Mateo 22 - Manobo Western Bukidnon

Is Sempità Mehitenged te Keemuran

¹ Ne mid-uman mebpenurù si Jesus te menge etew pinaag̵i te menge sempità.

² Ke sikandin te, “Is kedhadì te Megbevayà he ziyà te langit, ne iring te hadì he midtukud te zekelà he keemuran su ebpengesawa is anak din.

³ Midsug̵ù din is menge sulug̵uen din he ibpetukew sikan is menge etew he migkeg̵iyan he zaan he ipetelavuk dan en dutun te keemuran. Iyan, is menge etew, wazè dan itetepian haazà is menge sulug̵uen.

⁴ Ne mid-uman medsug̵ù haazà is hadì te selakew en he menge sulug̵uen din ne ke sikandin te, ‘Keg̵iyi niw sikan is menge etew he nelapè ku en is menge vaka wey menge impemelambù ku he nati, ne nelemise en is egkeenen. Ne medhendini en sikandan.’

⁵ Iyan, henduen be te wazà mekezineg haazà is menge etew. Wazè dan iniyug̵i is menge vaal zan. Is sevaha, ne ziyà te pemuleey zin ne is sevaha, ne ziyà te tindahan din.

⁶ Ne is duma he etew zutun, migewezan dan haazà is midsug̵ù te hadì, ne mibpemug̵el zan ne human dan himetayi.

⁷ Ne zutun utew nepauk haazà is hadì. Midsug̵ù din is menge sundaru zin ne sikan is nemumunù, mibpenhimetayan te menge sundaru ne mibinsulan dan is inged dutun te mibpenhimetayan dan.

⁸ Ne midtig̵um te hadì is menge sulug̵uen din ne ke sikandin te, ‘Nelemise en is keenen, iyan, sikan is ibpemetelavuk ku, kenè bes dait kayi te keemuran ku.

⁹ Umba, ikula niw is menge kersada he mezakel is menge etew zuen, ne minsan pira he etew is egkeehè niw ne ipehendini niw.’

¹⁰ Ne migenat haazà is menge sulug̵uen din ne mid-ikul zan is menge kersada, ne is langun he etew he neuma zan, meupiya is ulaula zin se mezaat is ulaula zin, ne mid-umbita zan. Ne nepenù haazà te etew is turug̵an te hadì.

¹¹ Ne zutun te kedseled te hadì su ed-ahaan din is nengetig̵um he etew, neehè din dutun is etew he wazà medsun-ud te bisti te eseweey.

¹² Ne ke sikandin te, ‘He Mama, maan is nekeaku ka he edtelavuk kayi te keemuran he wazè ka medsun-ud te bisti te eseweey?’ Iyan, wazà igketavak dutun te etew.

¹³ Ne insug̵ù dutun te hadì te menge sulug̵uen din te, ‘Bekusa niw is menge velad wey paa zin ne itimbag niw sikandin diyà te g̵awas, diyà te merusirem he utew meziyù. Ne zutun sikandin ebpekengingitel ne ebpekekulahì tenged te utew sikandin ebpekedsendit.’ ”

¹⁴ Ne mid-uman megkag̵i si Jesus te, “Mezakel he menge etew is midtawag te Megbevayà wey zin egkehedii, iyan, mezelag dà is egkepilì din.”

Is Kebayad te Vuhis Diyà te Hadì te Ruma

¹⁵ Ne zutun mid-ewaan si Jesus te menge Perisiyu su ed-uyunan dan ke hengkey is kegkepulutikahi zan ki Jesus wey mehimu he ikesumbung dan.

¹⁶ Ne midsug̵ù dan diyà te ki Jesus is menge sumusundan dan wey menge sakup te upakat he midtukud ni Hirudis. Ne haazà is midsug̵ù dan, migkag̵i ziyà te ki Jesus te, “Menunudlù, netuenan dey he metazeng ka he etew; su ibpenurù nu is tutuu he ebpeveelan kenitew te Megbevayà, ne is lalag te menge etew, kenà ebpekehalin te ibpenurù nu tenged te wazè nu ibpelavi he minsan hentei.

¹⁷ Umba, keg̵iyi key kenikew, ke ebpekesupak ki ve te kesug̵uan tew ke ebayad ki te vuhis diyà te hadì tew he ziyà te inged he Ruma?”

¹⁸ Ne netuenan ni Jesus ke hengkey is mezaat he ziyà te g̵ehinawa zan ne ke sikandin te, “Teruen kew, maan is egezaman a keniyu?

¹⁹ Ipeehè niw kediey is selapì he ibayad niw te vuhis.” Ne impeehè dan kandin is selapì.

²⁰ Ne mid-insà si Jesus te, “Hentei ki zagwey wey ngazan heini is nekesurat kayi?”

²¹ Ne ke sikandan te, “Dagwey wey ngazan te hadì diyà te Ruma.” Ne migkag̵i si Jesus te, “Ne emun kandin, ne iyan egkesuatan din, iveg̵ey niw ziya te kandin, ne iveg̵ey niw zaan diyà te Megbevayà is kandin he azen,” ke sikandin.

²² Ne hein nezineg dan haazà is lalag ni Jesus, utew zan nengeinuinu ne mid-ewaan dan si Jesus ne migawas dan dutun.

