Impezayag 8 - Manobo Western Bukidnon

Is Ikepitu he Tiyap

¹ Ne hein in-awà te nati he kerehidu kes ikepitu he tiyap dutun te velesahan, naawà is egkengezineg diyà te ed-ubpaan te Megbevayà diyà te langit seled te liwazà te uras.

² Ne zutun neehè ku sikan is pitu he menge velinsug̵uen te Megbevayà he ebpemenhitindeg diyà te etuvangan te Megbevayà, ne mibeg̵ayan is kada sevaha kandan te vudyung.

³ Ne zuen pa zutun selakew he velinsug̵uen he zuen din bulawan he lediyà ne mid-uvey ne midhitindeg dutun te uvey te vangkù he pemuhatà. Dekelà is mehemut he veyewà he imbeg̵ey kandin dutun wey zin ikeamut dutun te menge ampù te menge tumutuu ziyà te vulawan he pemuhatà.

⁴ Ne is evel zutun te veyewà he midtutung he in-amut te menge ampù te menge tumutuu, midhendiyà te zivavew he ebpuun dutun te lediyà he egewezan te velinsug̵uen he ebpemenhitindeg diyà te etuvangan te Megbevayà.

⁵ Ne zutun, sikan is belinsug̵uen, mibpenù din is lediyè din te menge vag̵a he ebpuun dutun te pemuhatà ne intimbag din haazà is lediyà diyà te tanà puun dutun te langit. Ne zutun mibpemeransì, ne zuen utew memezag̵ing, ne egkeserasab is kilat, ne midlinug.

Is Heenem he Vudyung

⁶ Ne zutun mid-andam haazà is pitu he menge velinsug̵uen su edhiyupen dan en is menge vudyung dan.

⁷ Ne is egkehuna zutun te menge velinsug̵uen, midhiyup din is budyung din. Ne zutun, giyew wey hapuy he nesahug te lengesa is nengeulug diyà te tanà. Ne netutung dutun is iketelu he vahin te kelibutan. Netutung is iketelu he vahin te menge kayu wey naamin metutung is menge sagbet.

⁸ Ne zutun, midhiyup te ikezuwa he velinsug̵uen haazà is kandin he vudyung, ne zuen intimbag diyà te zag̵at he henduen be te zekelà he vuntud he neregreg.

⁹ Ne mibaluy he lengesa is iketelu he vahin te zag̵at. Ne neg̵erà is iketelu he vahin te minsan hengkey he linimbag he egeg̵ehinawa ziyà te zag̵at. Ne nahanew zaan is iketelu he vahin te langun he menge ed-untuzan diyà te zag̵at.

¹⁰ Ne zutun midhiyup te iketelu he velinsug̵uen is kandin he vudyung ne ebpuun te langit neulug is dekelà he vituen he egkeregreg he iring te sulù ne ziyà meketanà haazà te iketelu he vahin te menge wahig wey ziyà te iketelu he vahin te menge kalut.

¹¹ Is ngazan dutun te vituen ne Mepait. Ne mibmepait is iketelu he vahin te menge wahig diyà te kelibutan. Ne mibpatey is mezakel he menge etew tenged dutun te wahig su mibmepait utew.

¹² Ne zutun midhiyup te ikeepat he velinsug̵uen is budyung din. Ne nesug̵at is iketelu he vahin te andew, wey is iketelu he vahin te vulan, wey is iketelu he vahin te menge vituen. Ne tenged kayi naawà is kerayag te iketelu he vahin te menge vituen. Ne seled te iketelu he vahin te timpu te kada andew, mibmerusirem utew. Ne iring din ded daan seled te iketelu he vahin te timpu te kada kezukileman.

¹³ Ne zutun te kemulu ku pa kebantey nezineg ku is egkeg̵iyen te vanug he edlayang he utew mibpeketikang diyà te udtuwan. Ne ketetelu sikandin megkag̵i te mezag̵ing he lalag, ke sikandin te, “Kehizu utew te menge meg̵inged diyà te kelibutan.” Ne mid-uman sikandin megkag̵i te, “Utew mekehandekhandek is egkeulaula su meg̵aan en edhiyupa te tetelu pa he velinsug̵uen is menge vudyung dan!”