Marcos 4 - Manobo Western Bukidnon

Is Sempità Mehitenged te Venì

¹ Ne sevaha he andew zutun diyà te veyvey te ranew mid-uman penurua ni Jesus is menge etew. Ne utew mezakel is menge etew he nengeamur-amur ziyà te kandin, ne tenged kayi mid-untud sikandin diyà te avang he uvey zutun te veyvey ne zutun mebpinuu. Ne is menge etew, diyè dan dà te veyvey is ebpememineg kandin.

² Ne mezakel is impenurù ni Jesus kandan pinaag̵i te menge sempità.

³ Ke sikandin te, “Duen etew he midhendiyà te pemuleey zin su ebpemula.

⁴ Ne zutun te kebpemula zin, duen benì he nengeulug diyà te zalan, ne heini migkaan te menge tagbis.

⁵ Duen daan benì he nengeulug he nemekeuntud diyà te utew menipis he tanà he nekeapid dutun te menge vatu. Ne haazà, petuluy zà midtuvù su menipis haazà is tanà.

⁶ Asal hein mid-andew, neg̵angu petuluy haazà is menge pinemula su mevavew zà is nesenevan te zalid dan.

⁷ Ne zuen daan dutun benì he nengeulug diyà te tanà he menge zug̵iyen is menge sagbet dutun. Ne mibmemelayat haazà is sagbet ne mibpengulembezan haazà is menge pinemula ne wazà mekepemeg̵as.

⁸ Ne zuen daan benì dutun he ziyà mengeulug te meupiya he tanà ne haazà, midtuvù, ne midekelà ne nemeg̵as mulà. Duen dutun menge pinemula he mibeg̵as te tigketluan, ne zuen daan mibeg̵as te tigkeneman. Ne zuen daan mibeg̵as te tignenggatus.”

⁹ Ne mid-uman megkag̵i si Jesus te, “Kinahanglan he sevuta niw heini is nezineg niw.”

Is Tuyù te Menge Sempità

¹⁰ Ne hein wazè en utew etew zutun su iyan dan dà is menge sepulù wey zezuwa he sumusundan ni Jesus wey is kenà utew mezakel he menge etew, mid-insaan dan si Jesus ke hengkey is ibpesavut din dutun te menge sempità.

¹¹ Ne ke si Jesus te, “Sikiyu is menge sumusundan ku, ibpesavut en keniyu te Megbevayà sikan is in-eles dengan mehitenged te kedhadì din, iyan, is menge zuma he menge etew, ibpenurù kandan pinaag̵i te menge sempità.

¹² ‘Su zutun ebpurung dan edtengteng, iyan, kenè dan egkeahà, he ke và dà egkeg̵iya, ebpemineg dan, iyan, henduen be te wazè dan mekezineg su kenè dan edsevuten. Su emun egkesavut dan ed-engkezan dan is memezaat he ulaula zan ne egkepesaylu sikandan te Megbevayà!’ ”

Is Kehulug̵an Duen te Sempità Mehitenged te Venì

¹³ Ne mid-uman megkag̵i si Jesus te, “Egkesavut niw ve heini is sempità he migkag̵i ku? Emun kenè niw heini egkesavut kenè niw zaan egkesavut is duma he menge lalag ku he pinaag̵i te sempità.

¹⁴ Duen te sempitè ku, is kehulug̵an te kebpemula te etew, ne iyan is kedsengyawa te Lalag te Megbevayà.

¹⁵ Ne is benì, ne iyan is Lalag te Megbevayà he zuen nemekezineg duen, iyan, midlepew si Setanas ne midhimu zin he melipati zuen te nekezineg sikan is lalag he nezineg dan.

¹⁶ Ne sikan is benì he ziyà meketanà te menipis he tanà he zivavew te vatu, ne iyan is Lalag te Megbevayà he is nemekezineg duen, ne utew zan egkesuati te ebpemineg, ne edtuuwan dan.

¹⁷ Iyan, kenà egkeheg̵et is kedtuu zan ne kenà egkeug̵et, ke egkeumahan sikandan te samuk wey ke kemeresayan be tenged te kedewata zan te Lalag te Megbevayà, edlikù dan diyà te zaan he ulaula zan.

¹⁸ Ne sikan is benì, he ziyà mengeulug te tanà he zug̵iyen is menge sagbet dutun, ne iyan is Lalag te Megbevayà he nezineg te menge etew,

¹⁹ iyan, egkelipatan dan tenged te menge seeng dan kayi te kelibutan wey te kegkesuat dan te selapì wey te mezakel pa he menge azen, ne kenà ebpulus diyà te kandan is Lalag te Megbevayà.

²⁰ Ne sikan is benì he ziyà meketanà te meupiya he tanà, iyan is Lalag te Megbevayà he nezineg te menge etew ne midtuu zan; ne is Lalag te Megbevayà, ne ebpulus diyà te kandan. Is duma, ne ebpulus te zeisek diyà te kandan, ne is duma, ne ebpulus te malù dekelà, ne is duma, ne ebpulus te utew zekelà diyà te kandan.”

