Juan 1 - Manobo Western Bukidnon

Is Lalag he Ebpekeveg̵ey te Untung

¹ Dengan te wazè pa limbag̵a is minsan hengkey, daan en is migeraran te Lalag te Megbevayà. Heini is Lalag te Megbevayà, daan sikandin he zuma te Megbevayà ne iyan en Megbevayà.

² Dutun te kedlimbag̵a te langun, daan en sikandin he zuma te Megbevayà.

³ Is langun he midlimbag te Megbevayà, ne pinaag̵i kayi te Lalag, ne wazà minsan hengkey he midlimbag emun kenà pinaag̵i kandin te Lalag te Megbevayà.

⁴ Ne heini is Lalag te Megbevayà, iyan daan sikandin sikan is puunà te untung he wazà pidtemanan, ne heini is untung, iring te kerayag su ebpeketayew te kerusireman te isip te tivuuk he menusiyà.

⁵ Neketayew haazà is kerayag te kerusireman kayi te kelibutan. Ne is kerayag, wazà mezaag kayi te kerusireman.

⁶ Duen etew he migngezanan ki Juan he midsug̵ù te Megbevayà. Umba midsug̵ù heini si Juan te Megbevayà

⁷ su wey zin ikepenurù diyà te menge etew he iyan si Jesu Kristu sikan is tutuu he kerayag, su wey meketuu is tivuuk he menusiyà pinaag̵i zutun te penurù.

⁸ Heini si Juan, kenà iyan sikandin sikan is kerayag, kekenà, iyan sikan is edseysey ke hentei is kerayag.

⁹ Ne zutun he timpu nekeuma zini te kelibutan si Kristu, sikan is tutuu he kerayag. Iyan sikandin sikan is ebpeketayew te isip te tivuuk he menusiyà.

¹⁰ Ne nekeuma si Kristu zini te kelibutan. Pinaag̵i kandin midlimbag is kelibutan, iyan, wazà sikandin mekilala te menusiyà.

¹¹ Minsan te ziyà sikandin mekeuma te keugelingen din he menge inged, wazà utew zutun te menge zuma zin midawat kandin.

¹² Asal is minsan hentei he nekezawat wey midtuu kandin, mibeg̵ayan din sikandan te ketenged wey zan mehimu he menge anak te Megbevayà.

¹³ Is paag̵i te kegkehimu zan he anak te Megbevayà, kenà iyan kes paag̵i te kegkevuwad dini te kelibutan su wazè dan dutun ianak pinaag̵i te kegkevuwad te kelibutanen he amey, kekenà, iyan amey zan is Megbevayà.

¹⁴ Ne sikan is nekag̵i he Lalag te Megbevayà, nehimu he menusiyà ne mid-amur kenitew. Utew sikandin belig̵eg̵awen wey utew tutuu is menge lalag din. Neehè dey is utew zin kebpekelavew he iyan is kebpekelavew te vudtung he Anak te Megbevayà. Ne haazà is kebpekelavew zin, imbeg̵ey kandin te Amey zin he Megbevayà.

¹⁵ Ne heini si Juan, impesavut din ke hentei sikandin. Midhabet si Juan megkag̵i te, “Iyan heini sikan is etew he migkag̵i ku he ke siak te, ‘Duen etew he egkehuziyan kedìey he lavew pa kenà siak, su zengan te wazè e pa ianak, daan en sikandin,’ ” ke si Juan.

¹⁶ Ne g̵eina te utew sikandin belig̵eg̵awen kenà egketapus is menge meupiya he idtuvad din kenitew te langun.

¹⁷ Ne pinaag̵i ki Moises imbulus te Megbevayà sikan is menge kesug̵uan, iyan, pinaag̵i ki Jesus imbulus te Megbevayà is gag̵ew zin kenitew wey is tutuu he tuluuwen.

¹⁸ Wazè pa menusiyà he nekeahà te Megbevayà, iyan, sikan is Anak din he vudtung, impetuenan din kenitew is Amey zin he Megbevayà su iyan dan layun telezuma.

