Lucas 15 - Manobo Western Bukidnon

Is Kerehidu he Netazin

¹ Ne zutun he timpu, duen mezakel he menge mekesesalà he etew he menge menunukut te vuhis wey menge mesinupaken te kesug̵uan, ne nemenhendiyè dan te ki Jesus su ebpemineg̵en dan is penurù din.

² Ne utew heini ingkeepes te menge Perisiyu wey menge menunudlù te kesug̵uan he zutun daan, ne ke sikandan te, “Heini si Jesus, ne ebpemekiduma kayi te menge etew he utew mesinupaken te kesug̵uan tew ne egkaan daan sikandin duma kandan.”

³ Ne zutun impezineg ni Jesus kandan heini is sempità, ke sikandin te,

⁴ “Penenglitan, is sevaha keniyu ke zuen din nenggatus he ayam he kerehidu, ne netazin is sevaha zutun, hengkey is ed-ul-ulahan din? Siguradu egkeewaan din haazà is kesiyawan wey siyew he ebpemenabtab su ebpengahaan din haazà is sevaha he netazin taman te egketuredu zin.

⁵ Ne emun egketuredu zin ne utew sikandin egkelipey. Ne edsepipiyen din haazà su ed-ulì.

⁶ Ne ke ebpekeuma sikandin diyà te valey zin ne ebpenewag̵en din is menge zuma zin wey menge siringan din ne ke sikandin te, ‘Edlipey kiw en su neehè ku zed heini is netazin he kerehidu ku.’ ”

⁷ Ne ke si Jesus te, “Egkeg̵iyen ku keniyu he iring din ded daan, utew zekelà is kelipey ziyà te langit ke zuen sevaha he mesinupaken he ed-iniyug̵an din is memezaat he ulaula zin, kenà dutun te kesiyawan wey siyew he menge etew he kunaan dan ke memetazeng is ulaula zan wey kenà kinahanglan he ed-iniyug̵an dan haazà is mezaat he ulaula zan.”

Is Netazin he Selapì

⁸ Ne zuen pa maan sempità he impezineg ni Jesus kandan. Ke sikandin te, “Duen sevaha he vahi he midtipig te sepulù he elad he selapì he mahal su pudu pelata. Hengkey is ed-ul-ulahan din ke egketezinan haazà te sengeelad? Iyan ed-ul-ulahan din is edhuna edtemtem te sulù. Ne ebpeyupasan din is baley zin, ne ebpurungan din te ebpen-ahà taman te egkeehè din.

⁹ Ne emun egkeehè din ne ebpenewag̵en din is menge zuma zin wey menge siringan din, ne ke sikandin te, ‘Edlipey kiw en su neehè ku zed heini is selapì he netazin ku.’ ”

¹⁰ Ne migkag̵i si Jesus med-uman te, “Egkeg̵iyen ku keniyu he iring kayi is kedlipey ziyà te langit te menge velinsug̵uen te Megbevayà emun duen sevaha he mesinupaken he ed-iniyug̵an din is memezaat he ulaula zin.”

Is Anak he Midlangyew

¹¹ Ne impelaus ni Jesus is egkeg̵iyen din, ke sikandin te, “Duen sevaha he etew he zezuwa is anak din he pudu maama.

¹² Ne migkag̵i is hazi ziyà te amey zin te, ‘Amà, iveg̵ey nu en kedì is kediey he vahin kayi te menge azen tew.’ Ne iyan dà haazà ne mibahin dutun te amey is menge azen din dutun te zezuwa he vuuk he anak din.

¹³ Ne wazà utew meug̵et dutun ne imbelegyè en dutun te hazi is kandin he vahin ne midhipanew is ed-uwit te selapì din. Diyà sikandin medtandang te meziyù he inged ne zutun migastu zin is selapì din te wazà pulus.

¹⁴ Ne zutun naamin is selapì din. Ne nekeuma is utew mepait he vitil zutun te tanà, ne sikandin, wazè din en egkekuwaan te kinahanglan din.

¹⁵ Ne midhangyù sikandin te terebahu ziyà te sevaha he meg̵inged dutun. Ne mibeg̵ayan sikandin te terebahu he kebpenamak te vavuy ziyà te unayan.