Is Sulù Diyà te Metikang he Selevukà

²¹ Ne mid-uman megkag̵i si Jesus diyà te kandan te, “Ke edtemtem is etew te sulù, kenà egkehimu he ebpelengkevan din te revan wey ke idsihung din be te vangkù he hizeg̵aan su idsavuk din diyà te selevukà.

²² Ne iring din ded daan is minsan hengkey he in-eles guntaan ne ibpeg̵awag̵awa zed keuzemà ne is minsan hengkey he penurù ku he kenè niw egkesavut guntaan ne egkesavut niw keuzemà.

²³ Kinahanglan he sevuta niw heini is nezineg niw.”

²⁴ Ne mid-uman megkag̵i si Jesus te, “Purungi niw pemineg̵a is penurù ku keniyu su sumalà is kebpurung niw kebpemineg, ibeg̵ey keniyu te Megbevayà is kedsavut, asal zekelè pa is ibpesavut din keniyu.

²⁵ Su is etew he edewaten din is ibpesavut kandin te Megbevayà, ed-umanan pa te Megbevayà is kedsavut din, iyan, is etew he kenè din edewaten is ibpesavut te Megbevayà, id-awà diyà te kandin is deisek he nesavut din en.”

Is Sempità Mehitenged te Kedtuvù te Venì

²⁶ Ne impelaus ni Jesus is egkeg̵iyen din, ke sikandin te, “Is kedekelà te edhedian te Megbevayà, ne iring te etew he mid-ezek te venì diyà te pemuleey zin.

²⁷ Wazè din hanew ke egkemenumenu haazà is kedtuvù dutun te pinemula zin, kekenà, ebpeseseg̵azen din dà. Edlipezeng sikandin te mezukilem ne ebaal te maandew ne kada andew edtuvù ne edekelà haazà is menge pinemula zin.

²⁸ Su iyan idtuvù te pinemula haazà is tanà. Edtuvù haazà is pinemula ne edlepew is dahun din ne human edlepew is beg̵as din ne zutun human egkeayun te kegkelutui.

²⁹ Ne emun egkelutuan en haazà, edreg̵unen dutun te teg̵itanà su iyan en tirag̵un.”

Is Ked-iseg Kebmahabet te Edhedian te Megbevayà

³⁰ Ne mid-uman megkag̵i si Jesus te, “Hengkey is meupiya he ebpetug-iringan tew te kedhadì te Megbevayà? Hengkey is meupiya he egemiten tew he sempità?

³¹ Is ked-iseg kebmahabet te edhedian te Megbevayà, ne iring te pinemula he utew zeisek is lisu zin he ibpemula haazà diyà te tanà.

³² Ne edtuvù ne edekelà ne egkehimu he iyan utew zekelà te langun he menge pinemula. Dezekelà is menge subpang din ne ebpekesesalag is menge tagbis dutun.”

³³ Pinaag̵i te mezakel he menge sempità impesavut ni Jesus is Lalag te Megbevayà diyà te kandan sumalà is netuenan din he egkesavut dan.

³⁴ Pudu menge sempità is impezineg ni Jesus diyà te menge etew, iyan, emun iyan dan dà te menge sumusundan din, ne ibpesavut din kandan is kehulug̵an dutun te menge sempità he penurù din.

Is Kedewaya ni Jesus te Keramag

³⁵ Ne hein midsanlep en is andew zutun, migkeg̵iyan ni Jesus is menge sumusundan din te, “Edhendiyè kiw te ziyà layun.”

³⁶ Ne zutun mid-ewaan dan is mezakel he menge etew ne is menge sumusundan ni Jesus, mid-untud dan duen te avang he sikan is mibpinuuwan ni Jesus ne migenat dan. Ne zuen daan duma zutun he menge etew he nemen-aavang is eduma kandan.

³⁷ Ne hein diyè dan en te lawed ne midtekewtekew mebpengeramag te utew mevendes ne egkeselikuvungan en te vag̵el haazà is avang ne egketeg̵uan en te wahig.

³⁸ Ne si Jesus, nekelipezeng diyà te huziyan he zulung dutun te avang he mid-uulunà. Ne migunggel sikandin dutun te menge sumusundan din he ke sikandan te, “Egkelavu kiw en! Kenè nu ve ebeliyen ke egkeg̵erè kiw?”

³⁹ Ne zutun nepukew si Jesus ne mid-enew ne migkeg̵iyan din haazà is keramag wey vag̵el he med-engked dan. Ne mid-engked haazà is keramag ne mibmelinew utew haazà is wahig.

⁴⁰ Ne migkeg̵iyan din is menge sumusundan din te, “Maan is egkengehandek kew? Wazè niw pe be kedsarig kedi?”

⁴¹ Ne zutun, utew nengeherati haazà is menge sumusundan din ne mibpein-inseey sikandan he egkag̵i is kada sevaha kandan te, “Hengkey heini vuwa he etew? Maan is minsan is keramag wey menge vag̵el ne ebpemineg kandin!”