Marcos 5 - Manobo Western Bukidnon

Is Kebewii te Etew he Midsuukan te Menge Mezaat he Mulin-ulin

¹ Ne nekezunggù ensi Jesus diyà layun dutun te ranew, ne iyan haazà is nezungguan dan tanà te menge etew he Geresinen.

² Ne zutun te kedrenà ni Jesus dutun te avang, midsinug̵ung sikandin te etew he ziyà ebpuun te menge surung he penlevengà. Midsuukan haazà te menge mezaat he mulin-ulin

³ umba ziyà ed-ubpà te menge penlevengà. Ne utew mezesen sikandin ne tenged dutun kenè en egkevakus te minsan kedina.

⁴ Su neug̵et en, layun ebekusen is menge velad din wey paa zin, iyan, kada kebekusa kandin dutun, ne edrupeten din is pusas he ibpusas kandin, ne ebpemidtawen din dà is kedina he ibakus kandin. Wazè en ebpekeeg̵en kandin tuus te utew mezesen.

⁵ Umba, te maandew wey mezukilem, dutun sikandin edrig̵urig̵u te menge penlevengà wey menge vuntud ne edtulung ebpengulahì ne ebpemelian din is lawa zin te vatu.

⁶ Ne hein nepentawan dutun he etew si Jesus diyà te meziyù, mibpelelag̵uy is edsinug̵ung ki Jesus ne mid-azap kandin.

^7-8 Ne si Jesus, migkeg̵iyan din haazà is mezaat he mulin-ulin te, “Awè ka keniyan te etew!” Ne zutun nengulahì haazà is etew he ke sikandin diyà te ki Jesus te, “Ey! Sikew is anak te utew lavew he Megbevayà, ebmenuwen a kenikew? Edhengyuen ku kenikew he peserig̵a a kenikew he kenè e pa kenikew siluti su kayi ki te etuvangan te Megbevayà!”

⁹ Ne mid-insaan ni Jesus haazà is etew te, “Hentei is ngazan nu?” Ne midtavak dutun haazà is mezaat he mulin-ulin te, “Iyan ngazan ku si Liblibuwen su utew key mezakel is nemenuuk kayi te etew.”

¹⁰ Ne haazà is mezaat he mulin-ulin, mibpenigudu medhangyù sikandin diyà te ki Jesus he kenè din segseg̵a sikandan diyà te meziyù he tanà.

¹¹ Ne te uvey zutun duen utew mezakel he menge vavuy he ebpemenuwal ziyà te kelendig̵an.

¹² Ne sikan is menge mezaat he mulin-ulin, midhangyù dan diyà te ki Jesus te, “Ipehendutun key te menge vavuy wey key mekesuuk diyà te kandan.”

¹³ Ne midtug̵utan ni Jesus sikandan. Ne zutun nemengguwà haazà is menge mezaat he mulin-ulin puun dutun te etew ne midsuuk sikandan duen te menge vavuy. Haazà is menge vavuy, menge zezuwa he libu sikandan, ne nemelelag̵uy zan petupang dutun te utew mesilid he kelendig̵an ne mid-agbur zan diyà te ranew zutun ne nengelened dan maamin.

¹⁴ Ne zuen menge maama he ebpemen-elima zutun te menge vavuy, ne nemenhendiyè dan te inged is ebpemelelag̵uy wey ziyà te menge uvey zutun he unayan su ibpesavut dan ke hengkey is nehitavù. Ne hein nezineg haazà te menge etew, ne nemenhendiyè dan te ki Jesus su ed-ahaan dan ke hengkey is neulaula.

¹⁵ Ne hein nemekeuma zan, neehè dan kes midsuukan te edliblibuwen he menge mezaat he mulin-ulin. Neehè dan dutun he midsul-ub en te ugelingen ne hustu en is ked-isip-isip din ne tenged dutun utew zan en nengeinuinu.

¹⁶ Ne is menge etew he zutun he zaan, midtudtul zan dutun te menge etew is neulaula zutun te midsuukan te menge mezaat he mulin-ulin wey is neulaula zuen te menge vavuy.

¹⁷ Ne haazà is menge etew, midhengyuan dan si Jesus he med-awè en dutun te menge inged dan.

¹⁸ Ne hein ed-untud en si Jesus duen te avang, sikan is etew he neulian te kedsuuki kandin te menge mezaat he mulin-ulin, midhangyù sikandin he eduma ki Jesus.

¹⁹ Iyan, wazà medtug̵ut si Jesus he meduma kandin haazà is etew, kekenà, migkeg̵iyan din te, “Ulì ke en ne tudtula nu te kezuzumahi nu is utew zekelà he utew meupiya he midhimu te Nengazen diyà te kenikew wey is hizu zin kenikew.”

²⁰ Ne zutun migenat haazà is etew, ne midtukid din is menge inged diyà te prubinsya he Dikepulis, ne mibpenudtul zin is langun he meupiya he midhimu ni Jesus diyà te kandin. Ne nengeinuinu is langun he menge etew zutun.

Is Minatey he Vatà Wey kes Bahi he Zeruwanen

²¹ Ne midlayun ensi Jesus he ed-untud te avang. Ne hein nekezunggù dan nengeamur-amur zutun te veyvey is utew mezakel he menge etew he mid-uvey zan diyà te kandin.