Is Ketudluanan Mehitenged te Kegkevanhew

²³ Ne netegteg̵aad dutun, duen menge Sedusiyu he midhendiyà te ki Jesus. Is menge Sedusiyu, ne iyan is menge Hudiyu he edtuu he kenà egkengevanhew keuzemà is minsan hentei.

²⁴ Ne migkeg̵iyan dan si Jesus te, “Menunudlù, impenurù dengan ni Moises he emun duen maama he zuen din esawa ne ebpatey haazà is maama, kinahanglan he ebpemeluwen te suled dutun te maama haazà is ipag din su wey mevuwad haazà is minatey pinaag̵i zutun te suled din.

^25-26 Ne zengan duen dini pitu he menge maama he teltelehazi. Mibpengesawa is kakey, iyan, minatey he wazà med-anak. Ne mibpemalu haazà is bahi te hazi zutun te minatey. Ne minatey zaan haazà is hazi he wazà mevuwad; ne haazà is bahi, mibpemalu en maan te hazi zutun te minatey. Ne iring din ded daan, minatey haazà is mibpemalu zutun te vahi he wazà mevuwad. Ne henduen dà duen su pudu nekeesawa zutun te vahi haazà is teltelesuled he pudu zin ingkevalu, iyan, nemematey zan maamin he wazà mevuwad.

²⁷ Ne te ketepusan, minatey zaan haazà is bahi.

²⁸ Ne keuzemà te andew ke egkengevanhew en is langun, hentei is hustu he teg̵iesawa zutun te vahi? Su pudu nekeesawa kandin haazà is teltelesuled.”

²⁹ Ne midtavak kandan si Jesus te, “Nengesayep kew utew! Iyan is wazè niw mesavut sikan is ingkengesurat he menge Lalag te Megbevayà ne wazè niw zaan mesavut he mekeg̵eg̵ehem is Megbevayà te kebpemanhew te menge minatey.

³⁰ Su emun egkengevanhew en is menge minatey ne iring en sikandan te menge velinsug̵uen te Megbevayà he ziyà te langit he kenà ebpees-eseweey is menge maama wey vahi.

³¹ Egug̵uzan ku sikiyu wey kew mevenari he egkevanhew is menge minatey. Wazè niw ves mevasa sikan is insurat he Lalag keniyu te Megbevayà?

³² Su minsan te minatey en dutun si Abraham, si Isaak, wey si Hakub, migkag̵i is Megbevayà te, ‘Iyan a Megbevayà he ed-ezapen ni Abraham wey ni Isaak wey ni Hakub,’ he ke va dà egkeg̵iya, kemulu zan pa ed-azap te Megbevayà; su is ed-azap kandin, minsan ke ebpatey, duen din pa untung.”

³³ Ne hein nezineg heini te menge mezakel he etew, nengeinuinu zan utew zutun te kebpenurù din.

Is Utew Lavew he Sug̵ù

³⁴ Ne hein netuenan dutun te menge Perisiyu he wazà nehimu te menge Sedusiyu ziyà te ki Jesus he igkepezekepa zan kandin, midtig̵um sikandan.

³⁵ Ne is sevaha zutun, menunudlù te kesug̵uan. Ne migezaman din dekepa is ketezengan ni Jesus pinaag̵i te menge insà.

³⁶ “Menunudlù,” ke sikandin, “hengkey is lavew he sug̵ù duen te kesug̵uan?”

³⁷ Ne midtavak si Jesus te, “Kinahanglan he iyan nu mahala ziyà te g̵ehinawa nu is Megbevayà he Nengazen tew. Iyan nu sikandin mahala ziyà te g̵ehinawa nu, isip nu, wey kedsavut nu.

³⁸ Iyan heini lavew he sug̵ù he edhuna te langun.

³⁹ Ne iring din ded daan is ikezuwa he iyan heini: ‘Kinahanglan he mahala nu is duma nu; isipa nu sikandin he iring te kenikew en he g̵ehinawa.’

⁴⁰ Is tivuuk he kesug̵uan he imbilinbilin kenitew ni Moises wey is menge penurù te menge ebpeneuven dengan te Megbevayà, kayi ebpuun te zezuwa he sug̵ù,” ke sikandin.

Is Hadì he Mibpilì te Megbevayà he Kevuwazan ni David

⁴¹ Ne hein midtig̵um is menge Perisiyu, mid-insaan sikandan ni Jesus te,

⁴² “Hengkey is isip niw? Kes mibpilì te Megbevayà he ibpahadì, hentei ki kevuwazan sikandin?” Ne midtavak dan te, “Kevuwazan sikandin ni Hadì David.”

⁴³ “Ne emun iyan heeyan,” ke si Jesus, “maan is migkag̵i si David, pinaag̵i te ked-ulini kandin te Wag̵as he Mulin-ulin, he Nengazen din sikan is mibpilì te Megbevayà? Su migkag̵i zengan si David te,

⁴⁴ ‘Migkag̵i is Megbevayà diyà te Nengazen ku te, “Kayi ka pinuu te zapit te egkekewanan ku taman te kenè ku pa ibpeluhud diyà te kenikew is menge kuntada nu.” ’ ”

⁴⁵ Ne ke si Jesus diyà te kandan te, “Emun migkag̵i ni David he Nengazen din sikan is ebperetengen he ibpahadì, egkehimu ve he kevuwazan dà duen ni David?”

⁴⁶ Ne wazà neketavak ki Jesus dutun te minsan hengkey he menge insè din, ne puunè dà dutun wazè en maan nekeaku he ebpenginginsè pa maan kandin.