Mateo 15 - Manobo Western Bukidnon

Is Tulumanen te Menge Perisiyu

¹ Ne zutun, duen menge Perisiyu wey menge menunudlù te kesug̵uan he menge tigHiruselim he midhendiyà te ki Jesus. Mid-insè dan ki Jesus te,

² “Is menge sumusundan nu, maan is edsupaken dan is menge tuluuwen he imbilinbilin kenitew te lukes tew? Su is menge sumusundan nu, kenè dan ebpenlùlù te menge velad dan te hustu he paag̵i te kegkaan te kenè dan pa ebpuun egkaan.”

³ Ne mid-insà daan si Jesus diyà te kandan te, “Ne sikiyu zaan, maan is, pinaag̵i te kedtumana niw te menge tuluuwen he imbilinbilin keniyu te menge apù niw, ne edsupaken niw is sug̵ù te Megbevaya?

⁴ Su migkag̵i is Megbevayà te, ‘Tehuza niw is amey niw wey iney niw.’ Ne migkag̵i zaan te, ‘Ke zuen edsulà te amey zin wey iney zin, ne kinahanglan he edhimetayan.’

⁵ Ne iyan keniyu he penurù is: ke zuen etew he zuen din igketavang te iney zin wey amey zin, idtug̵ut niw he egkag̵i sikandin diyà te kandan te, ‘Heini is idtavang ku pezem keniyu, kenè ku igkeveg̵ey su imbuwis ku en heini te Megbevayà.’

⁶ Ne zutun,” ke si Jesus, “sumalà is penurù niw, wazè en kinahanglan he ebeg̵ayan din pa te tavang is ginikanan din. Iyan heini paag̵i niw wey niw kenà metuman is Lalag te Megbevayà wey niw iyan metuman haazà is keniyu he penurù.

⁷ Tarù is kedtuu niw te Megbevayà! Utew hustu is Lalag te Megbevayà he insurat te tipehuna he ebpeneuven he si Esaias. Netagnè kew zin, su ke sikandin te,

⁸ ‘Heini he menge etew, egkag̵i zan he edtehuzen e zan, iyan, wazà kedtuu he neseled diyà te g̵ehinawa zan.

⁹ Wazà pulus te kedsimbaha zan kedì su zutun te kebpenurù dan, egkeg̵iyen dan he menge sug̵ù ku is kandan dà he ebpeveelan te menge etew.’ ”

Is Ibpekesalà te Etew

¹⁰ Ne zutun mid-umew ni Jesus is mezakel he menge etew zutun he med-uvey zan diyà te kandin. “Pemineg kew,” ke sikandin, “wey niw mesavut.

¹¹ Is igkeepesi te Megbevayà te etew, ne kenà iyan sikan is egkeenen he id-ahuk dutun te etew ziyà te vèbè din, kekenà, iyan sikan is menge mezaat he lalag he egawas he ebpuun te vèbè dutun te etew.”

¹² Ne mid-uvayan si Jesus te menge sumusundan din ne ke sikandan te, “Netuenan nu ve he nepeukan ka te menge Perisiyu tenged te menge lalag nu g̵eina?”

¹³ Ne midtavak si Jesus te, “Ebezuten is minsan hengkey he pinemula he wazà ipemula te Amey ku he Megbevayà.

¹⁴ Bey-ani niw en is menge Perisiyu. Iring sikandan te menge lakap. Ne ke zuen lakap he ed-eg̵aken din is sengelelakap, haazà is ebpeeg̵akà, ne pudu egkeulug diyà te vitu.”

¹⁵ Ne zutun migkag̵i si Pedro te, “Luwasa nu kenami sikan is kehulug̵an te sempitè nu g̵eina.”

¹⁶ Ne migkag̵i si Jesus te, “Kenè niw pe ves egkesavut?

¹⁷ Kenè niw ves egkeisip he is id-ahuk ta ziyà te vèbè ta, ne ebpehendiyà te g̵etek ta ne zutun egawas puun te lawa ta? Ne kenà iyan haazà igkeepes te Megbevayà.

¹⁸ Iyan, is menge mezaat he lalag he ziyà egawas te vèbà te etew, diyà ebpuun te g̵ehinawa zin, ne iyan heini utew igkeepesi kandin te Megbevayà.

¹⁹ Su ziyà te g̵ehinawa te etew ebpuun is menge meezaat he isip he utew igkeepes te Megbevayà iring te kebunù, kedhilavet te kenè din esawa, meremerik he ulaula, kebpenakew, kedtarùtarù diyà te hukmanan, wey is kebpenudtul zin te tarù wey mezeeti is dengeg te sengeeetew.

²⁰ Iyan heini menge ulaula he igkeepes te Megbevayà, iyan, kenè din igkeepes is kegkaan ta he wazè ki mekepenlùlù te velad ta sumalà is betasan te menge Perisiyu.”

