Kulusas 4 - Manobo Western Bukidnon

¹ Ne sikiyu zaan is duen din uripen, purungi niw is kedumala niw te menge uripen niw ne iveg̵ey niw kandan is metazeng wey hustu he ibeg̵ey ne kenè niw lipati he zuen daan teg̵iuripen keniyu ziyà te langit.

² Ne sikiyu is langun, pekehamen kew ampù ne purungi niw is ked-isip niw ke ed-ampù kew wey layun niw peselemati te Megbevayà is gag̵ew zin keniyu.

³ Ne emun ed-ampù kew, iampù key zaan keniyu. Ampù kew he himuwa te Megbevayà is paag̵i wey key mekesangyew te in-eles dengan he lalag din mehitenged ki Kristu. Umba zini a g̵untaan te pirisuwan su insangyew ku heini is lalag.

⁴ Ampù kew zaan he metevangi a te Megbevayà wey ku ikepesavut heini is lalag te hustu he paag̵i.

⁵ Purungi niw, menge suled, te minsan keenu he timpu is ulaula niw ziyà te menge etew he wazè pa medtuu ki Kristu su wey meketuu sikandan te Lalag te Megbevayà.

⁶ Kinahanglan he layun ibmeupiya te g̵ehinawa te menge etew is menge lalag niw kandan ne kinahanglan daan he iyan niw keg̵iya kandan is menge lalag he zuen din pulus ne emun ed-ul-ulahan niw heini, ne egketuenan niw ke hengkey is hustu he ketezengan he idtavak diyà te kada sevaha he etew.

Menge Pengemusta

⁷ Is langun he nengehitavù kedì dini, ne egketuenan niw ziyà te ki Tikiku te sevaha he suled tew he utew minahal. Duma zey sikandin he sulug̵uen te Nengazen he utew metinumanen te ebpeveelan kandin te Megbevayà.

⁸ Edsug̵uen ku sikandin diyan te keniyu su wey niw metueni ke hengkey is kebpekesavuk dey ne wey zaan maawà is ebpekesamuk te g̵ehinawa niw tenged kenami.

⁹ Iyan duma ni Tikiku, si Unisimu, is sevaha zaan he suled tew he metinumanen daan te menge sug̵ù te Nengazen. Minahal zey zaan sikandin. Duma niw si Unisimu he tigKulusas. Edtudtulan kew zan te langun he neulaula zini.

¹⁰ Ebpengemusta keniyu si Eristarku he zuma ku he pirisu. Si Marcos, is id-ag̵ew ni Bernabe, ne ebpengemusta zaan keniyu. Gelg̵elawa niw sikandin emun ebpekeuma ziyan. Netuenan niw en is intelaan ku keniyu mehitenged kandin.

¹¹ Ne elin daan ebpengemusta keniyu si Jesus he egngezanan daan ki Hustu. Heini is tetelu, si Eristarku, si Marcos wey si Hustu, ne iyan dà sikandan menge Hudiyu he zuma ku kayi te kedsengyawa ku te kedhadì te Megbevayà. Ingkelipey sikandan te g̵ehinawa ku.

¹² Ebpengemusta zaan keniyu si Ipapras. Duma niw zaan he tigKulusas he sulug̵uen ni Jesu Kristu. Layun kew zin id-ampù. Ed-ampù sikandin diyà te Megbevayà he mebmelig-en wey meheg̵et is kedtuu niw ne wey meheg̵et daan is kedtumana niw te egkesuatan te Megbevayà.

¹³ Iyan igkekeg̵iya ku kayi ziyan te keniyu su egkesuatan ku he metueni niw he zekelà is kedhag̵ù ni Ipapras wey kew mezeyzey ne kenà iyan kew zà, kekenà, ragkes daan is menge tumutuu ziyà te inged he Leudisiya wey ziyà te inged he Hirepulis.

¹⁴ Si Lucas, is minahal tew he duktur, ne ebpengemusta zaan keniyu wey si Dimas.

¹⁵ Ipengemusta key zaan te menge suled tew ziyà te inged he Leudisiya. Si Nimpa zaan wey is menge tumutuu he ziyà edsimba te valey zin, ebpengemusta key zaan kandan.

¹⁶ Emun egkepasad niw is kebasa kayi ziyà te menge tumutuu ziyan, ne ipevasa niw zaan heini ziyà te menge tumutuu ziyà te Leudisiya. Ne sikan daan is surat ku ziyà te menge tigLeudisiya, sembayi niw ziyà te kandan wey niw mevasa.

¹⁷ Keg̵iya niw ki Erkipu he purungi zin beeli is ebpeveelan kandin te Nengazen su sulug̵uen sikandin te Megbevayà.

¹⁸ Siak si Pablo, ebpengemusta a keniyu. Tuus heini is kedsurata ku te ngazan ku he kediey he surat heini. Kenè niw lipati he pirisu a ne iampù a keniyu. Berakat he ikeg̵ag̵ew kew te Megbevayà.