Marcos 11 - Manobo Western Bukidnon

Is Kedhendiyà ni Jesus te Hiruselim

¹ Ne hein uvey zan en diyà te inged he Hiruselim su ebpekeuma zan en diyà te inged he Bitpagi wey inged he Bitanya he ziyà te vuvungan he egngezanan te Ulivuwan, midsug̵ù ni Jesus is dezuwa te menge sumusundan din.

² Ke sikandin te, “Hendutun kew te inged he egkeumahan tew ne emun ebpekeuma kew zutun, ne egkeehè niw is intagkes he asnu he nati he wazè pa meuntuzi; hekazi niw ne uwita niw zini.

³ Ne ke zuen ed-insà keniyu ke maan is egkuwaan niw haazà is asnu, keg̵iyi niw te, ‘Egkinehenglanen heini te egalen tew he si Jesus ne id-ulì dà kan.’ ”

⁴ Ne zutun migenat haazà is dezuwa, ne neehè dan haazà is nati he asnu ziyà te kilid te zalan su intagkes diyà te uvey te g̵emawan te sevaha he valey.

⁵ Ne hein edhekazan dan en, duen menge etew zutun he mid-insà kandan te, “Ebmenuwen niw heeyan? Maan is edhekazan niw?”

⁶ Ne haazà is dezuwa, midtudtul zan is impekag̵i kandan ni Jesus ne midtug̵utan sikandan dutun te menge etew.

⁷ Ne mid-uwit dan haazà is nati ziyà te ki Jesus ne mibelhenan dan te kumbalè dan ne mid-untud si Jesus.

⁸ Ne zutun, is mezakel he menge etew, tenged te zekelà is kedtahud dan ki Jesus, impendempas dan is impenamput dan diyà te ibayà ni Jesus, ne is duma, impendempas dan daan dutun is menge zehunen he rasang he mibpemadtì dan diyà te menge keyuwen.

⁹ Mezakel he menge etew is midhuna ki Jesus ne mezakel zaan is ebpemeninundug kandin he ebpemengulahì he nengelipey he egkag̵i te, “Ebpeselematan tew is Megbevayà! Delig̵a is nekeuma he midsug̵ù te Nengazen!

¹⁰ Delig̵a is ebpekeuma he hadì he iyan kes ed-ilis duen te hadì he kepuun tew he si David! Delig̵a is Nengazen!”

¹¹ Ne hein nekeume en ensi Jesus diyà te Hiruselim midseled sikandin diyà te lavew he simbahan te menge Hudiyu he egngezanan te Valey te Megbevayà. Ne hein neehè din is langun dutun te seled te simbahan, mid-awà sikandin dutun. Ne g̵eina te mahapun en midhendiyà te inged he Bitanya zuma is menge sumusundan din.

Is Kedrewaki ni Jesus te Kayu he Igira

¹² Ne nepawà dutun te ziyè en ensi Jesus te zalan su edlikù dan diyà te Hiruselim he ebpuun te Bitanya, nevitil sikandin.

¹³ Ne nepantew zin dutun is kayu he zehunen he egngezanan te igira. Ne midhendutun si Jesus su ed-ahaan din ke zuen beg̵as dutun. Iyan, hein dutun en, neehè din he wazà beg̵as, kekenà, tekew he menge zahun, su haazà, kenè pa timpu te hustu he kebpemeg̵as.

¹⁴ Ne zutun migkag̵i si Jesus te, “Puun guntaan, kenè ke en egkekeenan te veg̵as nu.” Nezineg haazà is lalag din dutun te menge sumusundan din.

Is Kedseled ni Jesus Diyà te Valey te Megbevayà

¹⁵ Ne zutun te nekeuma si Jesus diyà te Hiruselim, ne midseled en maan sikandin diyà te simbahan he Valey te Megbevayà. Ne mibpenegseg din is menge limbungan he etew zutun he ebpemelegyà wey ebpememasa. Mibpemiley zin is menge lemisahan dutun te ebpemenliwà te menge selapì wey is menge pinuuwà te ebpemelegyà te ibpemuhat he merepatik.

¹⁶ Ne wazè din itug̵ut te minsan hentei he ed-uwiten dan is menge g̵elemiten dan he zutun ebayà te lama te simbahan.