Is Kebpekilelaa ni Juan Megbebewtismu te Keugelingen Din

^19-20 Duen menge memumuhat wey menge kevuwazan ni Levi he midhendiyà te ki Juan Megbebewtismu. Midsug̵ù sikandan te menge punuan te menge Hudiyu puun te Hiruselim wey zan meinsai si Juan ke hentei sikandin. Ne iyan heini migkag̵i ni Juan su wazè din ieles, ke sikandin te, “Siak, kenà a iyan kes mibpilì te Megbevayà wey mekehadì.”

²¹ Ne ke sikandan te, “Iyan ke ve kes ebpeneuven dengan he si Elias?” Ne ke si Juan te, “Kenà a zaan.” Ne ke sikandan te, “Kela ke iyan ka sikan is netagnà he mibpenaub te Megbevayà?” Ne ke si Juan te, “Kenà a zaan.”

²² Ne ke sikandan en maan te, “Keg̵iyi key ke hentei ka su kinahanglan he zuen idtavak dey te midsug̵ù kenami. Hengkey is egkekag̵i nu mehitenged kayi?”

²³ Ne zutun midtavak si Juan. Is tavak din iring te insurat dengan te ebpeneuven he si Esaias. Ke si Juan te, “Iyan a sikan is netagnà he etew he egkezineg is kedwali zin diyà te tanà he wazà duen ed-ubpà. Ke sikandin te, ‘Tendanga niw is ibayà he ed-ikulen te Nengazen.’ ”

²⁴ Heini is menge etew he ed-insà ki Juan, ne menge sug̵ù te menge Perisiyu.

²⁵ Mid-insè dan en maan te, “Emun kenè ka iyan sikan is mibpilì te Megbevayà wey mekehadì, ne kenè ka zaan si Elias, wey kenè ka sikan is netagnà he ebpeneuven, maan is ebpemewtismu ka te menge etew?”

²⁶ Ne zutun midtavak si Juan te, “Tutuu iyan he ebpemewtismu a, iyan, pinaag̵i zà te wahig, iyan, duen duma niw he wazè niw mekilala

²⁷ he ebpekeuma he huziyan kediey he utew lavew kenà siak. Siak, minsan is kebpul-ut dà te sepatus din, kenè e pa zait he sulug̵uen din,” ke si Juan.

²⁸ Ne nehitavù heini is langun diyà te inged he Bitanya he ziyà layun te wahig he Hurdan he zutun ebpemewtismu si Juan.

²⁹ Hein mid-ilis he andew zutun, naahà ni Juan si Jesus he edhendiyà te kandin, ne ke si Juan diyà te menge etew, “Iyan heini sikan is etew he egngezanan te ibpemuhat he Nati he Kerehidu he ibeg̵ey te Megbevayà su pinaag̵i kandin egkeawà is menge memezaat he ulaula te menusiyà.

Is Kebpekilelaa ki Jesu Kristu

³⁰ Iyan heini kes migkag̵i ku he ke siak te, ‘Duen etew he egkehuziyan kediey, iyan, lavew sikandin kediey su zaan en sikandin te wazè e pa ianak.’

³¹ Hein aney,” ke si Juan, “wazè ku metueni ke hentei sikandin, iyan, umba ebpemewtismu a su wey metueni te menge zuma tew he menge kevuwazan ni Israyil he meg̵aan sikandin ebpekeuma.”

³² Ne mid-uman megkag̵i si Juan te, “Neehè ku is Wag̵as he Mulin-ulin he ebpuun diyà te langit he edlugtanà diyà te ki Jesus iring te merepatik ne wazè din ewai si Jesus.

³³ Ne hein aney zutun,” ke si Juan, “wazè ku pa metueni he iyan sikandin kes netagnà he hadì, iyan, sikan is Megbevayà he iyan midsug̵ù kedì wey a mekepemewtismu pinaag̵i te wahig, migkag̵i kedì he zaan te, ‘Emun egkeehè nu is etew he edtenaan wey kenà ed-ewaan te Wag̵as he Mulin-ulin, iyan en etew he ibpemewtismu zin is Wag̵as he Mulin-ulin.’

³⁴ Neehè ku en,” ke si Juan, “ne egkeg̵iyen ku keniyu he iyan sikandin sikan is Anak te Megbevayà.”

Is Kebpilia ni Jesus te Nehuna he Menge Sumusundan Din

³⁵ Ne hein mid-ilis dutun he andew, diyè en maan si Juan duma is dezuwa he menge sumusundan din te naahaan din ki Jesus.