Is Kedtuu te Vahi he Kenà Hudiyu

²¹ Ne mid-awà si Jesus dutun su edhendiyà te inged he uvey te menge inged he Tiru wey Sidun.

²² Ne zuen dutun nekeubpà he vahi he tigKenaan. Ne midtelavuk haazà ki Jesus su edhangyù, ke sikandin te, “He Zatù he kevuwazan ni Hadì David, kehizuwi a kenikew su zuen anak ku he vahi he egkerasey utew su edlelungen te mezaat he mulin-ulin.”

²³ Iyan, kenà edseg̵ipaan ni Jesus. Ne zutun, mid-uvayan si Jesus te menge sumusundan din; ne midhangyù dan he ke sikandan te, “Ipeulì nu heeyan is bahi su kenà edsuwey kenitew he ebpekeuringer.”

²⁴ Ne zutun migkeg̵iyan ni Jesus haazà is bahi te, “Midsug̵ù a te Megbevayà he iyan dà ibpetevangan kedì is kevuwazan ni Israyil he nengetazin iring te kerehidu.”

²⁵ Ne zutun mid-uvey haazà is bahi ne midluhud diyà te etuvangan ni Jesus is edhenduen te, “Datù, tevangi a!”

²⁶ Ne midtavak si Jesus te, “Kenà meupiya ke egkuwaan ta is egkeenen te menge vatà ne idsamak te menge asu.”

²⁷ Ne migkag̵i haazà is bahi te, “Benar iyan, Datù, iyan, minsan ke asu ne ebpekekaan gihapun te menge mumu he egkengeulug puun te lemisahan te teg̵iasu kandin.”

²⁸ Ne migkeg̵iyan ni Jesus haazà is bahi te, “Bayi,” ke sikandin, “utew zekelà is kedtuu nu te Megbevayà. Ne ibeg̵ey ku kenikew is ebuyuen nu.” Ne zutundutun neulian haazà is anak dutun te vahi.

Is Kebewii te Mezakel he Menge Etew

²⁹ Ne mid-awà si Jesus dutun ne mibpemeyvey te ranew he Geliliya. Midtekezeg sikandin diyà te vuvungan dutun ne mibpinuu.

³⁰ Ne mibpenhendiyà te kandin is utew mezakel he menge etew. Mibpenduma zan is menge piang, menge pungkul, menge lakap, menge emew. Ne miduma zan is mezakel pa he egkengezeruwan. Ne insavuk dan haazà diyà te etuvangan ni Jesus ne nengeulian din is langun dutun te mibpevawì kandin.

³¹ Ne utew nengeinuinu is menge etew zutun te nengeehè dan. Su ebpekekag̵i en sikan is emew; ne neulian en sikan is pungkul; sikan is piang, ne ebpekehipanew en; ne sikan is nengelakap, ne ebpekeehè en. Ne midalig dan dutun is Megbevayà he edsimbahan dan te menge kevuwazan ni Israyil.

Is Kebpekeena te Heepat he Libu he Menge Etew

³² Ne mid-umew ni Jesus is menge sumusundan din, ke sikandin te, “Kehizu kayi he menge etew su tetelu en he kezukileman is wazè dan medsuwey kediey, ne wazè dan en egkekaan. Kenà meupiya he ebpekeulì sikandan te wazè dan mekekaan su kela ke luyahi sikandan diyà te zalan.”

³³ Ne migkag̵i haazà is menge sumusundan din te, “Meziyù heini te menge valey. Ne wazà kayi egkekuwaan ta te ibpekaan keniyan te utew mezakel he menge etew.”

³⁴ Ne mid-insà si Jesus te, “Pira he vuuk is supas niw?” Ne midtavak dan te, “Pitu he vuuk wey pira he leg̵as he pait he zezeisek,” ke sikandan.

³⁵ Ne migkeg̵iyan ni Jesus he mebpinuu ziyà te tanà haazà is menge etew.

³⁶ Ne zutun migkuwa zin haazà is pitu he supas wey menge pait ne mibpeselamatan din te Megbevayà. Ne mibpenevìtevì din ne imbeg̵ey zin diyà te menge sumusundan din haazà ne intukid te menge sumusundan din ipemeg̵ey haazà diyà te menge etew.

³⁷ Ne nemekekaan is langun he menge etew zutun ne nengehantey. Ne pitu pa he vinevey is netig̵um te menge sumusundan ni Jesus he samà dutun te menge etew.

³⁸ Heepat he libu is menge maama zutun te nekekaan ne wazà iragkes te ebilang is menge vahi wey menge vatà dutun.

³⁹ Ne zutun impemeulì ni Jesus haazà is menge etew. Ne mid-untud sikandin te avang ne midhendiyà te inged he Megadan.