Impezayag 7 - Manobo Western Bukidnon

Is Menge Etew he Edtiyapan

¹ Neipus haazà neehè ku is heepat he velinsug̵uen te Megbevayà. Ebpemenhitindeg is kada sevaha kandan diyà te heepat he pesag̵ì te kelibutan ne ed-elangan dan is heepat he keramag diyà te kelibutan su wey kenà mekeremag̵i is tanà wey is dag̵at wey is menge kayu.

² Ne zutun neehè ku zaan is sevaha pa he velinsug̵uen he ziyà ebpuun te zapit te edsilaan ne igkulang din is tiyap te wazè din kemetayen he Megbevayà. Ne haazà is heepat he velinsug̵uen he insarig kandan is kedèdeeti te tanà wey zag̵at, migkeg̵iyan din sikandan.

³ Mezag̵ing is kegkag̵i zin te, “Kenè niw pa pendèdeeti is tanà wey zag̵at wey menge kayu taman te kenè dey pa egkesevukan te tiyap is menge vuked te menge sulug̵uen te Megbevayè tew.”

⁴ Ne nezineg ku zutun is kezakel te menge etew he edsevukan te tiyap, ne nenggatus wey kepatan wey heepat he libu sikandan langun. Ne ebpemuun sikandan diyà te sepulù wey zezuwa he kepuun te menge kevuwazan ni Israyil.

⁵ Te menge kevuwazan ni Huda, ne sepulù wey zezuwa he libu sikandan is midtiyapan. Te menge kevuwazan ni Rubin, ne sepulù wey zezuwa he libu. Te menge kevuwazan ni Gad, ne sepulù wey zezuwa zaan he libu.

⁶ Te menge kevuwazan ni Asir, ne sepulù wey zezuwa zaan he libu. Te menge kevuwazan ni Neptali, ne sepulù wey zezuwa zaan he libu. Te menge kevuwazan ni Menasis, ne sepulù wey zezuwa he libu.

⁷ Te menge kevuwazan ni Simeon, ne sepulù daan wey zezuwa he libu. Te menge kevuwazan ni Levi, ne sepulù wey zezuwa he libu zaan. Te menge kevuwazan ni Isekar, sepulù wey zezuwa he libu.

⁸ Te menge kevuwazan ni Sebulun, sepulù wey zezuwa he libu. Te menge kevuwazan ni Jose, sepulù wey zezuwa he libu. Te menge kevuwazan ni Benjamin, sepulù wey zezuwa he libu is midtiyapan daan.

Is Mezakel he Menge Etew Ziyà te Langit

⁹ Ne neipus haazà ne neehè ku is utew medmezakel he menge etew he kenè en egkevilang tuus te utew mezakel. Diyè dan ebpuun te minsan hendei he g̵inhedian wey tribu wey kepuun wey minsan hengkey he kineg̵iyan. Diyè dan ebpemenhitindeg te etuvangan te pinuuwà te Megbevayà wey ziyà te etuvangan te nati he kerehidu. Midsun-uzan sikandan te meputì ne ebpemengulangkulang dan te zehunen he menge subpang.

¹⁰ Mibpekezag̵ing dan is egkag̵i te, “Delig̵a is Megbevayè tew he mibpinuu ziyà te pinuuwè din te kedhadì wey zelig̵a zaan is nati he kerehidu su nelibri kiw zan te silut!”

¹¹ Ne zutun daan ebpemenhithitindeg is langun he menge velinsug̵uen te Megbevayà. Neelingkusan dan haazà is pinuuwà te edhadì wey te menge ebmeg̵urangen wey te heepat he linimbag. Ne heini is menge velinsug̵uen te Megbevayà, midlangkeb dan dutun te etuvangan te pinuuwà te edhadì su ed-ezapen dan is Megbevayà.

¹² Ne migkag̵i zan te, “Benar iyan su zait is Megbevayè tew he edelig̵en wey ebentug̵en wey edtehuzen wey ebpeselematan su iyan dà sikandin lavew he metau, iyan sikandin mekeg̵eg̵ehem wey mezesen; delig̵a sikandin te wazà pidtemanan!”

¹³ Ne zutun migkeg̵iyan a te sevaha zutun te menge ebmeg̵urangen, ke sikandin te, “Hentei heini is mibpenun-uzan te meputì wey hendei zan ebpememuun?”

¹⁴ Ne midtavak a te, “Iyan ka nesayud.” Ne ke sikandin te, “Heini is menge etew, ebpemekeuma sikandan he ebpuun dutun te zekelà he kemeresayan diyà te lumpad te kelibutan. Mibpemìpian dan is menge bisti zan diyà te lengesa te nati he kerehidu wey zan mehimu he meputì, he ke và dà egkeg̵iya, nepalis en is menge salè dan.

¹⁵ Umba, diyè dan edhitindeg te etuvangan te pinuuwà te Megbevayà. Andew wey mezukilem ne ziyè dan te simbahan te Megbevayà ne edtumanen dan dutun is egkesuatan din. Ne is Megbevayà he ziyà ebpimpinuu te pinuuwè din te kedhadì, iyan edlingahaan dan.

¹⁶ Kenè dan en egkengevitil; ne kenè dan en egkengemezahan; kenè dan en daan egkengetutung te andew wey minsan hengkey he utew meinit.

¹⁷ Su is nati he kerehidu he ziyà te teliwazà te pinuuwà te edhadì, iyan sikandin ed-elima kandan. Ibpeturedu zin kandan is ebpuunan te menge wahig he ebpekeveg̵ey te untung he wazà pidtemanan. Ne is Megbevayà, id-awè din en is keseengan kayi te menge etew,” ke sikandin.