Mateo 14 - Manobo Western Bukidnon

Is Kebpatey ni Juan Megbebewtismu

¹ Ne zutun he timpu nezineg ni Hadì Hirudis is tudtul mehitenged te ulaula ni Jesus.

² Ne migkag̵i si Hirudis diyà te menge sulug̵uen din te, “Heini si Jesus, siguradu he iyan ded si Juan Megbebewtismu he nevanhew, ne tenged kayi zuen din gehem wey zin meveeli is menge iring kayi he singyal,” ke sikandin.

^3-5 Ne iyan hinungdan te kegkehimetayi ki Juan, su midsawey zin si Hirudis he migkag̵i te, “Nekesupak ka te kesug̵uan su mid-esawa nu si Hirudyas,” ke sikandin. Ipag ni Hirudis si Hirudyas, su esawa te hazi zin he si Felipe. Ne tenged dutun te kedsewaya kandin ni Juan impezakep ni Hirudis si Juan ne mibpirisu zin. Edhimetayan din pezem si Juan, iyan, egkehandek te menge Hudiyu su netuenan dan he ebpeneuven si Juan te Megbevayà.

⁶ Ne neuma is andew he edsilibrahan ni Hirudis is ked-enaka kandin, ne midseyawan te anak he rag̵a ni Hirudyas is menge etew he nengetig̵um dutun. Ne utew nesuat si Hirudis tenged dutun.

⁷ Ne mibpesarig din haazà is midsayew. Ke sikandin te, “Buyù ka te minsan hengkey, ne ibeg̵ey ku kenikew.”

⁸ Ne zutun tenged te impenurù te iney zin, migkeg̵iyan din si Hirudis te, “Iveg̵ey nu kedì kayi, g̵untaan dà, is ulu ni Juan Megbebewtismu he id-ahuk diyà te pinggan.”

⁹ Ne zutun utew neseeng haazà is hadì, iyan, tenged dutun te pesarig din he nezineg te langun he menge bisita zin, midtuman din haazà is mibuyù dutun te rag̵a.

¹⁰ Ne mibpepungelan din si Juan te ulu ziyà te pirisuwan.

¹¹ Ne in-ahuk dan is ulu ni Juan te pelatu ne imbeg̵ey zan duen te rag̵a. Ne haazà is ulu, imbeg̵ey zutun te rag̵a ziyà te iney zin.

¹² Ne sikan is lawa ni Juan, mibeyaan te menge sumusundan din ne inleveng dan. Ne midhendiyè dan te ki Jesus su edtudtulan dan sikandin dutun te neulaula.

Is Kebpekeena te Lelima he Libu he Menge Etew

¹³ Ne hein netuenan eni Jesus is nehitavù ki Juan, mid-untud dan te avang ne mid-awè dan dutun te iyan dan dà su edhendiyè dan te wazà duen etew. Iyan, hein netuenan te mezakel he menge etew, ne mid-awè dan diyà te menge inged dan is ebpemeyvey he edtelukun ki Jesus.

¹⁴ Ne hein nekezunggù ensi Jesus, neehè din is mezakel he menge etew. Ne utew zin nengehizuwi sikandan ne mibewian din is egkengezeruwan dutun ne nengeulian.

¹⁵ Ne hein mahapun en, mid-uvayan sikandin te menge sumusundan din ne ke sikandan te, “Mahapun en utew ne wazà menge inged kayi te uvey tew; deyzey ke ibpeg̵enat nu en is menge etew wey zan mekehendiyà te menge inged ne egkepemasa zan is egkekaan dan.”

¹⁶ Ne ke si Jesus te, “Iyan kew mebeg̵ey te egkekaan dan.”

¹⁷ Ne ke sikandan te, “Es! Iyan dà naazen tew zini is lelima he vuuk he supas wey zezuwa he vuuk he pait.”

¹⁸ Ne migkag̵i si Jesus te, “Uwita niw zini.”

