Impezayag 4 - Manobo Western Bukidnon

Is Kedsimba Ziyà te Langit

¹ Ne zutun selakew en maan is impaahà kediey te Nengazen. Neehè ku is gemawan diyà te langit he nepuwasan. Ne zuen dutun egkag̵i ziyà te kediey ne haazà is egkag̵i ne iyan ded sikan is nezineg ku hein aney he henduen is kezag̵ing din te vudyung he edag̵ing. Ne ke sikandin te, “Hendini ka te zivavew ne ibpeehè ku kenikew is kinahanglan he egkeulaula keuzemà.”

² Ne zutun impehendiyà a te Wag̵as he Mulin-ulin. Ne hein diyè e en te langit, neehè ku is pinuuwà te edhadì ne zuen ebpimpinuu zutun.

³ Ed-ilak-ilak is paras din ne henduen be te menge mahal he vatu he haspi wey kurnalina. Ne mid-elingkus dutun te pinuuwà is belugtu he meilem he utew merayag su iring te mahal he vatu he ismiralda.

⁴ Ne zuen daan dutun keluwaan wey heepat he pinuuwà he nekeelingkus dutun te pinuuwà te edhadì. Ne zutun ebpememinuu is keluwaan wey heepat he ebmeg̵urangen. Meputì is bisti zan ne zuen insuup diyà te ulu zan he menge kuruna he vulawan.

⁵ Ne haazà is pinuuwà te edhadì, egkeserasab is kilat dutun ne henduen te edsendag̵en is beransì. Ne ziyà te etuvangan dutun te pinuuwà is pitu he sulù he meregreg he iyan sikan is pitu he g̵ehem te Wag̵as he Mulin-ulin he edsug̵uen te Megbevayà.

⁶ Ne zutun daan te etuvangan te pinuuwà neehè ku is henduen be te meluag he zag̵at he iring te ispihu su utew metingew. Ne ziyà te teliwazà, iyan, ebpekeelingkus daan dutun te pinuuwà, duen heepat he linimbag he kedesenan he neeneb te mata is menge lawa zan diyà te egkesineruwan wey egkeiniyug̵an.

⁷ Is sevaha zutun te linimbag, ne iring te erimaung; is ikezuwa ne iring te vaka; is iketelu ne iring te etew is paras din; ne is ikeepat, ne iring te vanug he edlayang.

⁸ Ne heini is heepat he linimbag, heenem is pakpak te uman sevaha kandan. Neeneb te mata is lawa zan wey is diyà te zizalem te pakpak dan. Ne te maandew wey mezukilem, iyan dà baal zan is kenè en egkepangkus he kegkanta. Ke sikandan te, “Wag̵as, wag̵as, wag̵as is Megbevayà. Nengazen sikandin he ebpekehimu te minsan hengkey. Iyan sikandin sikan is Megbevayà he zengan, guntaan, wey keuzemà te wazà pidtemanan.”

⁹ Ne haazà is heepat he linimbag, emun ebentug̵en dan wey edtehuzen dan wey ebpeselematan dan is wazà pidtemanan he Megbevayà he ebpimpinuu zutun te pinuuwà te edhadì, edlangkeb sikan is

¹⁰ keluwaan wey heepat he ebmeg̵urangen diyà te etuvangan din ne ed-ezapen dan is wazè din kemetayen he Megbevayà. Ne haazà is menge kuruna zan, idsavuk dan dutun te etuvangan te pinuuwà su ibeg̵ey zan diyà te Megbevayà. Ne zutun te kedsevuka zan dutun, edhabet dan egkag̵i te,

¹¹ “He Nengazen dey he Megbevayà, dait ka he edelig̵en, dait ka he edtehuzen. Mekeg̵eg̵ehem ka su nenlimbag ka te minsan hengkey. Nesuat ka he edlimbag ne pinaag̵i kayi nehimu is langun.”