²² Ne zutun nekeuma zaan is etew he egngezanan ki Hayru. Pengulu si Hayru te sevaha he simbahan te menge Hudiyu. Ne hein neehè din si Jesus ne mid-uvey sikandin diyà te kandin ne midluhud diyà te etuvangan din.

²³ Ne midhengyuan din si Jesus te, “Is anak ku he vahi he edrag̵arag̵e en, ne edluwàluwè en te g̵ehinawa. Edhengyuan ku sikew he hendiyè ka te valey ku wey nu penemsama wey meulii ne meuyag.”

²⁴ Ne midumahan sikandin ni Jesus. Ne zutun te ziyè dan te zalan egkengelipitlipit dan en su mezakel is nemenduma kandin he menge etew.

²⁵ Ne zuen dutun bahi he utew en nerasey su midsepulù en wey zezuwa he tuig is kegkevusbusi kandin ne kenà ed-engked.

²⁶ Ne haazà is daru zin, ne mezakel en he ebpemenambar is midtambar zutun ne naamin en is selapì din he insuhul zin te ebpemenambar kandin, iyan, nasì dà sikandin egkeurat kada edtembari.

²⁷ Nezineg dutun te vahi is tudtul mehitenged ki Jesus ne mibpenlietliet en daan sikandin dutun te mezakel he menge etew is edteg̵el ed-uvey ziyà te egkeiniyug̵an ni Jesus su wey mekeg̵awed te và dà kumbalà ni Jesus.

²⁸ Su iyan diyà te g̵ehinawa zin is: “Minsan ke mekeg̵awed e zà te kumbalè din ne egkeawè en heini is daru ku.”

²⁹ Ne te neg̵ewezan din dutun is kumbalà ni Jesus, ne mid-engked haazà is kegkevusbusi kandin ne netuenan din dutun he haazà is egezamen din, ne naawè en diyà te kandin.

³⁰ Ne si Jesus, netuenan din dutun he zuen neulaula te g̵ehem din ne midteren is ebpenlangulangu zutun te mezakel he menge etew is mid-insà te, “Hentei is migawed te kumbalè ku?”

³¹ Ne migkag̵i is menge sumusundan din te, “Es, mezakel utew he menge etew is ebpenlietliet diyan te kenikew ne maan is ibpenginginsè nu pa maan ke hentei is migawed te kumbalè nu?”

³² Ne zutun, ebpenlenglenguwen ni Jesus ke hentei is nekeg̵awed dutun te kumbalè din.

³³ Ne haazà is bahi, utew nahandek su netuenan din en ke hengkey is nehitavù diyà te kandin dutun te kegewezi zin te kumbalà ni Jesus. Ne mid-uvayan din si Jesus te egkerkeren ne midluhud diyà te etuvangan din ne midseysey zin is langun mehitenged dutun te zaru zin.

³⁴ Ne zutun, migkag̵i si Jesus te, “Bayi, umba neulian ka te zaru nu su midsarig ka kedì. Ulì ke en ne mebmelinawen is kebpekesavuk nu ne kenè ke en maan mezeruwi.”

³⁵ Ne te kemulu pa si Jesus egkag̵i zutun ne zuen nemekeuma he ebpuun diyà te valey ni Hayru. Ne migkag̵i zan diyà te ki Hayru te, “Kenè nu en bigbigata te eduma pa maan si Jesus su kenè niw en egkesepenan is gehinawa zuen te anak nu.”

³⁶ Iyan, si Jesus, wazè din itetenged haazà is migkag̵i te menge etew, kekenà, migkag̵i ziyà te ki Hayru te, “Kenè ka meseeng, kekenà, sarig ke zà kediey.”

³⁷ Ne zutun iyan dà impelaus ni Jesus he eduma kandan ki Hayru, si Pedro, si Santiago, wey si Juan he suled ni Santiago.

³⁸ Ne hein nekeuma zan en dutun te valey ni Hayru, ne naahà ni Jesus dutun he egkengeg̵isaweg is menge etew, ne nezineg din is ebpemenlelendag wey ebpemenineg̵ew.

³⁹ Ne midseled ensi Jesus dutun te valey ne migkeg̵iyan din sikandan te, “Maan is egkengeg̵isaweg kew? Maan is ebpemenineg̵ew kew? Wazà mebpatey heeyan is batà, kekenà, midlipezeng!”

⁴⁰ Ne te kegkezineg̵a zan dutun te migkag̵i ni Jesus ne và dan dà mid-engiti sikandin. Ne zutun impaawà ni Jesus is menge etew zutun te valey. Iyan dà wazè din ipaawà is amey wey iney zutun te vatà wey is tetelu he menge sumusundan din. Ne miduma zin sikandan dutun te mibperey-asan te vatà.

⁴¹ Ne hein dutun dan en, migewezan ni Jesus is belad dutun te vatà ne ke sikandin te, “Telita kumi,” he ke và dà egkeg̵iya te, “Bayi, enew kad!”

⁴² Ne mid-enew haazà is batà ne segugunà midhiphipanew. Menge sepulù en wey zezuwa is penuig̵en dutun te vatà. Utew nengeinuinu is iney wey amey zutun te vatà.

⁴³ Ne mibeleuzan sikandan ni Jesus he kenè dan penudtula ke hengkey is neulaula. Ne migkeg̵iyan din daan sikandan he ipekaan dan haazà is anak dan.