¹⁶ Egkesuatan din pezem he mahantey sikandin te minsan ukap dà he idsamak te menge vavuy, iyan, wazà dutun mibeg̵ey kandin.

¹⁷ Ne hein neug̵et dutun ne nekepurung sikandin mekeisip-isip. Ke sikandin te, ‘Langun te menge sulug̵uen te amey ku ne idsegkayè dan is egkeenen, iyan, siaken heini, ne egkeumes e en te vitil.

¹⁸ Iyan tumù ne ed-ulì e zed diyà te amey ku, ne iyan egkeg̵iyen ku ziyà te kandin is: Amà, dekelà utew is salè ku ziyà te Megbevayà wey zini te kenikew te amey ku.

¹⁹ Kenà ad dait he ed-isipen nu pa maan he anak nu, kekenà, isipe e zà kenikew he sevaha te menge sulug̵uen nu.’

²⁰ Ne iyan dà haazà neisip din ne zutun midtandang sikandin med-ulì. Ne meziyù pa sikandin ne nepantew en dutun te amey zin. Ne utew nehizu haazà is amey zin he ed-ahà kandin. Ne mibpelelag̵uy is amey zin he edsinug̵ung kandin ne migkepkepan ne midhezekan sikandin te amey zin.

²¹ ‘Amà,’ egkag̵i haazà is kenakan, ‘utew zekelà is salè ku ziyà te Megbevayà wey ziyan te kenikew te amey ku. Kenà ad dait he ed-isipen nu pa maan he anak nu. Ne himuwe e zà he sevaha te menge sulug̵uen nu.’

²² Iyan, haazà is amey zin, mid-umew zin is menge sulug̵uen din dutun te valey, ne ke sikandin te, ‘Ihated niw pa zini sikan is meupiya he ugelingen, ne isun-ud niw ziyà te kandin. Sisingi niw is tezù din wey sun-uzi niw te sepatus is menge paa zin.

²³ Ne kuwaa niw sikan is nati he vaka he impelambù ku ne lepaa niw su egkaan kiw ne edlipey kiw.

²⁴ Su heini is anak ku, iring te minatey sikandin ne g̵untaan neuyag̵an. Netazin sikandin ne g̵untaan neturedu en.’ Ne zutun nebibu zan.

²⁵ Ne haazà maan,” ke si Jesus, “is kakey he anak dutun te etew, diyà sikandin te unayan dan. Ne hein ebpelpelinggume en sikandin is ed-ulì ne nezineg din is edtambur wey is leletepak te paa te ebpemenayew.

²⁶ Ne mid-umew zin is sevaha zutun te menge sulug̵uen te amey zin ne mid-insà te, ‘Hengkey is igkebibu te menge etew keniyan te valey?’

²⁷ Ne midtavak haazà is sulug̵uen te, ‘Nekeulì sikan is hazi nu. Ne impelapà te amey nu sikan is nati he impelambù su nekeulì sikandin he wazè ded mekeizi.’

²⁸ Ne zutun utew neepes haazà is kakey ne wazà mebpemenahik dutun te valey. Ne zutun mibpenaug haazà is amey zan he ednayùnayù is egkag̵i ziyà te kandin te, ‘Laus ke man dini, Mama.’

²⁹ Ne midtavak haazà is anak din te, ‘Tenuzi nu, Amà, ke sengemenu is keug̵et te kedterebahu ku kayi he iring te sulug̵uen nu. Wazè nu egketenuzan he sug̵ù nu he wazè ku pemineg̵a te minsan hengkey he timpu. Ne minsan pa zutun ne wazà a kenikew veg̵ayi te minsan kambing dà duen wey a mekelipeylipey zuma te menge emig̵u ku.

³⁰ Iyan, heini is anak nu he nekelaga te menge azen nu tenged te kebpengumpadi zin te menge vahi, ne iyan nu mulà midlepaan te impelambù nu he nati!’

³¹ ‘Mama,’ egkag̵i haazà is amey zin, ‘sikew, dini ka mulà layun duma ku. Ne is langun he azen ku, ne kenikew. Ne iyan ka teg̵ig̵aked te langun.

³² Ne kenè ta egkeeg̵en is kelipey ta, su heini is hazi nu, ne iring sikandin te minatey, ne g̵untaan neuyag̵an en. Netazin sikandin, ne g̵untaan neturedu en.’ ”