¹⁹ Ne zutun migkeg̵iyan din is menge etew he mebpinuu zan diyà te tanà; ne migkuwa zin haazà is lelima he supas wey haazà is dezuwa he pait ne midlingahà diyà te langit ne mibpeselematan din te Megbevayà. Mibpenevìtevì din is menge supas, ne imbeg̵ey zin diyà te menge sumusundan din. Ne minsan pa zutun wazà maamin haazà is supas. Ne midtukid te menge sumusundan din pemeg̵ayi zutun is menge etew.

²⁰ Ne is kada sevaha zutun te menge etew, nekekaan ne nahantey. Ne haazà is egkeenen, nesemaan pa te sepulù wey zezuwa he vinevey is nehimes te menge sumusundan din he menge tevì te supas.

²¹ Lelima he libu is kezakel zutun te menge maama he nekekaan ne wazà iragkes te ebilang is menge vahi wey menge vatà.

Is Kedhipanew ni Jesus Diyà te Wahig

²² Ne zutun impemeuntud ni Jesus te avang is menge sumusundan din wey zan mekehuna mekerapas pehendiyà te zehipag dutun te ranew su ibpemeulì din pa haazà is mezakel he menge etew.

²³ Ne hein nemekehipanew en haazà is menge etew, midtekezeg si Jesus diyà te vuvungan te sebsevaha zin ne mid-ampù. Ne hein mezukilem en, kemulu pa zutun si Jesus te sebsevaha zin.

²⁴ Ne haazà is nemen-untud te avang, diyè dan en te lawed te ranew ne nereg̵enan sikandan te zekelà he vag̵el su egkesinug̵ung dan is dekelà he keramag.

²⁵ Ne hein meg̵aan egkepawà, midhendiyà si Jesus te kandan he ziyà sikandin ebpenggiekgiek te zivavew zutun te wahig.

²⁶ Ne te kegkeahaa kandin te menge sumusundan din, utew zan neherati. “Gimukud!” ke sikandan, ne nemekeerang dan is egkengehandek.

²⁷ Ne zutun migkag̵i si Jesus diyà te kandan, “Sarig kew,” ke sikandin, “kenè kew mahandek su iyan a.”

²⁸ Ne zutun migkag̵i si Pedro te, “He Zatù, ke tutuu he iyan ka heeyan, pengelinteuwi nu he mekehendiyan a ne mekehipanew a kayi te zivavew te wahig.”

²⁹ Ne ke si Jesus te, “Hendini ka.” Ne midrenà si Pedro puun dutun te avang ne midhipanew zutun te zivavew te wahig pehendiyà te ki Jesus.

³⁰ Ne hein neg̵ezam din he utew mevendes is keramag dutun, ne netik-ew sikandin mahandek ne idteledted en sikandin. Ne segugunà sikandin nekekulahì te, “Tevangi a!”

³¹ Ne segugunà migewezi sikandin ni Jesus te egkag̵i te, “Maan is kenè ka ebpekesarig kediey? Maan is eduwazuwa ka?”

³² Ne mid-untud dan dutun te avang, ne mid-engked haazà is keramag.

³³ Ne is menge zuma he menge sumusundan din dutun te avang, mid-azap dan ki Jesus he ke sikandan te, “Benar iyan he Anak ka te Megbevayà!”

Is Kebewii te Etew Ziyà te Giniserit

³⁴ Ne hein nekeuma zan en diyà layun, nekezunggù dan diyà te inged he Giniserit.

³⁵ Ne nekilala si Jesus te menge etew zutun. Ne impemetukew zan is egkengezeruwan diyà te menge siringan he inged dutun. Ne nemekeuma is ebpenhated diyà te ki Jesus te menge etew he zuen daru.

³⁶ Ne midhangyù dan ki Jesus he itug̵ut din he mekeg̵awed dan te minsan sidsid dà te kumbalè din ne nengeulian is langun he nekeg̵awed dutun.