Ipisu 2 - Manobo Western Bukidnon

Is Gag̵ew te Megbevayà

¹ Dengan, henduen kew te minatey su wazè niw pa untung he wazà pidtemanan tenged te kenè kew pa zutun ebpemineg te menge sug̵ù te Megbevayà wey tenged te menge mezaat he ulaula niw.

² Dutun he timpu mid-ikul niw is mezaat he ibayà he iyan ed-ikulen te menge etew he kuntada te Megbevayà. Midtuman kew te menge sug̵ù ni Setanas. Iyan sikandin ebayàbayà te menge zuen din gehem diyà te hewhewanan. Iyan daan sikandin ebayàbayà te langun he kenà ebpemineg te menge sug̵ù te Megbevayà.

³ Ne sikitew zaan, elin kiw zengan ebpen-ulaula te mezaat sumalà is mezaat he kebayà te lawa tew, wey is mezaat he isip tew. Ne tenged kayi neragkes kiw pa zutun te silut iring te zuma he menusiyà he kenà sakup te Megbevayà.

⁴ Ne minsan pa te iyan en haazà, utew zekelà is hizu te Megbevayà kenitew ne utew kiw mahal ziyà te g̵ehinawa zin.

⁵ Ne minsan pa te iring kiw te minatey tenged te kenè tew kebpemineg te menge sug̵ù din, dutun te kebenhawa zin ki Kristu, inragkes kiw zin daan su wey tew maangken is untung he wazà pidtemanan. Midlibri kiw zin te silut tenged dà te g̵ag̵ew zin kenitew.

⁶ Ne is Megbevayà, tenged te nekidsevaha kiw ki Kristu, dutun te kebenhawa zin ki Kristu, mibanhew kiw zin daan wey kiw mekehadì duma ki Kristu ziyà te langit.

⁷ Umba mid-ulaula zin heini su wey ikepeehè din kenitew is utew lavew he kezekelà te g̵ag̵ew zin wey kedtavang din kenitew pinaag̵i ki Jesu Kristu te wazè din pidtemanan.

⁸ Su tenged dà te g̵ag̵ew zin kenita, midlibri ki zin te silut dutun te kebpeketuu ta. Wazè ki melibri pinaag̵i te kenita he vaal,

⁹ kekenà, imbeg̵ey zà kenita is untung he wazè din pidtemanan. Ne tenged dutun, wazà etew he igkezantal zin is kedlibriya kandin te silut su kenà iyan is kandin he ked-ul-ulaha te meupiya ingkelibri zin.

¹⁰ Su is kedlimbag̵a kenita he veg̵u, ne iyan baal te Megbevayà. Pinaag̵i te kebpekidsevaha ta ki Jesus midlimbag ki zin su wey ta meulaula is meupiya he midteg̵ana zin en he zaan wey ta meveeli.

Is Kebpekidsevaha ki Jesu Kristu

¹¹ Sikiyu is menge etew he kenà menge Hudiyu, isipa niw is daan he kebpekesavuk niw. Is menge Hudiyu, ne ebpesirkunsidar sikandan, ne egngezanan kew zan te menge etew he kenà ebpesirkunsidar, he ke và dà egkeg̵iya, kenè niw ebpetuusan is lawa niw sumalà is kesug̵uan he imbilinbilin ni Moises.

¹² Netuenan niw he zengan wazè niw upakat ki Kristu ne wazè kew iragkes te menge etew he pinilì te Megbevayà. Wazè kew zaan mekeambit duen te menge meupiya he impenaad te Megbevayà kandan. Wazà egkepaabut niw he tavang te Megbevayà ne kenà duen dà taman su wazè niw metueni ke hentei is tutuu he Megbevayà dini te kelibutan.

¹³ Iyan, guntaan, tenged te nekidsevaha kew en ki Jesus, sikiyu is menge etew he utew meziyù te Megbevayà dengan, impeuvey kew zin en tenged te kebpelisi keniyu te lengesa ni Jesus dutun te kebpehimatey zin.

¹⁴ Sikami is menge Hudiyu wey sikiyu is kenà menge Hudiyu, midhimu ni Kristu he melinawen en is kedepitè tew su midhimu kiw zin en he teltelezuma. Pinaag̵i te kebpehimatey zin duen te krus in-awè din is kegkekuntada tew he iring te elavat he nekepetug-elang kenitew.

¹⁵ Pinaag̵i te kebpehimatey zin, in-awè din is kebpetumana tew te kesug̵uan he imbilinbilin ni Moises ragkes is menge tulumanen su wey sikitew is dezuwa he kelasi te etew, mehimu zin he veg̵u en he kelasi te etew pinaag̵i te kebpekidsevaha tew kandin, ne tenged kayi naawè en is kegkekuntada tew.

¹⁶ Pinaag̵i te kebpehimatey ni Kristu ziyà te krus in-awè din is kebpekunkuntedehè tew te Hudiyu wey te kenà Hudiyu, ne midhimu kiw zin he sevaha he kelasi te etew su wey tew melikui is ked-ezapa te tutuu he Megbevayà.

¹⁷ Midhendini si Kristu te kelibutan ne impesavut din kenitew is Meupiya he Tudtulanen mehitenged te kelinew. Sikiyu is kenà menge Hudiyu wey sikami is menge Hudiyu, impesavut din kenitew is kelinew te kedepitè tew ziyà te Megbevayà.

¹⁸ Tenged te kebpekidsevaha tew ki Kristu, sikami is menge Hudiyu wey sikiyu is kenà menge Hudiyu, ebpekeuvey kiw en ziyà te Amey tew he Megbevayà pinaag̵i te kedtavang te Wag̵as he Mulin-ulin.

¹⁹ Ne sikiyu is menge tumutuu he kenà menge Hudiyu, minsan pa te zengan wazè kew isipa he menge sakup te Megbevayà, iyan, guntaan nehimu kew en he zuma te menge pinilì din he etew. Nehimu kew en he menge anak te Megbevayà iring te minsan hentei he tumutuu kandin.

²⁰ Ne sikitew is menge tumutuu, iring kiw te valey he ibpehitindeg te Megbevayà diyà te vatu. Iyan si Kristu kes batu he edtukuzan kayi te valey. Is menge epustul wey ebpemeneuven te Megbevayà, ne iyan menge tukud. Ne iyan kew menge zuma he himan kayi te valey.

²¹ Ne pinaag̵i ki Kristu nevig̵eran is kebeeli kayi te valey ne egkehimu heini he valey te Nengazen he zutun sikandin ed-ezapa.

²² Ne sikiyu zaan is kenà menge Hudiyu, ragkes kew kayi, ne nehimu kew en daan he menge himan kayi te valey he zutun ed-ubpà is Megbevayà pinaag̵i te Wag̵as he Mulin-ulin.