Marcos 15 - Manobo Western Bukidnon

Is Ked-imbistigaha ni Pilatu ki Jesus

¹ Ne kegkepawè dà dutun, is menge punuan te menge memumuhat wey is menge menunudlù te kesug̵uan wey is menge ebmeg̵urangen te menge Hudiyu, wey is langun he menge menhuhusey, neuyun dan ke hengkey is ed-ul-ulahan dan ki Jesus, ne zutun mibakus dan sikandin ne inhated dan diyà te gubirnedur he Rumanu he si Pilatu.

² Ne si Pilatu, mid-insaan din si Jesus te, “Hadì ke ve te menge Hudiyù?” Ne midtavak si Jesus te, “Uya, iyan is migkag̵i nu.”

³ Ne is menge punuan te memumuhat, mezakel is menge sumbung dan mehitenged ki Jesus.

⁴ Ne tenged dutun mid-uman med-insà si Pilatu ki Jesus te, “Wazè nu ve igketavak kayi te mezakel he menge sumbung dan mehitenged kenikew?”

⁵ Iyan, wazà medtavak si Jesus te minsan hengkey he insà kandin ne tenged dutun neinuinu utew si Pilatu.

Is Kedhukumi ki Jesus te Kemetayen

⁶ Iyan neleyaman ni Pilatu is: kada tuig emun Pista en te Kedlevayi, edlibriyen din is sevaha he pirisu he edhengyuen te menge etew.

⁷ Ne zuen dutun pirisu he egngezanan ki Berabas, ne haazà si Berabas wey is menge zuma zin, ne midsukul zan te gubirnu ne nekepatey sikandin te etew zutun te kedsinamuk dan.

⁸ Ne hein mid-uvey ziyà te ki Pilatu is menge etew su edhengyuen dan he libriya zin is sevaha he pirisu sumalà is neleyaman din,

⁹ migkag̵i si Pilatu te, “Egkesuatan niw ve he edlibriyen ku keniyu is hadì te menge Hudiyu?”

¹⁰ Iyan ingkeg̵iya ni Pilatu zutun su netuenan din he iyan ketezengan ke maan is insumbung si Jesus te menge punuan te memumuhat su egkesina zan kandin.

¹¹ Iyan, is menge punuan he memumuhat, migkeg̵iyan dan is menge etew he iyan dan hengyua he edlibriyen si Berabas. Ne iyan haazà mid-ulaula zutun te menge etew.

¹² Ne zutun migkag̵i si Pilatu te, “Ne emun iyan heeyan, ebmenmenuwen ku heeyan is etew he migeraran he hadì te menge Hudiyu?”

¹³ Ne nememensag haazà is menge etew te, “Iransang te krus!”

¹⁴ Ne ke si Pilatu te, “Maan? Duen be mezaat he mid-ulaula zin?” Iyan, mid-iseg is keg̵urub dutun te menge etew he ebpememensag te, “Iransang te krus!”

¹⁵ Ne zutun midlibri ni Pilatu si Berabas wey zin mepenunuat is gehinawa zutun te menge etew. Ne impevug̵el zin si Jesus ne insug̵ù din te menge sundaru he iransang diyà te krus.

Is Kebpesipelahi ki Jesus te Menge Sundaru

¹⁶ Ne zutun impeseled si Jesus te menge sundaru zutun te turug̵an te gubirnedur. Ne midtig̵um dan is tivuuk he kumpeniya te menge sundaru.

¹⁷ Ne migkumbelaan dan sikandin te merig̵à he kumbalà su ebelvelayen dan sikandin he uvag kun hadì. Ne zutun mibengkulè dan te zug̵iyen he g̵awed ne insuup dan diyà te ulu zin.

¹⁸ Ne edtahud dan uvag kandin, ke sikandan te, “Kumusta ka is hadì te menge Hudiyu!”

¹⁹ Ne layun dan edlegkuta is ulu zin te tuked ne mid-ilevan dan, ne midluhuzan dan kun uvag.

²⁰ Ne hein nepezè dan en he ebaleyvaley kandin, midluwasan dan duen te kumbalà he merig̵à ne insun-ud dan kandin is daan he kumbalè din. Ne zutun mid-uwit dan sikandin pehendiyà te g̵awas dutun te inged su idransang dan te krus.

Is Kedrensanga ki Jesus Duen te Krus

²¹ Ne ziyà te zalan duen nesinug̵ung dan he etew he tigSirini he egngezanan ki Simon, he amey ni Alejandro wey ni Rufo. Heini si Simon, diyà ebpuun te unayan ne edhendiyà te inged. Ne mibpeg̵es dan ipetiang dutun te krus he edtiangen ni Jesus.

²² Ne mid-uwit dan si Jesus diyà te migngezanan te Gulguta, he ke và dà egkeg̵iya, tulan te ulu.

²³ Ne ibpeinum dan pezem si Jesus te vinu he mid-emutan te tambar he egngezanan te mira, iyan, wazè din dewata.

²⁴ Ne zutun inransang dan sikandin diyà te krus. Mibpemahinbahin dan is menge ugelingen din ne midripa zan dutun ke hengkey is egkeangken te kada sevaha kandan.

²⁵ Liwazè en ebpemenahik is andew hein inransang dan si Jesus.

²⁶ Insurat dan sikan is insumbunga kandin he egkag̵i te, “Is Hadì te Menge Hudiyu.”

