Juan 3 - Manobo Western Bukidnon

Si Jesus wey Si Nikudimu

¹ Duen etew he egngezanan ki Nikudimu. Sevaha sikandin he sakup te upakat he egngezanan te Peresiyu. Heini si Nikudimu, ne sevaha he punuan te menge Hudiyu.

² Midhendiyà sikandin te ki Jesus dutun te mezukilem ne migkeg̵iyan din si Jesus te, “Datù, netuenan dey he menunudlù ka he sug̵ù te Megbevayà su is menge egkein-inuwan he ebeelan nu, iyan dà ebpekehimu te iring kayi is etew he ebeg̵ayan te g̵ehem te Megbevayà.”

³ Ne midtavak si Jesus te, “Benar is egkeg̵iyen ku kenikew he wey zà ebpekeragkes is etew ziyà te menge etew he edhedian te Megbevayà ke ebpaanak sikandin ebpeuman.”

⁴ Ne mid-insà si Nikudimu ke, “Ebmenmenuwen te etew he meg̵urang en is kebpaanak kebpeuman su kenè en man sikandin ebpekelikù te g̵etek te iney zin wey iuman ianak.”

⁵ Ne ke si Jesus te, “Utew venar is egkeg̵iyen ku kenikew he wey zà ebpekeragkes is etew ziyà te menge etew he edhedian te Megbevayà ke id-anak sikandin pinaag̵i te wahig wey pinaag̵i te g̵ehem te Wag̵as he Mulin-ulin.

⁶ Is id-anak pinaag̵i te etew, ne etew zà daan, iyan, is id-anak pinaag̵i te g̵ehem te Wag̵as he Mulin-ulin, diyà ed-ubpà te kandin is Wag̵as he Mulin-ulin.

⁷ Kenè ka meinuinu te migkag̵i ku kenikew he kinahanglan he ebpaanak kew ebpeuman.

⁸ Is keramag, minsan hendei zà duen ebpevayà ne egketuusan ta su egkezineg ta is dag̵ing din, iyan, kenè ta egketuenan ke hendei ebpuun wey ke hendei ebpevayà. Iring din ded daan is gehem te Wag̵as he Mulin-ulin diyà te etew he id-anak pinaag̵i te g̵ehem din su kenà heini egkesavut te etew zà duen.”

⁹ Ne zutun mid-insà si Nikudimu te, “Egkemenumenu heini?”

¹⁰ Ne ke si Jesus te, “Punuan ka he menunudlù kayi te menge zuma tew he menge kevuwazan ni Israyil, ne kenè nu ves egkesavut heini is egkeg̵iyen ku?

¹¹ Kenè nu lipati he is egkeg̵iyen dey, kenà tarù. Netuenan dey he tutuu is ibpesavut dey su neehè dey en, iyan, kenè niw mulà edtuuwan is egkeg̵iyen dey.

¹² Ne emun kenè kew edtuu kediey ke ibpesavut ku keniyu is egkengeulaula zini te tanà, wey kew pe be meketuu ke ibpesavut ku keniyu is ed-ul-ulahan diyà te langit?

¹³ Hentei is nekehendiyà te langit? Iyan e zà is Kakey te Menusiyà su ziyà a ebpuun te langit.”

¹⁴ Ne mid-uman megkag̵i si Jesus te, “Dengan te kemulu pa ensi Moises diyà te tanà he wazà duen ed-ubpà he etew mibeelan din is uled he g̵alang ne intaud din te kayu ne imbayew zin. Siak is Kakey te Menusiyà, iring din ded daan is egkehitavù kedì keuzemà su idtaud a zaan te kayu ne ibayew a.

¹⁵ Umba egkehitavù heini su wey is langun he edtuu kediey meveg̵ayi te untung he wazà pidtemanan.

¹⁶ Utew mahal ziyà te g̵ehinawa te Megbevayà is tivuuk he menusiyà, ne tenged kayi minsan sikan is budtung he Anak din wazè din menug̵uni, kekenà, impehendini zin su wey is langun he edtuu kandin, kenà mesiluti is gimukud dan, kekenà, meveg̵ayi sikandan te untung he wazà pidtemanan.

¹⁷ Is Megbevayà, wazè e zin is Anak din sug̵ua zini te kelibutan te kedsilut te menusiyà, kekenà, su wey pinaag̵i kedì melibri is menusiyà.