¹⁷ Ne mibpenurù din is menge etew zutun, ke sikandin te, “Duen insurat he Lalag te Megbevayà he edhenduen te, ‘Is baley ku, ne egngezanan he valey he elempuanan te langun he menge etew ziyà te minsan hendei he ginhedian.’ Ne sikiyù,” ke si Jesus, “nasì niw veeli he ubpeey te ebpemenlimbung.”

¹⁸ Ne nezineg haazà te menge punuan he memumuhat wey menge menunudlù te kesug̵uan is mibeelan ni Jesus. Nengehandek dan ki Jesus su utew nengesuat is mezakel he menge etew te kebpenurù din. Ne tenged kayi ebpen-ahaan te menge punuan is paag̵i he metug̵uti sikandan he igkepehimetayan dan si Jesus.

¹⁹ Ne zutun te midsanlep en is andew, mid-awà ensi Jesus dutun te inged.

Is Kegkeg̵angu te Kayu he Igira

²⁰ Ne hein nepawà, midlikù dan dutun te inged ne ziyà te ibayè dan neehè dan kes kayu he igira he nepurung en meg̵angu, minsan is dalid din.

²¹ Ne netenuzan haazà ni Pedro ne ke sikandin diyà te ki Jesus te, “Ahaa nu man! Neg̵angu heeyan is kayu he igira he midrewakan nu.”

²² Ne migkag̵i si Jesus diyà te menge sumusundan din te, “Sarig kew te Megbevayà.

²³ Benar is egkeg̵iyen ku keniyu he minsan hentei he egkeg̵iyan din heeyan is buvungan te, ‘Awè ka keniyan ne umpak ka ziyà te zag̵at,’ ne kenà sikandin eduwazuwa, kekenà, neheg̵et diyà te g̵ehinawa zin he egketuman is migkag̵i zin, ne haazà is migkag̵i zin ne egketuman.

²⁴ Umba, egkeg̵iyan ku sikiyu he minsan hengkey is ebuyuen niw ziyà te Megbevayà, heg̵eta niw ziyà te g̵ehinawa niw he kenè en ebperis, ne egkezawat niw haazà is ebuyuen niw.

²⁵ Ne emun ed-ampù kew ziyà te Megbevayà, ke zuen egkepeukan niw he minsan hentei, peseyluwa niw, ne is Amey niw he Megbevayà he ziyà te langit, ebpeseyluwen kew zin daan te menge kebpekesupak niw kandin.

²⁶ Su emun kenè kew ebpesaylu te zuma niw, is Amey niw he ziyà te langit, kenè kew zin daan ebpeseyluwen te menge kebpekesupak niw.”

Is Ketenged ni Jesus

²⁷ Ne nekeuma zan en maan diyà te Hiruselim ne si Jesus, diyà edrig̵urig̵u te seled te simbahan he Valey te Megbevayà. Ne midhendiyà te kandin is menge punuan he memumuhat, wey is menge menunudlù te kesug̵uan, wey is menge ebmeg̵urangen te menge Hudiyu.

²⁸ Ne mid-insè dan ki Jesus te, “Heini is langun he ed-ul-ulahan nu zini te simbahan, duen nu ve ketenged te ked-ulaula kayi, wey hentei is mibeg̵ey kenikew te ketenged wey nu meulaula?”

²⁹ Ne midtavak si Jesus te, “Duen daan id-insè ku keniyu ne emun egketavak a keniyu, edtevaken ku zaan sikiyu ke hengkey is ketenged ku te ked-ulaula ku kayi te langun.

³⁰ Hentei is mibeg̵ey ki Juan Megbebewtismu te ketenged din te kebpemewtismu? Megbevayè be wey ke etew zà? Tevaka a.”

³¹ Ne zutun mibpein-inseey sikandan is egkag̵i te, “Emun egkeg̵iyen tew he Megbevayà, ne ed-insà sikandin ke maan is wazè tew tuuwi si Juan.

³² Ne emun egkag̵i kiw he etew zà, ne egkepeukan kiw te menge etew.” (Umba migkag̵i zan heini su nahandek dan te menge etew su midtuu is langun he menge etew he ebpeneuven si Juan Megbebewtismu te Megbevayà.)

³³ Umba, iyan tavak dan dutun ki Jesus is: “Hanew ta.” Ne ke si Jesus diyà te kandan te, “Kenè ku zaan egkeg̵iyen keniyu ke hengkey is ketenged ku te kebaal kayi te langun.”