Mateo 20 - Manobo Western Bukidnon

Is Menge Sinuhulan

¹ Ne migkag̵i si Jesus te, “Is kedhadì te Megbevayà he ziyà te langit, iring te etew he zuen din menge pinemula he g̵awed he egngezanan te paras. Ne midselemselem haazà is etew mebpengahà te etew he edsuhulan din he ibpeterebahu zin dutun te perasan din.

² Is aney he nengeehè din, mid-uyun dan he ebeyazan din is uman sevaha kandan te sengeelad he pelata su iyan haazà neleyaman he suhul te sevaha he etew te sengeandew. Ne zutun impepuun din en haazà is menge etew he edsuhulan din ipeterebahu zutun te perasan din.

³ Ne hein liwazè en ebpemenahik is andew zutun, midlikù sikandin mebpengahà te etew. Ne ziyà te tiyenggiyan neehè din dutun is menge etew he wazà mibpeterebahu kandan.

⁴ Ne migkeg̵iyan din haazà is menge etew te, ‘Terebahu kew ziyà te perasan ku ne edsuhulan ku sikiyu te hustu.’

⁵ Ne midterebahu haazà is menge etew. Ne hein neudtu en is andew zutun, midlikù en maan haazà is etew pehendutun te tiyenggiyan. Ne iring din ded hein liwazà ebpenaug is andew.

⁶ Ne hein meg̵aan en edsanlep is andew, midlikù en maan sikandin dutun te tiyenggiyan. Ne neehè din dutun is menge etew he wazè dan terebahu, ne migkeg̵iyan din te, ‘Maan is tekew kew en kayi ed-uubpaubpà te egkehepunan en ne kenè kew edterebahu?’

⁷ Ne midtavak dan te, ‘Geina te wazà ebpeterebahu kenami.’ Ne migkag̵i haazà is etew te, ‘Terebahu kew ziyà te perasan ku.’

⁸ Ne hein mezukilem en migkeg̵iyan dutun te etew is sinerig̵an din te, ‘Umawa nu sikandan is ebpemenerebahu ne suhuli nu. Iyan nu hunai te edsuhul sikan is nengehuziyan, ne human sikan is nengehuna.’

⁹ Ne sikan is nemekepuun meketerebahu hein meg̵aan en edsanlep is andew, midsuhulan din te tigsengeelad he pelata.

¹⁰ Ne hein iyan en edsuhulan sikan is nengehuna zutun, nekeperateng dan he lavew pa te insuhul zutun te utew nengehuziyan he neketerebahu is idsuhul kandan, iyan, tigsengeelad ded daan he pelata is insuhul kandan.

¹¹ Umba hein edewaten dan en haazà is suhul kandan, ne neepes dan ne migkeg̵iyan dan haazà is etew he mibpeterebahu kandan te,

¹² ‘Sengeuras dà is kedterebahu kayi te nengehuziyan, ne sikami, ne tivuuk he andew is ked-antus dey te utew meinit, ne imped-iiring nu zà is suhul zey te langun!’

¹³ Ne migkeg̵iyan dutun te etew is sevaha kandan te, ‘Geli, wazè ku sikiyu lupig̵i. Su is mid-ulaula ku ne iyan neuyunan tew he tigsengeelad he pelata is idsuhul ku te uman sevaha keniyu.

¹⁴ Dewata niw en heeyan is idsuhul ku keniyu ne ulì kew su egkesuatan ku he mesuhuli heini is nengehuziyan te iring te suhul ku keniyu.

¹⁵ Kenè be egkehimu he iyan a ebayàbayà te kediey he selapì? Egkesina kew ve kandan tenged te ketulanged ku?’ ”

¹⁶ Ne migkag̵i si Jesus te, “Is egkengehuziyan guntaan ne iyan egkengehuna keuzemà, ne sikan is egkengehuna g̵untaan ne iyan maan egkengehuziyan keuzemà.”

Is Iketelu he Kebpesevuta ni Jesus te Kemetayen Din

¹⁷ Ne te kedtekezeg eni Jesus diyà te Hiruselim, migkeg̵iyan din sikan is sepulù wey zezuwa he sumusundan din he medtapid sikandan su zuen egkeg̵iyen din kandan dutun te ziyè dan pa te zalan.