²⁷ Ne zuen dezuwa he tulisan he inransang dan daan te krus. Is krus te sevaha, ne ziyè dan ipasek te zapit te egkekewanan ni Jesus, ne is sevaha zutun, ne ziyà te zapit te egkeg̵ivang din.

²⁸ Ne pinaag̵i kayi, netuman is netagnà dengan te insurat he Lalag te Megbevayà he edhenduen te, “Mid-isip sikandin he zuma te menge mesinupaken.”

²⁹ Ne is menge etew he sumeseg̵azà dutun, ebpemenangàtangà is ed-engitan dan si Jesus, ke sikandan te, “Na! Kunaan nu ke egkeg̵evè nu sikan is simbahan he Valey te Megbevayà ne egkevangun nu te seled te tetelu he andew!

³⁰ Libriya nu kun is keugelingen nu ne penaug ka keniyan te krus!”

³¹ Ne sikan is menge punuan te memumuhat wey sikan is menge menunudlù te kesug̵uan, iring din ded daan is mid-ulaula zan kandin, su mid-engitan dan daan. Ke sikandan te, “Wey zè be! Nelibri zin is duma he etew, iyan, is keugelingen din, kenè din egkelibri.

³² Sikew is uvag Kristu he hadì dey te menge Hudiyu, penaug ke en keniyan te krus ne edtuuwan dey sikew!” Ne sikan daan is dezuwa he inransang diyà te pesikilizè din, ne midsumpalit dan daan kandin.

Is Kebpatey ni Jesus

³³ Ne hein neudtu zutun is andew, midtik-ew mebmerusirem is tivuuk he kelibutan seled te menge tetelu he uras.

³⁴ Ne hein liwazè en he ebpenaug is andew zutun, ingkulahì ni Jesus is utew mezag̵ing he lalag he edhenduen te, “Ili, Ili, lama sebektani,” he ke và dà egkeg̵iya, “He Megbevayè ku, maan is ed-iniyug̵an a kenikew?”

³⁵ Ne zutun, is duma he etew he ebpemenhithitindeg dutun te uvey, hein nezineg dan haazà is lalag, ke sikandan te, “Pemineg kew su ebpengumawen din si Elias is sevaha zuen te ebpeneuven dengan te Megbevayà.”

³⁶ Ne sevaha zutun te menge etew is migaanggaan megkuwa te ispungha ne intereb din diyà te sukà ne midtiyuk din te zeisek he kayu ne impaahuk din diyà te vèbà ni Jesus wey zin haazà mesupsup. Ne migkag̵i te, “Pesegdana niw su ed-ahaan tew ke edlepew si Elias su wey zin ikepenaug!”

³⁷ Ne zutun ingkulahì ni Jesus is utew mezaging he lalag ne nevidtawan ne minatey.

³⁸ Ne is manggad he utew mekepal he ingkurtina ziyà te seled te simbahan he Valey te Megbevayà, neliwazà mevindas puun te zivavew pehendiyà te zizalem.

³⁹ Ne is egalen dutun te menge sundaru he edhithitindeg dutun te egkesineruwan ni Jesus, hein neehè din haazà is kegkevidtawi ni Jesus, ke sikandin te, “Benar he Anak heini te Megbevayà!”

⁴⁰ Ne zutun te malù meziyù, duen daan menge vahi he ed-ahà. Ne zutun si Maria Megdelina, si Maria he iney ni Jose wey ni Santiago he zeisek. Ne elin daan dutun si Selumi.

⁴¹ Heini is menge vahi, layun dan ebpekiduma ki Jesus ne midtevangan dan sikandin hein diyè pa sikandin te Geliliya. Ne mezakel zaan dutun is menge vahi he nemenduma kandin te kedhendutun din te Hiruselim.

Is Kedlevenga ki Jesus

^42-43 Ne hein mahapun en dutun te andew te kedteg̵ana he egkesunuzan te Andew te Kedhimeley, nekeuma si Jose he tig-Erimetiya. Sevaha sikandin he telehuzen he egalen te menge Hudiyu. Sevaha sikandin te menge etew he ebperateng te kegketuman te nengetagnà mehitenged te kedhadì te Megbevayà. Ne zutun, in-awè din diyà te g̵ehinawa zin is kegkehandek din ne midhendiyà te ki Pilatu ne midhangyù he egkuwaan din is lawa ni Jesus.

⁴⁴ Dutun neinuinu si Pilatu su maan is utew meg̵aan is kebpatey ni Jesus, ne tenged dutun mibpesug̵uan din sikan is egalen te menge sundaru ne mid-insà ke minatey en be iyan si Jesus.

⁴⁵ Ne hein netuenan din dutun he minatey en iyan, ne intug̵ut din ki Jose te egkuwa is lawa ni Jesus.

⁴⁶ Mibpemasa si Jose te meputì he malung ne migkuwa zin is lawa ni Jesus ne mibukusan din dutun te malung he meputì. Ne zuen surung he penlevengà he ingkalut diyà te kelendig̵an he pag̵ang. Ne zutun din iseled is lawa ni Jesus. Ne midlilizan din haazà te zekelà he vatu he idlekeb dutun te penlevengà.

⁴⁷ Ne si Maria Megdelina wey si Maria he iney ni Jose, neehè dan haazà ke hendei isavuk is lawa ni Jesus.