menge kepuun niw!

³³ Iring kew te menge uled wey menge anak te uled su utew mezaat is ulaula niw. Ebmenmenuwen niw te kedlikey is silut keniyu ziyà te Impirnu?

³⁴ Su egkeg̵iyen ku keniyu he ibpehendiyan ku pa te keniyu is ebpemeneuven te Megbevayà, wey menge etew he mibeg̵ayan te Megbevayà te ketau, wey menge menunudlù. Ne edhimetayan niw is duma kandan. Ne is duma, idransang niw ziyà te krus ne ebpemug̵elen niw is duma ziyà te seled te menge simbahan niw ne ed-elawen niw sikandan diyà te minsan hendei he inged he egkepeveyaan dan te ebpemelag̵uy.

³⁵ Tenged kayi, iyan kew edsilutan te kebpemunua te langun he menge metazeng he nevunù puunè dà dutun te kedhimetayi ki Abel he metazeng he etew zengan, taman te kedhimetayi te anak ni Berekiyas he si Zacarias he mibunù niw ziyà te pid-elangan te Valey te Megbevayà wey vangkù he pemuhatà.

³⁶ Egkeg̵iyen ku keniyu he sikiyu is menge etew g̵untaan, elin kew zaan edsilutan tenged te kegkengevunù kayi te langun.”

Is Hizu ni Jesus te Menge TigHiruselim

³⁷ Ne zutun netenuzan ni Jesus is menge ulaula te menge meg̵inged te Hiruselim ne ke sikandin te, “Igkeseeng ku sikiyu is menge meg̵inged diyà te Hiruselim su ebpemunuen niw is ebpemeneuven te Megbevayà, ne is menge sulug̵uen te Megbevayà he ibpehendiyan, ebpenulengen niw te vatu he edhimetayan niw. Utew zekelà is suat ku pezem he ed-uyemuwen ku sikiyu; ke và dà manuk, iring a te upa he edlekupan din is menge piyak din, ne kenè kew ebpelekup.

³⁸ Ne g̵untaan, utew mekevulungbulung heini is simbahan niw su mid-iniyug̵an kew en te Megbevayà.

³⁹ Su egkeg̵iyen ku keniyu he kenè ad maan keniyu egkeahà taman dutun te timpu keuzemà he ebpekekag̵i kew te, ‘Delig̵a is nekeuma he midsug̵ù te Nengazen.’ ”