Ipisu 6 - Manobo Western Bukidnon

Is Sambag Diyà te Memeg̵urang wey Menge Vatà

¹ Sikiyu is menge vatà, kinahanglan he tumana niw layun is menge sug̵ù te menge g̵inikanan niw su ke tumutuu ki te Nengazen he si Jesus, iyan heini hustu he ulaula.

² Duen insug̵ù kenitew te Megbevayà he edhenduen te, “Tehuza niw is amey niw wey iney niw.” Ne heini he sug̵ù, ne iyan nehuna he sug̵ù he midsumpulan din te penaad su

³ ke sikandin daan te, “Emun edtumanen niw heini ne edtuvazan ku sikiyu te meupiya ne ebmelug̵ayad is untung niw zini te kelibutan.”

⁴ Ne sikiyu is menge g̵inikanan, kinahanglan he kenà igkepauk te menge anak niw is paag̵i niw te kebpenurù kandan, kekenà, ipenurù niw kandan is menge ulaula he zait te menge tumutuu, ne iyan niw isambag kandan is sambag he ebpuun te Nengazen tew.

Is Sambag Diyà te Menge Egalen wey Menge Sulug̵uen

⁵ Sikiyu is menge sulug̵uen, purungi niw tumana is menge sug̵ù keniyu te menge egalen niw zini te kelibutan. Tehuza niw sikandan ne kinahanglan he ebpuun te meupiya he g̵ehinawa niw is kedtumana niw te menge sug̵ù dan iring te iyan si Kristu edsug̵ù keniyu.

^6-7 Kinahanglan he layun meupiya is baal niw ne kenà dutun dà te ebentayan kew te egalen niw su kinahanglan he kenà iyan dà ebpekezalig te vaal niw is etew, kekenà, elin daan is Megbevayà su menge sulug̵uen kiw zaan ni Kristu ne kinahanglan he edtumanen ta is ebpeveelan kenita te Megbevayà tenged te ebpuun te keputian te atey ta is kedtumana ta kayi. Kinahanglan he meupiya is gehinawa ta zutun te vaal ta iring te iyan ebayàbayà kenita is Megbevayà ne kenà iyan dà is egalen ta zini te kelibutan.

⁸ Su minsan ke sulug̵uen ki, wey ke kenà, netuenan ta he ke meupiya is baal ta, ne meupiya zaan is idsuhul kenita te Megbevayà.

⁹ Ne sikiyu is menge egalen, iring din ded daan kayi is ul-ulaha niw ziyà te menge sulug̵uen niw. Kenè kew mebpelihandek kandan su netuenan niw he sikitew is langun, ke sulug̵uen ki wey ke egalen ki ve, ne zuen gihapun egalen ta ziyà te langit he iyan is Megbevayà ne wazè din ibpelavi te minsan hentei.

Is Menge Himan te Kebpekidtebek te Tumutuu

¹⁰ Menge suled, ketepusan heini he menge lalag ku keniyu: kinahanglan he lig-eni niw is kedsarig niw te Nengazen wey te lavew he zekelà he gehem din.

¹¹ Gemita niw is langun he menge himan te kebpekidtebek he ibeg̵ey te Megbevayà su wey kew mekesukul ki Setanas emun egemiten din is ketau zin te kegkeiza zin keniyu.

¹² Su kenà iyan edtebeken tew is menge etew zà duen, kekenà, iyan edtebeken tew is menge mezaat he kedesenan he ziyà ed-ubpà te langit wey is menge kenà egkeahà he hadì, wey menge egalen, wey menge ebayàbayà te langun he menge mezaat he etew he nesakup te kerusireman guntaan dini te kelibutan.

¹³ Umba, menge suled, gemita niw en is menge himan te kebpekidtebek he imbeg̵ey te Megbevayà. Su zutun emun egkeuma haazà is timpu he zutun utew mereg̵en is kedtebeka te menge mezaat, ne egkesukulan niw is menge kuntada niw ne emun egketapus en haazà is tebek ne wazè kew meewai te zesen.

¹⁴ Ne tenged kayi, andam kew en. Layun tutuu is egkeg̵iyen niw wey ed-isipen niw ne iyan heini bakes niw. Ul-ulaha niw layun is metazeng he ulaula ne iyan heini limbutung niw.

¹⁵ Andam kew layun te kebpenudtul te Meupiya he Tudtulanen mehitenged te kelinew he ibeg̵ey te Megbevayà, ne iyan heini sepatus niw.

¹⁶ Ne iyan utew kinahanglan is: layun kew sarig te Megbevayà ne iyan heini kelasag niw ne pinaag̵i kayi kenè kew egkesug̵at te menge egkeregreg he panà ni Setanas he iyan is menge penuley zin keniyu.

¹⁷ Ne zewata niw is kedlibriya keniyu te Megbevayà su iyan heini kalù niw he putew. Ne g̵emita niw layun daan is Lalag te Megbevayà su iyan heini sundang he ibeg̵ey keniyu te Wag̵as he Mulin-ulin.

¹⁸ Pekezesen kew ampù te minsan hengkey he timpu sumalà is ked-uwita keniyu te Wag̵as he Mulin-ulin. Buyù kew te tavang te Megbevayà ne layun kew andam ne peniguduwi niw layun te ked-ampù is langun he menge tumutuu.

¹⁹ Ne iampù a zaan keniyu he iveg̵ey kediey te Megbevayà is ketau te kebpenudtul te lalag din. Ne iampù niw zaan he kenà a mahandek, kekenà, iveg̵ey kediey is hustu he egkeg̵iyen wey ku ikepesavut is Meupiya he Tudtulanen he in-eles dengan.

²⁰ Umba nehimu a he sulug̵uen te Megbevayà su wey ku ikepenudtul heini is Meupiya he Tudtulanen. Ne tenged daan kayi te kebpenudtul ku, nehimu a he pirisu. Umba, menge suled, iampù a su wey kenà a mahandek te kebpenudtul su iyan heini ketengdanan he imbeg̵ey kediey te Megbevayà.

Is Kebpengemusta

²¹ Si Tikiku is minahal tew he suled wey metinumanen he sulug̵uen te Nengazen tew, iyan ebpeketudtul keniyu mehitenged te kebpekesavuk ku wey ke hengkey is egkeulaula ku kayi.

²² Umba edsug̵uen ku sikandin diyan su wey niw metueni ke hengkey is kebpekesavuk dey zini su wey meheg̵et is kebpekesarig niw te Megbevayà.

²³ Is Amey tew he Megbevayà wey is Nengazen tew he si Jesus, berakat he sikiyu is menge suled dey, tuvazi kew zan te melinawen he kebpekesavuk, wey ipeehè dan keniyu is kebmahala zan keniyu ziyà te g̵ehinawa zan wey heg̵eta zan is kedtuu niw kandan.

²⁴ Berakat he ikeg̵ag̵ew te Megbevayà is minsan hentei he kenà egkeawà diyà te g̵ehinawa zin is kebmahala zin te Nengazen tew he si Jesu Kristu.