Ipisu 3 - Manobo Western Bukidnon

Is Baal ni Pablo Ziyà te Kenà Menge Hudiyu

¹ Ne tenged kayi te langun, siak si Pablo, is pirisu tenged te kedsundan ku ki Jesu Kristu, layun ku sikiyu id-ampù diyà te Megbevayà. Umba nepirisu a su insangyew ku is Lalag te Megbevayà diyan te keniyu te kenà menge Hudiyu.

² Is Megbevayà, tenged te g̵ag̵ew zin keniyu, duen insarig din kediey he terebahu he iyan igkezeyzey niw. Netuenan ku he nezineg niw heini.

³ In-eles dengan heini, iyan, impesavut din kediey. Mehitenged kayi, duen ingkepesavut ku en keniyu pinaag̵i te surat.

⁴ Ne emun ebesahan niw heini, egketuenan niw is nesavut ku mehitenged te in-eles dengan mehitenged ki Kristu.

⁵ Dengan wazà heini ipezayag diyà te minsan hentei he menusiyà, iyan, guntaan, pinaag̵i te Wag̵as he Mulin-ulin, impezayag en te Megbevayà diyà te menge epustul wey ebpemeneuven din.

⁶ Ibpesavut ku keniyu heini is in-eles dengan he sikiyu is kenà menge Hudiyu, pinaag̵i te kedtuuwi niw te Meupiya he Tudtulanen, edtuvazan kew zaan te Megbevayà te langun he meupiya he idtuvad din te menge Hudiyu. Ne idragkes kew zaan dutun te lawa ni Kristu. Ne egkezawat niw is menge penaad te Megbevayà tenged te kebpekidsevaha niw ki Jesu Kristu.

⁷ Nehimu a he sulug̵uen te Megbevayà te kedsengyawa te Meupiya he Tudtulanen. Tenged dà te g̵ag̵ew zin kediey wey pinaag̵i te g̵ehem din imbeg̵ey zin kediey heini is ketengdanan.

⁸ Siak, lavew kediey is minsan hentei he menge tumutuu te Megbevayà. Ne minsan pa te iyan heini, midtuvazan a te Megbevayà pinaag̵i te kedsug̵ua zin kediey te kebpenudtul ziyan te keniyu te kenà menge Hudiyu te Meupiya he Tudtulanen mehitenged te utew lavew he zekelà he kenà egketegkad he meupiya he igketuvad kenitew ni Kristu.

⁹ Ne elin daan insug̵ua zin kediey su wey ku ikepesavut diyà te minsan hentei he etew ke hengkey is kedtumana zin te zaan he mid-isip din he ebeelan. Ne wazà dengan heini ipezayag su in-eles te Megbevayà he nenlimbag te minsan hengkey.

¹⁰ Umba wazà heini zengan ipezayag su wey g̵untaan pinaag̵i zà te menge tumutuu ki Jesus, ibpaahà te Megbevayà diyà te menge kedesenan wey menge egalen diyà te langit ke hengkey kezekelà is ketau zin he wazè med-iring-iring.

¹¹ Umba mid-ulaula zin heini su edtumanen din is mid-isip din dengan te wazè pa limbag̵a is minsan hengkey. Ne nehimu zin en heini g̵untaan pinaag̵i te Nengazen tew he si Jesu Kristu.

¹² Ne g̵untaan tenged te kebpekidsevaha tew ki Jesus wey pinaag̵i te kedsarig tew kandin, egkehimu en he ebpekeetuvang kiw te Megbevayà pinaag̵i te ked-ampù ne wazè en igkeeled tew kandin.

¹³ Ne tenged kayi te langun, kinahanglan, menge suled, he kenà igkeawà te kedsarig niw heini is kemereg̵enan he egkeantus ku tenged keniyu, kekenà, lipey kew su iyan ibmeupiya niw.

Is Kebmahala Kenitew ni Jesu Kristu

¹⁴ Ne tenged kayi te langun he intuvad kenitew te Megbevayà, edluhuzan ku te ed-ampù is Amey tew he Megbevayà.

¹⁵ Is langun he menge tumutuu he zini pa te lumpad wey ke ziyè en be te langit, ne migngezanan din sikandan he pemilya zin.

¹⁶ Ne edhengyuan ku sikandin he puun te utew zekelà he g̵ehem din, beg̵ayi kew zin te utew melig-en he kedtuu pinaag̵i te ked-ulini keniyu te Wag̵as he Mulin-ulin,

¹⁷ su wey, pinaag̵i te kedtuu niw, melumuni is gehinawa niw ni Jesu Kristu. Ne idhangyù ku zaan he heg̵eti zin wey lig-eni zin is kebmahala niw te minsan hentei. Umba idhangyù ku heini su wey sikiyu,

¹⁸ wey is minsan hentei kenitew te menge sakup te Megbevayà, iveg̵ey kenitew is kedsavut ke hengkey is kenà egkesukud he kebmahala kenitew ni Kristu ziyà te g̵ehinawa zin.

¹⁹ Berakat he mesavut niw is gag̵ew zin keniyu, minsan pa te kenà heini egkepurung egkesavut te minsan hentei. Egkesuatan ku heini su wey metuman diyan te keniyu is wazè din kurang he kegkeulini keniyu te Megbevayà.

²⁰ Edelig̵en tew is Megbevayà su, pinaag̵i te zekelà he g̵ehem din he impelumun din dini te kenitew, utew zekelà is egkehimu zin su lavew pa is egkehimu zin, kenà te minsan hengkey he egkeisip ta he ebuyuen.

²¹ Berakat he zelig̵a sikandin pinaag̵i kenitew te langun he menge tumutuu zin wey pinaag̵i ki Jesu Kristu g̵untaan he timpu wey te wazè din pidtemanan.