¹⁸ Ne ke sikandin te, “Netuenan niw he edhendiyè kiw te Hiruselim. Ne emun ebpekeuma kiw zutun, siak is Kakey te Menusiyà, ibpalad a ziyà te menge punuan he memumuhat wey menge menunudlù te kesug̵uan. Ne egkeuyun dan he ebpehimetayan a,

¹⁹ ne ibpalad e zan daan diyà te menge etew he kenà menge Hudiyu. Ne is menge etew he kenà menge Hudiyu, ne ed-iringen e zan te velvelayen, ebug̵elen e zan, ne idransang e zan te krus su edhimetayan a. Ne seled te tetelu he andew zutun, ebenhawen a te Megbevayà.”

Is Kedhangyù te Iney ni Santiago wey ni Juan

²⁰ Ne zutun mid-uvey ziyà te ki Jesus is esawa ni Sibidiyu zuma is dezuwa he anak din he maama. Midluhud sikandin diyà te etuvangan ni Jesus su zuen ebuyuen din.

²¹ Ne mid-insaan ni Jesus te, “Hengkey is egkesuatan nu?” Ne midtavak haazà is bahi te, “Heini is dezuwa he anak ku he sumusundan nu, egkesuatan ku he, keuzemà ke ebpinuu ke en diyà te pinuuwè nu te kedhadì, ibpepinuu nu zaan sikandan, is sevaha ziyà dapit te egkekewanan nu, ne is sevaha, diyà dapit te egkeg̵ivang nu.”

²² Ne migkeg̵iyan ni Jesus haazà is dezuwa te, “Wazè niw mesavut ke hengkey is edhengyuen niw. Egkeantus niw ve is merasey he ibpaantus kedì?” Ne midtavak dan is dezuwa te, “Uya, egkeantus dey.”

²³ Ne ke si Jesus te, “Benar iyan he ibpaantus keniyu is iring te ibpaantus kedì, iyan, kenà a iyan ebpilì ke hentei is ibpepinuu ziyà te zapit te egkekewanan ku wey ziyà te zapit te egkeg̵ivang ku, su iyan dà ebpekepinuu zutun sikan is etew he midteg̵enahan te Amey ku he Megbevayà.”

²⁴ Ne hein nezineg haazà duen te zuma zan he sepulù he sumusundan, wazè dan ikesuat is mibeelan dutun te zezuwa he telehazi.

²⁵ Ne tenged dutun mid-umew ni Jesus sikandan langun ne ke sikandin te, “Netuenan ta he is menge punuan te menge inged, ne utew zan memevurut wey is menge zatù dan ne edatùdatù dà sikandan is layun ebmandar te menge etew.

²⁶ Iyan, sikiyu mulà, kenà egkehimu is iring kayi ziyan te keniyu. Su ke zuen sevaha keniyu he egkesuat he mekelavew, kinahanglan he sulug̵uen sikandin te langun he menge zuma zin;

²⁷ ne emun duen sevaha keniyu he egkesuat he iyan sikandin ebpeketikangen te langun keniyu, kinahanglan he iyan sikandin mebpekevavà te langun.

²⁸ Su iring te siak, is Kakey te Menusiyà, kenà iyan inhendini ku te kelibutan is wey a metevangi te menge etew, kekenà, wey a meketavang ne wey a zaan mekepehimatey wey ku mevelukasi is mezakel he menge etew.”

Is Kebewii te Zezuwa he Lakap

²⁹ Ne hein ed-awè dan en diyà te inged he Hiriku utew mezakel he menge etew is nemenduma ki Jesus.

³⁰ Ne zuen dezuwa he lakap he ebpimpinuu diyà te kilid te zalan. Ne hein netuenan dan he edsag̵ad si Jesus dutun, mid-umew zan is egkag̵i te, “He Zatù, kehizuwi key kenikew su iyan ka sikan is netagnà he kevuwazan ni Hadì David!”

³¹ Ne nepeukan sikandan te menge etew zutun ne migkeg̵iyan sikandan te menge etew he med-engked dan he ebpengumew. Iyan, nasì en mesug̵ù sikandan is ebpengumew te, “He Nengazen he kevuwazan ni David, kehizuwi key!”

³² Ne zutun midteren si Jesus ne migkag̵i ziyà te kandan te, “Hengkey is kinahanglan niw he ed-ul-ulahan ku keniyu?”

³³ Ne midtavak dan te, “Datù, iyan kinahanglan dey is mekeehè key.”

³⁴ Ne nehizuwan sikandan ni Jesus ne midampè din is menge mata zan. Ne zutundutun nepuwasan is ked-ehè dan, ne miduma zan ki Jesus.