³⁶ Ne neehè din en maan si Jesus is edsag̵ad. Ke si Juan te, “Iyan heeyan sikan is etew he iring te ibpemuhat he Nati he Kerehidu he imbeg̵ey te Megbevayà!”

³⁷ Ne hein nezineg heini zutun te menge sumusundan din he zezuwa, miduma zan ki Jesus.

³⁸ Midteren si Jesus ne midlilingey ne neehè din he eduma sikandan ne ke sikandin te, “Hengkey is tuyù niw?” Ne ke sikandan te, “Rabi,” he ke và dà egkeg̵iya, Menunudlù, “hendei ka ed-ubpà?”

³⁹ Ne midtavak si Jesus te, “Duma kew kedì wey niw maahà.” Ne miduma zan ne neehè dan is ed-ubpaan din. Mahapun en dutun ne wey zan med-ulì hein mezukilem en.

⁴⁰ Iyan si Andres sevaha zutun te zezuwa he nekezineg te migkag̵i ni Juan wey miduma ki Jesus. Telesuled si Andres wey si Simon he migeraran ki Pedro.

⁴¹ Ne si Andres, segugunè din mibpen-ahà is suled din he si Simon. “Neehè dey sikan is Misiyas,” ke sikandin. (Ne iyan kehulug̵an kayi te ngazan he Misiyas is Kristu, he ke và dà egkeg̵iya, mibpilì te Megbevayà he ibpahadì.)

⁴² Ne miduma zin si Simon ne midhendiyè dan te ki Jesus. Ne si Jesus, midtengtengan din si Simon. “Iyan ka si Simon he anak ni Juan. Egeraran ku sikew ki Sipas,” ke si Jesus. (Is gerar he Sipas ne iyan ded sikan is ngazan he Pedro. Ne is kehulug̵an kayi, ne vatu.)

Is Kebpilia ni Jesus ki Felipe wey ki Natanael

⁴³ Ne hein mid-ilis he andew zutun neisip ni Jesus he edhendiyà te prubinsya he Geliliya. Mibeyaan din si Felipe ne ke sikandin te, “Duma ka kedì.”

⁴⁴ TigBitsayda si Felipe, ne is inged he Bitsayda, iyan daan ed-ubpaan ni Andres wey ni Pedro.

⁴⁵ Ne si Felipe, mibeyaan din si Natanael, ne ke sikandin te, “Neehè dey en kes etew he netagnà dengan te ebpemeneuven wey netagnà ni Moises dutun te insurat din diyà te libru he kesug̵uan. TigNeserit sikandin he si Jesus he anak ni Jose.”

⁴⁶ Ne zutun migkag̵i si Natanael te, “Duen be etew he zuen din pulus he tigNeserit?” Ne ke si Felipe te, “Edhendiyè ki wey nu maahà.”

⁴⁷ Ne hein ebpelpelingguma zan en naahà ni Jesus si Natanael, ne ke si Jesus te, “Tutuu heini he kevuwazan ni Israyil su wazè din edtembunan.”

⁴⁸ Ne ke si Natanael te, “Maan is egkekilala a kenikew?” Ne ke si Jesus te, “Te wazè ke pa beyai ni Felipe, neehè ku sikew is diyà te sihung te kayu he igira.”

⁴⁹ Ne zutun migkag̵i si Natanael te, “Datù, tutuu ves iyan he iyan ka sikan is Anak te Megbevayà; iyan ka sikan is netagnà he hadì dey te menge kevuwazan ni Israyil.”

⁵⁰ Ne migkag̵i si Jesus te, “Ebpeketuu ke ve tenged dà te migkag̵i ku kenikew he neehè ku sikew ziyà te sihung te kayu he igira? Duen pa egkeehè nu keuzemà he lavew pa he egkein-inuwan.”

⁵¹ Ne mid-uman si Jesus megkag̵i kandin te, “Benar is egkeg̵iyen ku kenikew he egkeehè niw keuzemà is langit he egkepuwasan ne siak is Kakey te Menusiyà, duen egkengeehè niw he menge velinsug̵uen te Megbevayà he ebpememenahik wey ebpemenaug diyà te etuvangan ku.”