¹⁸ Is minsan hentei he edtuu kedì kenè en sikandin edsilutan te Megbevayà, iyan, is kenà edtuu kediey, netuenan en he zaan he edsilutan sikandin su siak is budtung he Anak te Megbevayà, wazè e zin tuuwi.

¹⁹ Umba edsilutan sikandin su hein nekeuma a is migeraran te kerayag dini te kelibutan, midtumù din is kerusireman, he ke và dà egkeg̵iya, is kedsupaka te Megbevayà, kenà is kerayag su mezaat is ed-ul-ulahan din.

²⁰ Sikan is ed-ulaula te mezaat, kenè din egkesuatan is kerayag wey kenè din ed-uvayan is kerayag su kenè din egkesuatan he metueni is menge ulaula zin he mezaat.

²¹ Iyan, sikan is edtuman te tutuu he tuluuwen, edhendiyà mulà te kerayag. Umba edhendiyà sikandin te kerayag su wey metueni he pinaag̵i te g̵ehem te Megbevayà nehimu zin is metazeng he ulaula.”

Is Menge Lalag ni Juan Mehitenged ki Jesus

²² Ne neiwas heini, midhendiyà si Jesus wey is menge sumusundan din te prubinsya he Hudiya. Ne zutun dan med-ubpà taman te nepipira he andew su ebpemewtismu si Jesus te menge etew.

²³ Ne si Juan Megbebewtismu, ebpemewtismu zaan asal ziyà sikandin ebpemewtismu te inged he Inun he uvey te inged he Salim su mezakel is menge wahig dutun. Ne nemenhendutun is menge etew ne mibpebewtismu sikandan.

²⁴ (Wazè pa zutun pirisuwa si Juan.)

²⁵ Ne zutun duen menge sumusundan ni Juan he ebpekidlewanà te sevaha he etew he Hudiyu. Iyan edlewenaan dan is tuluuwen dan te menge Hudiyu te kebpemewtismu.

²⁶ Ne midhendiyè dan te ki Juan ne ke sikandan te, “Menunudlù, sikan is etew he zuma nu hein diyè ka layun te wahig he Hurdan, sikan is migkag̵i nu, ebpemewtismu zaan sikandin ne mezakel he etew is edsundan kandin.”

²⁷ Ne midtavak si Juan te, “Wazà gehem te minsan hentei ke wazà iveg̵ey kandin te Megbevayà.

²⁸ Iyan kew ebpeketistig̵us he migkag̵i ku he kenà a iyan sikan is mibpilì te Megbevayà wey mekehadì, kekenà, midsug̵ù a te Megbevayà wey a mehuna mekeuma, ne human sikan is hadì.

^29-30 Penenglitan ke zuen mibpengesawa, ne naangken din en haazà is mid-esawa zin. Sikan is kumekag̵un dutun, utew meupiya is gehinawa zin emun egkezineg din haazà is mibpengesawa he ebpekidlalag en dutun te mid-esawa zin. Ne iring din ded daan su utew ibmeupiya te g̵ehinawa ku zaan ke mezakel is edsundan ki Jesus. Kinahanglan he ed-iseg is bentug̵an ni Jesus, iyan, is kedì, kinahanglan he egkeawà,” ke si Juan.

³¹ Is ebpuun diyà te langit ne lavew sikandin te minsan hentei. Is menusiyà, ne zini zà ebpuun te kelibutan ne kelibutanen dà is egkeg̵iyen din. Iyan, sikan is ebpuun te langit, lavew sikandin te langun.

³² Egkeg̵iyen din is neehè din wey nezineg din diyà te langit, iyan, mezelag duen ebpekezawat te egkeg̵iyen din.

³³ Iyan, is minsan hentei he edawat kayi ebpekepenistig̵us he tutuu is egkeg̵iyen te Megbevayà.

³⁴ Ne is midsug̵ù te Megbevayà, egkeg̵iyen din is ibpekag̵i kandin te Megbevayà su is Megbevayà, mibpepurungan din sikandin peulini te Wag̵as he Mulin-ulin.

³⁵ Utew mahal ziyà te g̵ehinawa te Amey tew he Megbevayà is Anak din, ne insarig din kandin is kebayàbayà te langun.

³⁶ Is minsan hentei he edtuu te Anak te Megbevayà, ebeg̵ayan sikandin te untung he wazà pidtemanan; is minsan hentei he kenà ebpemineg te menge sug̵ù te Anak te Megbevayà, kenà egkeveg̵ayan te untung he wazà pidtemanan, kekenà, wazà pidtemanan te kegkepeuki kandin te Megbevayà.